'எல்லாரும் இருந்து சாப்பிட்டு போங்க'.. விஜய்யின் மகாபலிபுரம் நிகழ்ச்சியில் கவனிக்க வைத்த 4 விஷயங்கள்

சென்னை: நடிகர் விஜய் இன்று மகாபலிபுரத்தில் நடந்த கிறிஸ்துமஸ் விழாவில் பைபளில் வரும் ஒரு கதையை பற்றி கூறினார். அந்த கதையில் கிணற்றில் தள்ளிவிடப்பட்டவர் நாட்டை ஆண்டது பற்றியதாக இருந்தது. அதேபோல் அனைத்து சமூக மக்களின் நம்பிக்கையை மதிக்க வேண்டும் என்றும் கூறினார். இந்த இரண்டுமே நடிகர் விஜய் சொல்ல வருவதற்கு திமுகவை பற்றியது தான். இது யாருக்கு பொருந்தும் என்பது உங்கள் அனைவருக்குமே தெரியும் என்று வெளிப்படையாகவே கூறினார். இறுதியாக எல்லாரும் இருந்து சாப்பிட்டு செல்லுங்கள் என்று கூறியதுடன், கிறிஸ்துமஸ் கேக் வெட்டி குழந்தைகளுக்கு ஊட்டிவிட்டார்.

தமிழக வெற்றிக்கழகம் கட்சி தலைவரான நடிகர் விஜய் இன்று மகாபலிபுரத்தில் உள்ள நட்சத்திர ஓட்டலில் கிறிஸ்துமஸ் விழாவை நடத்தினார். தவெக சார்பில் நடந்த விழாவில் அக்கட்சியின் முக்கிய நிர்வாகிகள் பலரும் கலந்து கொண்டனர். குறிப்பாக செயலாளர் புஸ்ஸி ஆனந்த், ஆதவ் அர்ஜூனா, செங்கோட்டையன், சிடி நிர்மல்குமார், முன்னாள் ஐஆர்எஸ் அதிகாரி அருண் ராஜ் உள்பட பலரும் கலந்து கொண்டனர். அதேபோல் சென்னையில் உள்ள முக்கியமான கிறிஸ்தவ பேராயர்கள் இன்று விழாவிற்கு வருகை தந்தனர்.

புரட்சி தளபதி

கிறிஸ்தவ பேராயர்கள் கிறிஸ்மஸ் வாழ்த்துக்களை கூறி பேசும் போது, நடிகர் விஜய்யை வெகுவாக புகழ்ந்தனர். குறிப்பிட்டு சொல்ல வேண்டும் என்றால், அனைவருமே செங்கோட்டையன் கொடுத்த பட்டமான புரட்சி தளபதி என்ற அடைமொழியுடன் விஜய்யை அழைத்தனர். மறைந்த முன்னாள் முதல்வர்கள் எம்ஜிஆர், ஜெயலலிதாவிற்கு பிறகு விஜய்யை பலருக்கும் பிடிக்கும் என்று அதிமுக தொண்டர்களை குறி வைத்து பேராயர்கள் பேசியது ஆச்சரியத்தில் ஆழ்த்தியது.

ஒளி பிறக்கும்

அதேபோல் தவெக தலைவர் விஜய் அரசியலை தாண்டி சில விஷயங்களையும் இன்று பேசினார். அப்படி பேசுகையில், " கண்டிப்பாக ஒரு ஒளி ஒன்று பிறக்கும். அந்த ஒளி நம்மை வழி நடத்தும். இங்கு வந்துள்ள அருளாளர்கள்.. அன்பர்கள் அனைவருக்கும் கிறிஸ்துமஸ் நல்வாழ்த்துக்கள்.. அனைத்து புகழும் எல்லாம் வல்ல இறைவனுக்கே.. பிரைஸ் த லாட்.. நம்பிக்கையோடு இருங்க... நல்லதே நடக்கும்.. வெற்றி நிச்சயம் .. என் நெஞ்சில் குடியிருக்கும்.. உங்கள் அனைவருக்கும், தோழர்கள், தோழிகள், மேடையில் உள்ள அனைத்து பெரியவர்களுக்கும் ரொம்ப ரொம்ப நன்றி. எல்லாரும் இருந்து சாப்பிட்டு போங்க.. நன்றி" என்று விஜய் கூறினார்.

கேக் ஊட்டிவிட்டார்

தொடர்ந்து மிகப்பெரிய கேக் ஒன்று மேடையில் கொண்டு வந்து வைக்கப்பட்டது. அந்த கேக்கை பல குழந்தைகளை மேடைக்கு அழைத்த விஜய், அவர்களுக்கு ஊட்டிவிட்டார். அவர்களுடன் புகைப்படமும் வீடியோவும் எடுத்து மகிழ்ந்தார். குழந்தைகள் விஜய் கேக் ஊட்டிவிட்டதுடன் வெகுவாக மகிழ்ச்சி அடைந்தன.

எளிமையாக நடந்தது

இறுதியாக நிகழ்ச்சிக்கு வந்த அனைவருக்கும் தரமான விருந்து பரிமாறப்பட்டது. இந்த விழா எந்த ஆடம்பரமும் இன்றி, மிக குறைந்த நபர்களுடன் எளிமையாக நடந்து முடிந்தது. வழக்கமாக விஜய் வரும் போது இருக்கும் சிக்கல்களைபார்க்க முடியவில்லை.. யாரும் விஜய்யை பின்தொடர்ந்து இந்த முறை நச்சரிக்கவில்லை...

English summary

Four things that stood out at Vijay's Mahabalipuram Christmas event. What lessons should the AIADMK and DMK learn?