போராட மட்டுமல்ல.. ஆயுதம் ஏந்தவும் தெரியும்.. ஈவிகேஎஸ் இளங்கோவன் பரபரப்பு பேச்சு
சென்னை: காங்கிரஸ்காரனுக்கு கொடி பிடிக்கவும் தெரியும், ஆயுதம் ஏந்தவும் தெரியும் எனக் கூறி பாஜகவை பொளந்து கட்டியிருக்கிறார் முன்னாள் மத்திய அமைச்சரும் தமிழக காங்கிரஸ் கமிட்டியின் முன்னாள் தலைவருமான ஈ.வி.கே.எஸ்.இளங்கோவன்.
காங்கிரஸ்காரர்களுக்கு மகாத்மா காந்தி மட்டும் தலைவரல்ல என்றும் தங்களுக்கு நேதாஜியும் தலைவர் தான் எனவும் கூறியிருக்கிறார்.
பாஜக செய்தித் தொடர்பாளர் நுபுர் ஷர்மா விவகாரத்தை திசை திருப்பவே, ராகுல் மீதான இந்த விசாரணை நடப்பதாக ஈ.வி.கே.எஸ்.இளங்கோவன் தெரிவித்துள்ளார்.
நேஷனல் ஹெரால்டு
சும்மா இருந்தவர்களை சுரண்டி விட்ட கதையாக, நாடு முழுவதும் சோர்ந்து கிடந்த காங்கிரஸ் தொண்டர்களை நேஷனல் ஹெரால்டு விவகாரம் எழுச்சி அடைய வைத்துள்ளது. ராகுல்காந்தியிடம் நடத்தப்படும் விசாரணைக்கு எதிர்ப்பு தெரிவித்து நாடு முழுவதும் காங்கிரஸ் தொண்டர்களும், நிர்வாகிகளும் அலை அலையாக பொங்கி எழுந்து ஆர்ப்பாட்டம், போராட்டம் என நடத்தி வருகின்றனர்.
ஆயுதம் ஏந்துவோம்
இந்தச் சூழலில் முன்னாள் மத்திய அமைச்சரும் தமிழக காங்கிரஸ் கமிட்டியின் முன்னாள் தலைவருமான ஈ.வி.கே.எஸ்.இளங்கோவன் இது தொடர்பாக கூறுகையில், ''காங்கிரஸ்காரனுக்கு கொடி பிடிக்கவும் தெரியும், ஆயுதம் ஏந்தவும் தெரியும்'' எனக் கூறி பாஜகவை பொளந்து கட்டியிருக்கிறார். மேலும், காங்கிரஸ் பெற்றுக்கொடுத்த சுதந்திரத்தால் தான் மோடி இன்று பிரதமராகி ஆட்டம் போட முடிவதாக அவர் சாடியிருக்கிறார்.
10 மணி நேரம்
ராகுல்காந்தியிடம் 10 மணி நேரம் விசாரணை நடத்துகிறார்கள் என்றும் அப்படி விசாரணை நடத்தும் அளவுக்கு அவர் என்ன செய்துவிட்டார் எனவும் கேள்வி எழுப்புகிறார். நுபுர் ஷர்மா விவகாரத்தை திசை திருப்பவே இந்த விசாரணையை நடத்தி வருவதாகவும் அவர் தெரிவித்துள்ளார். காங்கிரஸ்காரர்களுக்கு மகாத்மா காந்தி மட்டும் தலைவரல்ல தங்களுக்கு நேதாஜியும் தலைவர் தான் என்பதை சுட்டிக்காட்டியுள்ளார்.
அஞ்சாமல் கருத்து
ஈ.வி.கே.எஸ்.இளங்கோவனை பொறுத்தவரை எந்தவொரு வழக்கு விசாரணைக்கும் அஞ்சாமல், மனதில் தோன்றுவதை மறைக்காமல் பேசக்கூடியவர். இன்று என்றல்ல ஆரம்பக்காலம் தொட்டே இது அவரது பாணியாகும். காங்கிரஸ் தலைமைக்கு நெருக்கடி ஏற்பட்டுள்ள இந்த தருணத்தில் அவர் கூறியிருக்கும் இந்தக் கருத்து முக்கியத்துவம் வாய்ந்த ஒன்றாக கருதப்படுகிறது.
Click it and Unblock the Notifications
Sign in with Google