தங்கம் விலை உயர்வால் தமிழகத்தில் ‘நகை சேமிப்புத் திட்டங்கள்’ முடங்கும் அபாயம்.. ஏன் தெரியுமா?

தமிழகத்தில் நடுத்தர வர்க்க மக்களின் மிகப்பெரிய நம்பிக்கை 'நகை சேமிப்புத் திட்டங்கள்'. மாதம் ஒரு குறிப்பிட்ட தொகையைக் கட்டி, இறுதியில் செய்கூலி, சேதாரம் இல்லாமல் நகை வாங்குவதுதான் இந்தத் திட்டத்தின் அடிப்படை. ஆனால், தங்கம் விலை ஒரு சவரன் ₹2 லட்சத்தை நோக்கி நகரும் இன்றைய சூழலில், இந்தத் திட்டங்கள் அனைத்தும் பெரும் சிக்கலைச் சந்திக்கப் போகின்றன.

1. பணமாகச் சேமிப்பதில் உள்ள ஆபத்து

பல நகைக்கடைகளில் மக்கள் பணமாகத்தான் (உதாரணமாக மாதம் ₹5,000) கட்டுகிறார்கள். ஆனால், தங்கம் விலை மின்னல் வேகத்தில் ஏறும்போது, 11 மாதங்கள் கழித்து அவர்கள் கட்டிய மொத்தப் பணத்திற்கு வெறும் சொற்பமான கிராம் தங்கம் மட்டுமே கிடைக்கும். கிராம் கணக்கு என்றாலும் மாதம் மாதம் ஏறிக்கொண்டே இருப்பதால் அவர்களுக்கு பெரிய லாபம் இல்லாமல் போகும்.

உதாரணத்திற்கு: திட்டத்தைச் சேரும்போது ஒரு கிராம் ₹13,000-க்கு இருந்தால், இறுதியில் வாங்கும்போது அது ₹25,000-ஐத் தொட்டால், மக்கள் கட்டிய பணத்திற்குப் பாதியளவு நகை கூடக் கிடைக்காது. இது சாமானியர்களைப் பெரும் ஏமாற்றத்தில் தள்ளிவிடும்.

கடைகளுக்கு ஏற்படும் நெருக்கடி

தங்கம் விலை கட்டுக்கடங்காமல் ஏறினால், நகைக்கடை உரிமையாளர்களுக்கும் சிக்கல் வரும். மக்கள் கட்டிய பணத்திற்கு, பழைய விலையிலேயே நகை கொடுக்க வேண்டும் என்கிற ஒப்பந்தம் இருந்தால், கடைக்காரர்கள் பெரும் நஷ்டத்தைச் சந்திக்க நேரிடும்.

தங்கம் விலை இப்படி எகிறிக்கொண்டிருக்கும் நேரத்தில், நீங்கள் நகை சேமிப்புத் திட்டத்தில் சேருபவர் என்றால், ஒரு விஷயத்தில் மிகக் கவனமாக இருக்க வேண்டும். பணத்தை நம்பாமல் கிராமை நம்புங்கள்: நீங்கள் கட்டும் பணத்தை அன்றைய தங்கம் விலைக்கு ஏற்ப 'கிராமாக' உங்கள் கணக்கில் வரவு வைக்கும் திட்டங்களைத் தேர்ந்தெடுங்கள்.

ஏன்? நீங்கள் 1,000 ரூபாய் கட்டும்போது தங்கம் விலை ஏறினாலும் சரி, இறங்கினாலும் சரி, அந்தப் பணத்திற்கு எத்தனை மில்லி கிராம் தங்கம் வருமோ அது உங்கள் கணக்கில் ஏறிவிடும். 11 மாதம் கழித்து தங்கம் விலை ஒரு சவரன் 2 லட்சத்தை எட்டினாலும், நீங்கள் ஏற்கனவே சிறுகச் சிறுகச் சேர்த்த அந்த 'கிராம்' அப்படியே இருக்கும்.

அப்படியில்லாமல், 'பணமாக' மட்டும் சேமித்து தங்க நகை வாங்க போனால், இறுதியில் நகை வாங்கும்போது விலை உயர்வால் நீங்கள் நஷ்டப்பட நேரிடும். இதனால், பல சிறிய நகைக்கடைகள் இத்திட்டங்களை பாதியிலேயே நிறுத்தவோ அல்லது விதிமுறைகளை மாற்றவோ வாய்ப்பு உள்ளது.

'செய்கூலி - சேதாரம்' சலுகை குறையலாம்

தங்கம் விலை உச்சத்தைத் தொடும்போது, கடைகள் தங்களின் லாபத்தைப் பாதுகாக்க 'சேதாரம் கிடையாது' என்கிற கவர்ச்சிகரமான சலுகைகளை ரத்து செய்யக்கூடும். இது நகை சேமிப்புத் திட்டத்தின் நோக்கத்தையே சிதைத்துவிடும்.

மக்களின் வாங்கும் திறன் வீழ்ச்சி

ஒரு சவரன் ₹2 லட்சம் என்கிற நிலையை எட்டும்போது, ஒரு மாதத் தவணை ₹10,000 கட்டினால் கூட, ஒரு வருடம் முடிவில் வெறும் அரை சவரன் கூட வாங்க முடியாது. இதனால் மக்கள் இந்தத் திட்டங்களில் சேருவதையே தவிர்ப்பார்கள். இது தமிழகத்தின் நகை விற்பனைச் சந்தையைப் பெருமளவு பாதிக்கும் அபாயமும் உள்ளது.

தங்கம் விலை என்பது வெறும் சர்வதேசப் பிரச்சனை மட்டுமல்ல; அது ஒவ்வொரு தமிழகக் குடும்பத்தின் கனவையும் சிதைக்கக்கூடிய ஒன்று. டொனால்ட் டிரம்பின் பிடிவாதமான பொருளாதாரக் கொள்கைகள், லண்டன் அல்லது நியூயார்க்கில் எதிரொலிப்பதை விட, திருநெல்வேலியிலும் திருச்சியிலும் உள்ள சாமானிய மக்களின் நகைச் சீட்டுகளில் அதிகமாக எதிரொலிக்க அதிக வாய்ப்பு உள்ளது. இப்போது உள்ள விலைக்கும் சரி, இனி வரப்போகும் விலைக்கும் சரி, தங்கம் என்பது அலங்காரப் பொருள் அல்ல... அது ஒரு எட்டாக்கனி!" தான்.

English summary

Due to the rise in gold prices, the 'jewelry savings schemes' in Tamil Nadu will be severely affected