அதிமுகவை தடம் தெரியாமல் உடைக்கும் தவெக.. விஜயபாஸ்கர் அவுட்.. சொல்லி சொல்லி வீழ்த்தும் விஜய்?

Updated: Tuesday, June 16, 2026, 15:50 [IST]

Subscribe to Oneindia Tamil

சென்னை: அதிமுகவினர் பலரும் அடுத்தடுத்து தவெகவில் இணைந்து வருவது பரபரப்பை ஏற்படுத்தி உள்ளது. இது அதிமுகவின் பலத்தை அடியோடு முறிக்கும் அபாயம் உள்ளது.

தமிழக அரசியல் களம் தொடர்ந்து அதிர்வுகளைச் சந்தித்து வரும் நிலையில், மீண்டும் ஒரு பெரிய திருப்பம் ஏற்பட்டுள்ளது. முன்னாள் சுகாதாரத் துறை அமைச்சரும், அதிமுகவின் விராலிமலை சட்டமன்ற உறுப்பினருமான டாக்டர் சி. விஜயபாஸ்கர் தனது எம்.எல்.ஏ பதவியை அதிரடியாக ராஜினாமா செய்துள்ளார்.

இந்த நடவடிக்கை, அவரது தமிழக வெற்றிக் கழகம் (தவெக) இணைப்புக்கு முன்னோடியாக பார்க்கப்படுகிறது. 2026 சட்டமன்றத் தேர்தலுக்குப் பிறகு தமிழக அரசியலில் நடைபெறும் கட்சித் தாவல்கள் மற்றும் புதிய கூட்டணி உருவாக்கங்களுக்கு இது மேலும் வேகம் சேர்க்கும் என அரசியல் பார்வையாளர்கள் கருதுகின்றனர்.

விஜயபாஸ்கர் அதிமுகவில் நீண்ட காலமாக முக்கியப் பொறுப்புகளை வகித்தவர். ஜெயலலிதா ஆட்சிக் காலத்தில் இருந்து கட்சியின் விசுவாசியாக இருந்த அவர், பின்னர் சுகாதார அமைச்சராகப் பொறுப்பேற்று பல்வேறு சீர்திருத்தங்களை முன்னெடுத்தார். கொரோனா காலத்தில் சிறப்பாக பணிகளை செய்தவர்.

ஆனால், சமீப காலமாக அதிமுக பொதுச் செயலாளர் எடப்பாடி கே. பழனிசாமி தலைமைக்கு எதிராக அவர் தனது அதிருப்தியை வெளிப்படுத்தி வந்தார். குறிப்பாக, புதுக்கோட்டை மாவட்டச் செயலாளர் பதவி பறிக்கப்பட்டதைத் தொடர்ந்து, கட்சித் தலைமைக்கு எதிரான அவரது போக்கு தீவிரமடைந்தது.

சட்டப்பேரவையில் தவெக அரசுக்கு ஆதரவாக வாக்களித்த 'ரெபல்' எம்.எல்.ஏக்களில் முன்னணியில் இருந்த விஜயபாஸ்கர், அண்மையில் எடப்பாடி பழனிசாமியை மறைமுகமாக விமர்சித்து பேசியிருந்தார். "கடினமாக உழைக்கும் தொண்டர்களை எதிரிகளாகப் பார்க்கும் தலைமைக்கு வரலாறு என்றும் வெற்றியைத் தந்ததில்லை" என அவர் கூறியது பெரும் பரபரப்பை ஏற்படுத்தியது. இந்த ராஜினாமா மூலம் அதிமுகவின் புதுக்கோட்டை மற்றும் டெல்டா மண்டலங்களில் பெரும் பின்னடைவு ஏற்பட்டுள்ளதாக விமர்சகர்கள் சுட்டிக்காட்டுகின்றனர்.

தவெக தலைவர் விஜய் தலைமையிலான அரசு பலப்படுத்தப்படும் வகையில், அதிமுகவில் இருந்து தொடர்ந்து முக்கிய தலைவர்கள் இணைந்து வருவது குறிப்பிடத்தக்கது. விஜயபாஸ்கரின் இந்த முடிவு அந்த வரிசையில் மற்றொரு முக்கிய அத்தியாயமாக அமைந்துள்ளது.

அதிமுகவில் இருந்து தவெகவுக்கு இணைந்த முக்கிய தலைவர்கள்:

முன்னாள் அமைச்சர்கள் பட்டியலில் கே.ஏ. செங்கோட்டையன், எம்.சி. சம்பத், கடம்பூர் சி. ராஜு, உடுமலை கே. ராதாகிருஷ்ணன், என்.ஆர். சிவபதி, வெல்லமண்டி என். நடராஜன், கே.டி. பச்சைமால் போன்றோர் இடம் பெற்றுள்ளனர். இவர்கள் அனைவரும் தங்கள் பகுதிகளில் செல்வாக்கு மிக்கவர்கள்.
ராஜினாமா செய்து இணைந்த எம்.எல்.ஏக்களில் மரகதம் குமரவேல் (மதுராந்தகம்), எஸ். ஜெயக்குமார் (பெருந்துறை), பி. சத்யாபாமா (தாராபுரம்), இசக்கி சுப்பையா (அம்பாசமுத்திரம்) ஆகியோர் முக்கியமானவர்கள்.

முன்னாள் எம்.பி.க்கள் மற்றும் மூத்த நிர்வாகிகளான என். பாலகங்கா, ஆர். வனரோஜா, ஏ. இளவரசன், எம். வசந்தி, ஆர். நடராஜ், இ. புவனேஸ்வரி உள்ளிட்டோரும் தவெகவில் இணைந்துள்ளனர். மேலும், ஏ. கோவிந்தசாமி, எம். முருகன், வி. பன்னீர்செல்வம் உள்ளிட்ட பல முன்னாள் எம்.எல்.ஏக்களும் கட்சியை மாற்றியுள்ளனர்.

இந்த தொடர் இணைப்புகள் தவெகவை வலுப்படுத்தும் அதே வேளையில், அதிமுகவுக்கு பெரும் சவாலாக அமைந்துள்ளது. விராலிமலை தொகுதியை தனது கோட்டையாகக் கொண்ட விஜயபாஸ்கரின் ராஜினாமா, அடுத்தக்கட்ட அரசியல் மாற்றங்களுக்கு வழிவகுக்கும் என எதிர்பார்க்கப்படுகிறது.

தமிழக அரசியல் வட்டாரங்கள் இப்போது அவரது அதிகாரப்பூர்வ இணைப்பை ஆவலுடன் எதிர்பார்த்துள்ளன.
இந்த நிகழ்வு 2026-க்கு பிந்தைய தமிழக அரசியலை மேலும் சுவாரசியமாக்கியுள்ளது. கட்சி உறுப்பினர்களிடையே அதிருப்தி அதிகரிக்கும் பட்சத்தில், இன்னும் பல தலைவர்கள் தவெக நோக்கி நகர்வார்களா என்பது அடுத்த சில நாட்களில் தெரியவரும்.