சத்தமில்லாமல் பரவிய அந்த வீடியோ.. பார்த்ததுமே கடுப்பான தமிழக பாஜக.. விஜய் கட்சிக்கு போன வார்னிங்
சென்னை: தமிழக வெற்றிக் கழகத்தினர் அரசுபள்ளிகளுக்குள் புகுந்து விதிமீறல்களில் ஈடுபடுவதாக தமிழக பாஜக விமர்சித்துள்ளது.. அதற்கான ஆதாரங்களுடன் கூடிய வீடியோவையும் முன்வைத்து ஆளுங்கட்சிக்குக் கடுமையான கண்டனங்களை தமிழக பாஜக பதிவு செய்துள்ளது. இந்த விவகாரம் ஆளும் தவெக + எதிர்க்கட்சியான பாஜக இடையே மேலும் வலுவான மோதலை உருவாக்கியுள்ளது. என்ன நடக்கிறது அரசியல் களத்தில்?
நேற்றைய தினம் திமுக-வின் முக்கியத் தலைவரான உதயநிதி ஸ்டாலின் முதலமைச்சர் விஜயைக் கடுமையாக விமர்சித்தார்.. மாற்றுக்கட்சியினரைத் தன்னுடைய பக்கம் இழுத்து "ஆள் சேர்க்கும் வேலையை" முதலமைச்சர் உடனடியாகக் கைவிட வேண்டும் என்றும், அதற்குப் பதிலாக மாநிலத்தின் நிர்வாகத்திலும் அரசுப் பணிகளிலும் முழு கவனத்தையும் செலுத்த வேண்டும் என்றும் அவர் அறிவுறுத்தினார்.
தவெக ஆட்சி மீது விமர்சனம்
எதிர்க்கட்சிகளை உடைத்துத் தன் கட்சியைப் பலப்படுத்துவதிலேயே முதலமைச்சர் ஆர்வம் காட்டுவதால், முக்கிய நிர்வாகப் பணிகள் பாதிக்கப்படுவதாகக் குறிப்பிட்டு, அரசியல் உள்நோக்கங்களை விடுத்து முழுமையான ஆட்சிக்கட்டமைப்பில் முதலமைச்சர் கவனம் செலுத்த வேண்டியது அவசியம் என்றும் வலியுறுத்தியுள்ளார்.
மேலும், அரசு பள்ளிகளுக்கு சட்டமன்ற உறுப்பினர்கள் செல்வது தவறில்லை. ஆனால், மாணவர்கள் மத்தியில் தவறான பாடல்களை போட்டு நடனமாட வைக்கிறார்கள். மாணவர்களுக்கு தன்னம்பிக்கை அளிக்கும் பாடல்களை போட்டால் பரவாயில்லை. சினிமாவில் உள்ள குத்து பாடல்கள், தவறான அர்த்தமுள்ள பாடல்களை மாணவர்கள் மத்தியில் ஒளிபரப்பு செய்கிறார்கள். முதல்வர் தலையிட்டு இதை நிறுத்த வேண்டும் என்றும் உதயநிதி ஸ்டாலின் கேட்டுக் கொண்டார்.
அரசு பள்ளிகளில் குத்து பாடல்கள்
இந்நிலையில், தமிழகத்தில் அரசுப் பள்ளிகள் அனைத்தும் ஆளுங்கட்சியான தமிழக வெற்றிக் கழகத்தின் அரசியல் விளம்பரக் கூடங்களாக மாற்றப்பட்டு வருகின்றனவா என்று தமிழக பாஜக காரசாரமாக கேள்வியை எழுப்பியுள்ளது. இது தொடர்பாக அக்கட்சி சார்பில் அதிகாரப்பூர்வமான அறிக்கை ஒன்று வெளியிடப்பட்டுள்ளது.
அதில், மாநிலத்தின் கல்வி நிலையங்களில் தவெகவினர் விதிகளை மீறி அரசியல் நடவடிக்கைகளில் ஈடுபட்டு வருவதாக அடுக்கடுக்கான புகார்கள் முன்வைக்கப்பட்டுள்ளன. காஞ்சிபுரம் மாவட்டம், உத்திரமேரூர் அருகே உள்ள ஓர் அரசுப் பள்ளி வகுப்பறைக்குள் த.வெ.க., நிர்வாகிகள் அனுமதியின்றி நுழைந்து, மாணவர்களுக்கு பாடம் எடுப்பது போல ரீல்ஸ் வீடியோ எடுத்து சமூக ஊடகங்களில் வெளியிட்டுள்ளதாக பாஜக சுட்டிக்காட்டியுள்ளது.
திமுக, பாஜக விமர்சனம்
அதேபோல, திருப்பூர் கே.எஸ்.சி., அரசு ஆண்கள் மேல்நிலைப் பள்ளி வளாகத்தில், முதலமைச்சர் விஜயின் பிறந்த நாளை முன்னிட்டு தவெக நிர்வாகிகள் மருத்துவ முகாம் நடத்தியுள்ளனர். மேலும், திருவாரூர் குன்னலூர் ஊராட்சி ஒன்றிய நடுநிலைப் பள்ளிக்குள் த.வெ.க.,வினர் திடீரென புகுந்து ஆய்வு என்ற பெயரில் அத்துமீறலில் ஈடுபட்டுள்ளதாகவும் அந்த அறிக்கையில் விவரிக்கப்பட்டுள்ளது.
பள்ளிக் கல்வித்துறையின் விதிமுறைகளின்படி, அரசுப் பள்ளி வளாகங்களுக்குள் எந்தவொரு அரசியல் சார்ந்த நிகழ்ச்சிகளையோ அல்லது அரசியல் அமைப்புகளின் தலையீடுகளையோ அனுமதிக்கக் கூடாது என்ற மரபு உள்ளது. இந்தச் சூழலில், அதிகாரப் பலத்தைப் பயன்படுத்தி த.வெ.க.,வினர் தொடர்ந்து விதிகளையும், கல்வி நிறுவனங்களின் புனிதத்தையும் மீறிச் செயல்படுவது எந்த வகையில் நியாயம் என்று பாஜக கேள்வி கேள்வி எழுப்பியுள்ளது.
தவெக அரசுக்கு தலைவலி?
அரசுப் பள்ளிகளைத் தங்களின் அரசியல் ஆதாயத்திற்காகப் பயன்படுத்துவதை ஆளுங்கட்சியினர் உடனடியாக நிறுத்திக் கொள்ள வேண்டும் என்றும் தமிழக பாஜக தனது அறிக்கையில் மிகக் கடுமையான கண்டனத்தைப் பதிவு செய்துள்ளது.
திமுக மற்றும் பாஜக ஆகிய 2 முக்கிய எதிர்க்கட்சிகளுமே ஆளுங்கட்சியான தவெக மீது அடுக்கடுக்கான குற்றச்சாட்டுகளையும் கண்டனங்களையும் முன்வைத்துள்ளதால், தமிழக அரசியல் களம் பெரும் பரபரப்பிற்கு ஆளாகி உள்ளது.. இந்த இருமுனைத் தாக்குதல்களும் ஆளும் தவெக அரசிற்கு பெரும் அரசியல் அழுத்தத்தை ஏற்படுத்தியுள்ளது.. அத்துடன் பள்ளிக்கூடங்களுக்குள் அரசியல் நுழைவது சரியா?" என்ற கேள்வியும் வலுவாக கிளம்பி உள்ளது.
Click it and Unblock the Notifications
Sign in with Google