விநாயகர் சதுர்த்தி! ராணிப்பேட்டையில் 14 இடங்களில் பிள்ளையார் சிலைகள் வைக்க அனுமதி!

சென்னை: ராணிப்பேட்டையில் 14 இடங்களில் விநாயகர் சிலை வைக்க அனுமதி வழங்கப்பட்டுள்ளதாக காவல்துறை தரப்பில் சென்னை உயர் நீதிமன்றத்தில் தெரிவிக்கப்பட்டுள்ளது.

விநாயகர் சதுர்த்தியை முன்னிட்டு, ராணிப்பேட்டை மாவட்டத்தில் விநாயகர் வைக்க அனுமதி கோரி, இந்து மக்கள் கட்சியின் வேலூர் மாவட்ட தலைவர் எஸ் கே மோகன் என்பவர் சென்னை உயர் நீதிமன்றத்தில் மனுத்தாக்கல் செய்துள்ளார்.

அதில், ராணிப்பேட்டை மாவட்டத்தில் விநாயகர் சதுர்த்தி விழாவுக்கு உரிய பாதுகாப்பு வழங்க வேண்டும் என்றும், முப்படுவெட்டி ஆர்காடு, கஸ்ப்பா, சன்னியாசி மண்டபம், கலவை ரோடு, நேரு வீதி திருப்பாற்கடல், விவேகானந்தர் அந்திப்பட்டு, அண்ணாநகர் அம்மூர், மேட்டூத்தெரு, உள்ளிட்ட 16 இடங்களில் விநாயகர் சிலைகள் வைக்க அனுமதிக்க வேண்டும் என மனுவில் தெரிவிக்கப்பட்டுள்ளது.

மேலும் வரும் செப்டம்பர் 07 ம் தேதி முதல் 11 ம் தேதி வரை ராணிப்பேட்டையில் விநாயகர் சிலைகளை வைத்து வழிப்பட்டு, செப்டம்பர் 11 ம் தேதி அம்மூர் ஏரியில் விநாயகர்களை கரைக்க , உரிய பாதுகாப்பு ஏற்பாடுகளை மேற்கொள்ள வேண்டும் என மனுவில் கோரிக்கை வைக்கப்பட்டுள்ளது.

இந்த வழக்கு நீதிபதி ஜெயச்சந்திரன் முன் விசாரணைக்கு வந்தது அப்போது இந்து மக்கள் கட்சி தரப்பில், வழக்கறிஞர் வெங்கடேஸ்வரன் ஆஜராகி, விநாயகர் சிலை வைக்க கடந்த ஆகஸ்ட் 13 ம் தேதியே மாவட்ட நிர்வாகத்திற்கும், காவல்துறைக்கும் மனு அளித்தும் இதுவரை எந்த பதிலும் அளிக்கவில்லை என தெரிவித்தார்.

அரசு தரப்பில், அரசு குற்றவியல் வழக்கறிஞர் உதயகுமார் ஆஜராகி, ராணிப்பேட்டையில் 16 இடங்களில் விநாயகர் சிலை வைக்க மனுதாரர் அனுமதி கோரியிருந்தார் அதில் 14 இடங்களுக்கு மட்டுமே அனுமதி வழங்க முடியும் என தெரிவித்தார்.

இதனை ஏற்றுக் கொண்ட நீதிபதி, ராணிப்பேட்டையில் 3 நாட்கள் விநாயகர் சிலை வைப்பது தொடர்பாக, மனுதாரரின் மனுவை பரிசீலித்து உரிய உத்தரவுகளை பிறப்பிக்க அரசுக்கு உத்தரவிட்டு வழக்கினை முடித்து வைத்தார்

English summary

Police says in Chennai Highcourt that permission has been given to instal Ganesha idols at 14 places in Ranipet.