தமிழக அரசின் டெல்லி சிறப்பு பிரதிநிதி ரேஸில் வென்றார் மாஜி எம்.பி. நாகை ஏ.கே.எஸ். விஜயன்!
சென்னை: தமிழக அரசின் டெல்லி சிறப்பு பிரதிநிதியாக முன்னாள் எம்.பி. ஏ.கே.எஸ். விஜயன் நியமிக்கப்பட்டுள்ளார்.
தமிழகத்தில் திமுக ஆட்சி அமைந்த உடன் டெல்லி சிறப்பு பிரதிநிதி யார் என்கிற கேள்வி எழுந்தது. திமுகவின் சீனியர்கள் பலரது பெயர்களும் அடிபட்டது.
ஏ.கே.எஸ். விஜயன் நியமனம்
ஒருகட்டத்தில் முதல்வர் மு.க.ஸ்டாலின் மருமகன் சபரீசன் பெயரும் கூட இந்த ரேஸில் அடிபட்டது. இந்த நிலையில் தற்போது முன்னாள் எம்.பி. ஏ.கே.எஸ். விஜயன், தமிழக அரசின் டெல்லி சிறப்பு பிரதிநிதியாக நியமிக்கப்பட்டுள்ளார்.
அமைச்சர் பதவிக்கு இணையானது
தமிழக தலைமை செயலாளர் இறையன்பு இன்று வெளியிட்ட அறிக்கையில் இது தெரிவிக்கப்பட்டுள்ளது. டெல்லி சிறப்பு பிரதிநிதி என்பது மாநில அமைச்சர் பதவிக்கு இணையானது. தமிழக அரசுக்கும் டெல்லி மத்திய அரசுக்கும் இணைப்பு பாலமாக செயல்படக் கூடியவர் சிறப்பு பிரதிநிதி.
ஹாட்ரிக் வெற்றி
1999, 2004, 2009 லோக்சபா தேர்தல்களில் ஹாட்ரிக் வெற்றி பெற்ற சீனியர் திமுக தலைவர் ஏ.கே.விஜயன். 2014 லோக்சபா தேர்தலில் தோல்வி அடைந்த ஏ.கே.எஸ். விஜயனுக்கு, 2019 தேர்தலில் போட்டியிட வாய்ப்பு தரப்படவில்லை.
திமுக விவசாய அணி செயலாளர்
திமுகவின் விவசாய அணியின் மாநில செயலாளராகவும் ஏ.கே.எஸ்.விஜயன் பொறுப்பு வகித்து வருகிறார். ஓராண்டு காலம் இந்த பதவியில் ஏ.கே.எஸ். விஜயன் நீடிப்பார்.
ஸ்டாலின் டெல்லி பயணம்
தமிழக முதல்வர் மு.க.ஸ்டாலின் வரும் 17-ந் தேதி டெல்லி பயணம் மேற்கொள்கிறார். முதல்வராக பதவி ஏற்ற பின்னர் டெல்லிக்கு முதல் முறையாக செல்கிறார் மு.க.ஸ்டாலின். டெல்லியில் பிரதமர் மோடி மற்றும் மத்திய அமைச்சர்களையும் மு.க.ஸ்டாலின் சந்தித்து பேச உள்ளார். இந்த நிலையில் தமிழக அரசின் டெல்லி சிறப்பு பிரதிநிதியாக ஏ.கே.எஸ். விஜயன் நியமிக்கப்பட்டுள்ளது குறிப்பிடத்தக்கது.
Click it and Unblock the Notifications
Sign in with Google