சென்னை, காஞ்சிபுரத்தில் ட்ரோன்கள் 3 நாட்களுக்கு பறக்க தடை... காரணம் என்ன?

சென்னை: தேசிய பாதுகாப்பு படை ஒத்திகை பயிற்சி சென்னையில் நடைபெற உள்ளதை முன்னிட்டு இன்று முதல் வரும் 17ஆம் தேதி வரை ட்ரோன்கள் மற்றும் ஆளில்லா வான் வழி வாகனங்கள் பறக்க தடை விதிக்கப்பட்டுள்ளது. காஞ்சிபுரத்தில் முதல்வர் வருகையை முன்னிட்டு இன்று ஒருநாள் ட்ரோன்கள் பறக்க தடை விதிக்கப்பட்டுள்ளது.

சென்னை பெருநகர காவல்துறை வெளியிட்ட அறிக்கையில், தேசிய பாதுகாப்பு படை சென்னையில் வரும் 15ம் தேதி முதல் 17ம் தேதி வரை பல்வேறு பயங்கரவாத தாக்குதல்கள் மற்றும் அதனை முறியடிக்கும் GANDIV-V என்ற ஒத்திகை பயிற்சியை நடத்த திட்டமிட்டுள்ளது. இது சம்பந்தமாக, சென்னை காவல்துறை ஆணையரகத்தில் டேபிள் டாப் பயிற்சி என்ற கலந்தாய்வு கூட்டம் நடந்தது. இதில் என்எஸ்ஜி மற்றும் பிற துறைகளில் இருந்து பிரதிநிதிகள் கலந்து கொண்டனர். சென்னை பெருநகர காவல்துறை ஆணையர் சந்தீப் ராய் ரத்தோர் கலந்தாய்வு குறித்து எடுத்துரைத்தார்.

இதில் உள்துறை, இந்து சமய அறநிலையத் துறை, வருவாய் நிர்வாகம், பொதுத்துறை, மத்திய நுண்ணறிவு பிரிவு, சென்னை மாநகராட்சி, பாரத் சஞ்சார் நிகாம் லிமிடெட், சென்னை துறைமுக ஆணையம், தமிழ்நாடு மின்சார வாரியம், தமிழ்நாடு தீயணைப்பு மற்றும் மீட்புப் பணிகள், சென்னை மெட்ரோ நீர் வழங்கல் மற்றும் கழிவுநீர் வாரியம், கடலோர பாதுகாப்பு குழு, தமிழ்நாடு நெடுஞ்சாலைத் துறை, சென்னை மாவட்ட ஆட்சியர், சென்னை பெருநகர போக்குவரத்து கழகம், ரயில்வே, சென்னை பெருநகர காவல், பொதுப்பணித்துறை மற்றும் சென்னை விமான நிலைய அதிகாரிகள் உள்பட 28 துறையை சேர்ந்த அதிகாரிகள் பங்கேற்றனர்.

சென்னையில் இன்று முதல் 3 நாட்களுக்கு தேசிய பாதுகாப்பு படை ஒத்திகை பயிற்சி நடைபெற உள்ளது. பயங்கரவாத தாக்குதல்கள் மற்றும் அதனை முறியடிக்கும் GANDIV-V என்ற ஒத்திகை பயிற்சியும் நடைபெற உள்ளது. இதனால் 3 நாட்களுக்கு சென்னை பெருநகர காவல் நிலைய எல்லைக்கு உட்பட்ட இடங்கள் சிவப்பு மண்டலமாக அறிவிக்கப்பட்டுள்ளது.

இதையடுத்து சென்னையில் இன்று முதல் வரும் 17ஆம் தேதி வரை ட்ரோன்கள் மற்றும் ஆளில்லா வான் வழி வாகனங்கள் பறக்க தடை விதிக்கப்பட்டுள்ளது. இதேபோல் கலைஞர் மகளிர் உரிமைத் தொகை திட்டத்தை தொடங்கி வைப்பதற்காக முதல்வர் மு.க.ஸ்டாலின் காஞ்சிபுரத்திற்கு வருகை தருவதையொட்டி, நாளை ட்ரோன்கள் பறக்க தடை விதிக்கப்பட்டுள்ளது.

English summary

Flying of drones and unmanned aerial vehicles has been banned from today till the 17th in view of the National Defense Force training exercise to be held in Chennai. Flying of drones has been banned for one day today in view of Chief Minister's visit to Kanchipuram.