விவசாயிகளுக்கு டபுள் குஷி.. ஜூலை மத்திய அரசு பணம்; 80% சோலார் பம்ப் செட் மானியம்! உடனே இதை செய்யுங்க
சென்னை: விவசாயிகளின் வாழ்வாதாரத்தை மேம்படுத்தவும், தடையற்ற நீர்ப்பாசன வசதியை உறுதி செய்யவும் மத்திய அரசு பிஎம் கிசான் மற்றும் பிஎம் குசும் ஆகிய திட்டங்களின் கீழ் பல்வேறு முக்கிய அறிவிப்புகளை வெளியிட்டுள்ளது. இதன் மூலம் விவசாயிகள் மானிய விலையில் சோலார் பம்ப் செட்டுகளை அமைப்பதோடு, அடுத்த தவணை நிதியையும் விரைவில் பெற உள்ளனர்.
மத்திய அரசு விவசாயிகளுக்கு ஆண்டுதோறும் வழங்கி வரும் பிஎம் கிசான் திட்டத்தின் 22-வது தவணை நிதி கடந்த மார்ச் 13, 2026 அன்று விடுவிக்கப்பட்டது. இதன் மூலம் சுமார் 9 கோடிக்கும் அதிகமான விவசாயிகள் பயனடைந்தனர். மத்திய அரசு ஒவ்வொரு ஆண்டும் பிப்ரவரி, ஜூலை மற்றும் அக்டோபர் மாதங்களில் இந்தத் தவணைப் பணத்தை விடுவிக்கிறது.
இப்போது 23-வது தவணைப் பணம் வரும் ஜூலை மாதத்தில் விவசாயிகளின் கணக்கில் வரவு வைக்கப்படும் என்று எதிர்பார்க்கப்படுகிறது. இந்தத் திட்டத்தில் வெளிப்படைத்தன்மையை உறுதி செய்ய, தகுதியற்ற ஒரு கோடி விவசாயிகளின் பெயர்கள் நீக்கப்பட்டுள்ளன. விவசாயிகள் தடையின்றி பணத்தைப் பெற இ-கேஒய்சி (e-KYC) செய்திருப்பது கட்டாயமாக்கப்பட்டுள்ளது.
அரசு வழங்கும் அதிரடி மானியம்
விவசாயிகளுக்குத் தடையற்ற மின்சாரம் வழங்குவது இன்றும் பெரும் சவாலாக உள்ளது. குறிப்பாக, நீர்ப்பாசனத்திற்கு மின்சாரம் தட்டுப்பாடு ஏற்படும்போது அது நேரடியாகப் பயிர் விளைச்சலைப் பாதித்து விவசாயிகளின் வருமானத்தைக் குறைக்கிறது. இதற்குத் தீர்வாக, 2019-ஆம் ஆண்டு 'பிஎம் குசும்' (PM-KUSUM) திட்டம் தொடங்கப்பட்டது. இத்திட்டம் புதிய மற்றும் புதுப்பிக்கத்தக்க எரிசக்தி அமைச்சகத்தால் நிர்வகிக்கப்படுகிறது.
இத்திட்டத்தின் கீழ் சூரிய சக்தி பம்புகளை அமைக்க மத்திய மற்றும் மாநில அரசுகள் இணைந்து 60% முதல் 80% வரை மானியம் வழங்குகின்றன. மீதமுள்ள தொகையை மட்டும் விவசாயிகள் செலுத்தினால் போதுமானது. இதற்காக வங்கிக் கடனுதவிகளும் எளிதாகக் கிடைக்கின்றன. இதன் மூலம் டீசல் மற்றும் மின்சார பம்புகளைச் சார்ந்திருப்பது குறைந்து, விவசாயம் லாபகரமானதாக மாறும்.
கூடுதல் வருமானம் ஈட்டும் வழிமுறை
சோலார் பம்ப் செட்டுகள் மூலம் விவசாயச் செலவு குறைவது மட்டுமின்றி, விவசாயிகள் கூடுதல் வருமானம் ஈட்டவும் வழிவகை செய்யப்பட்டுள்ளது. ஒரு மெகாவாட் சூரிய மின் உற்பத்தி திட்டத்தை அமைக்க சுமார் 4 முதல் 5 ஏக்கர் நிலம் தேவைப்படும். இதில் உற்பத்தியாகும் உபரி மின்சாரத்தை மின் விநியோக நிறுவனங்களுக்கு விற்பனை செய்வதன் மூலம் விவசாயிகள் நிலையான மாத வருமானத்தைப் பெற முடியும். குறிப்பாகத் தரிசு நிலங்களை வைத்திருப்பவர்களுக்கு இது ஒரு சிறந்த வாய்ப்பாகும்.
தேவையான ஆவணங்கள் மற்றும் தகுதிகள்
சொந்தமாக விவசாய நிலம் வைத்திருக்கும் அனைத்து விவசாயிகளும் இத்திட்டத்திற்கு விண்ணப்பிக்கலாம். விண்ணப்பிக்க விரும்புவோர் ஆதார் அட்டை, நில ஆவணங்கள் (பட்டா/சிட்டா), வங்கி கணக்கு புத்தகம், மொபைல் எண் மற்றும் பாஸ்போர்ட் அளவு புகைப்படம் ஆகியவற்றைத் தயாராக வைத்திருக்க வேண்டும். இத்திட்டத்தின் மூலம் குறைந்த செலவில், சுற்றுசூழலுக்குப் பாதிப்பில்லாத வகையில் தடையற்ற நீர்ப்பாசன வசதியை விவசாயிகள் பெற்றுத் தங்கள் வாழ்வாதாரத்தை மேம்படுத்திக் கொள்ள முடியும்.
Click it and Unblock the Notifications
Sign in with Google