கைவிட்ட கால் டாக்ஸிகள்..சென்னை ஏர்போர்டிற்குள்ளேயே என்ட்ரியான அரசு பேருந்துகள்..அரசு சூப்பர் ஏற்பாடு

சென்னை: நேற்று தொடர் கனமழை காரணமாக சென்னை சர்வதேச விமான நிலையத்திற்கு வரும் பயணிகளுக்கு வாடகை வாகனங்கள் கிடைக்கவில்லை என்ற புகார் எழுந்தது. வாடகை வாகனங்கள் கிடைக்காமல் மக்கள் தொடர்ந்து அவதிப்பட்ட நிலையில், அவ்வழியாக செல்லும் அரசுப் பேருந்துகள் விமானங்களின் வருகை நேரத்திற்கு ஏற்றவாறு விமான நிலையத்திற்கு உள்ளே சென்று பயணிகளை அழைத்துச் செல்ல ஏற்பாடு செய்யப்பட்டது.

சென்னையில் அதிகப்படியான கனமழை விழுந்த காரணத்தால், நேற்று மக்கள் அத்தியாவசிய சேவைகளுக்கு கூட வெளியில் போக முடியாத அளவிற்கு அவதிப்பட்டன. பல சுரங்கப்பாதைகளில் தண்ணீர் தேங்கியது. சாலைகளில் தண்ணீர் பெருக்கெடுத்து ஓடியதால், பல முக்கிய நெடுஞ்சாலைகளில் நெரிசல் அதிகமாக இருந்தது.

இதனால் வாடகை கார் ஓட்டுவோர், ஆட்டோ ஓட்டுபவர்கள் பலர் சேவையை ஏற்கவில்லை. ஓலா, உபேர் போன்ற கால் டாக்ஸி சேவைகளும் நேற்று சென்னையில் பல பகுதிகளில் வேலை செய்யவில்லை. குறிப்பாக சென்னை விமான நிலையம் பகுதிகளில் கால் டாக்ஸி சேவைகளே இல்லை...

கனமழையால் ஆட்டோ, கேப் இல்லாத நிலை ஏற்பட்டது. சென்னைக்கு விமானத்தில் வருவதற்கு முன் மழை பெய்து கொண்டிருப்பதை செய்திகளில் பார்த்த பல பயணிகள் வீடு திரும்ப முடியாத நிலை இருந்தது. விமான நிலையம் வந்த பிறகு வாடகை வாகனங்களை புக் செய்தால் புக்கிங் கேன்சல் ஆகிவிடும் நிலை இருந்தது. அதுமட்டுமல்ல 3 மடங்கு விலை இருந்ததாக கூறப்படுகிறது. இதையடுத்து கனமழை காரணமாக தனியார் வாடகை கார்கள் சவாரி எடுக்க மறுப்பதாக விமான நிலையத்திற்கு வரும் பயணிகள் அரசுக்கு புகார் தெரிவித்தார்கள்.

சென்னை விமான நிலையத்திற்கு வரும் பயணிகளுக்கு வாடகை வாகனங்கள் கிடைக்கவில்லை என்ற புகாருக்கு உடனே நடவடிக்கை எடுத்த அரசு, தாம்பரம் வழித்தடத்தில் செல்லும் அரசுப் பேருந்துகளை விமானங்களின் வருகை நேரத்திற்கு ஏற்றவாறு விமான நிலையத்திற்கு உள்ளே சென்று பயணிகளை அழைத்துச் செல்ல ஏற்பாடு செய்தது. இன்றும் இதே போல் மாநகரப் பேருந்துகள் சென்னை விமான நிலையத்திற்கு இயக்கப்படும் என மாநகர போக்குவரத்து கழகம் அறிவித்துள்ளது. இதனால் பயணிகள் மகிழ்ச்சி அடைந்தனர். விமான பயணிகளுக்கு இந்த பேருந்து சேவை பெரும் உதவியா இருக்கும்.. இது தொடர்ந்தால் இன்னும் நல்லாருக்கும். தமிழக அரசுக்கு நன்றி என பயணிகள் தெரிவித்தனர்.

English summary

Due to continuous heavy rains yesterday, there was a complaint that passengers arriving at Chennai International Airport were not able to get rental vehicles. As people continued to suffer due to non-availability of rental vehicles, plying government buses were arranged to pick up passengers inside the airport as per the arrival time of the flights.