ஆன்லைனில் உணவு, மளிகை பொருட்கள் ஆர்டர் செய்கிறீர்களா? இனி கஷ்டம்.. சர்ரென உயரும் ஜிஎஸ்டி வரி!
சென்னை: இந்தியாவின் முன்னணி மின் வணிக தளங்களான ஸ்விக்கி, ஸொமேட்டோ, பிளிங்கிட் போன்ற நிறுவனங்கள், செப்டம்பர் 22, 2025 முதல், தங்களது டெலிவரி சேவைகளுக்கு 18% சரக்கு மற்றும் சேவை வரி (ஜிஎஸ்டி) செலுத்த வேண்டிய நிலை ஏற்படும். மறுசீரமைக்கப்பட்ட ஜிஎஸ்டி விதிமுறைகளின் கீழ் இந்த மாற்றம் நடைமுறைக்கு வரும்.
மத்திய அரசின் ஜிஎஸ்டி கவுன்சில் செப்டம்பர் 3, 2025 அன்று நடைபெற்ற 56வது கூட்டத்தில் இந்த அறிவிப்பை வெளியிட்டது. இந்தியப் பொருளாதாரத்தில் மேம்படுத்தப்பட்ட ஜிஎஸ்டி கட்டமைப்பின் ஒரு பகுதியாக, மின் வணிக மற்றும் விரைவு வணிக தளங்கள் டெலிவரி கட்டணங்களுக்கு 18% ஜிஎஸ்டி செலுத்த வேண்டும் என்று கவுன்சில் அறிவித்தது.
ஜிஎஸ்டி கட்டணம் மாற்றம்
முன்னதாக, டெலிவரி கட்டணங்களுக்கு வரி விலக்கு அளிக்கப்பட்டிருந்தது. தற்போது புதிய வரி விதிப்பால், இந்த தளங்களைப் பயன்படுத்தும் வாடிக்கையாளர்களுக்குச் செலவு அதிகரிக்கக்கூடும். டெலிவரி கட்டணங்கள் அல்லது பிளாட்ஃபார்ம் கட்டணங்களை நிறுவனங்கள் உயர்த்தினால் இந்த தாக்கம் ஏற்படும்.
புதிய ஜிஎஸ்டி விதிமுறைகளால் ஏற்படும் வருவாய் இழப்புகளை மின் வணிக நிறுவனங்கள் மதிப்பிட்டு வருகின்றன. இழப்புகளைத் தவிர்க்க, இந்த வரி உயர்வின் சுமையை வாடிக்கையாளர்களிடம் கடத்தும் சாத்தியக்கூறுகள் இருப்பதாகப் பல ஊடக அறிக்கைகள் தெரிவிக்கின்றன.
ஜிஎஸ்டி உணவு டெலிவரி
தொழில்துறை வல்லுநர்கள் இந்த ஜிஎஸ்டி விகித தாக்கத்தை ஆராய்ந்து வருகின்றனர். டெலிவரி கட்டணங்கள் இந்த நிறுவனங்களின் முக்கிய செயல்பாடுகளில் ஒரு பகுதியாக இருப்பதால், நிறுவனங்கள் நேரடியாகப் பாதிக்கப்படும். இருப்பினும், சில அறிக்கைகளின்படி, மதிப்பு கூட்டப்பட்ட சேவைகளைப் பயன்படுத்தும் வாடிக்கையாளர்களுக்கு இந்த கட்டண உயர்வு பாதிக்காது, ஏனெனில் அவர்கள் ஏற்கனவே பிரீமியம் அணுகலுக்கு கூடுதல் கட்டணம் செலுத்துகிறார்கள்.
ஒரு உணவு டெலிவரி நிறுவனத்தின் மூத்த நிர்வாகி இந்தியன் எக்ஸ்பிரஸ் செய்தி இணையதளத்திடம், "இந்தச் சுமையை வாடிக்கையாளர்களிடம் கடத்துவதைத் தவிர எங்களுக்கு வேறு வழியில்லை. எனவே, டெலிவரி கட்டணங்கள் அதிகரிக்கலாம் அல்லது டெலிவரி பார்ட்னர்களின் வருமானம் குறையலாம். உணவு விலையும் கூட அதிகரிக்கக்கூடும்" என்று தெரிவித்தார்.
உயருகிறது உணவு டெலிவரி கட்டணம்
நிறுவனங்கள் 18% ஜிஎஸ்டி சுமையை வாடிக்கையாளர்களிடம் கடத்த முடிவு செய்தால், பொருட்களை வீட்டு வாசலில் பெறுவதற்கு மக்கள் அதிக வரி செலுத்த வேண்டியிருக்கும். உதாரணமாக, ₹500 மதிப்புள்ள உணவை ஒரு இந்திய ஆன்லைன் உணவு டெலிவரி தளத்தில் ஒருவர் ஆர்டர் செய்கிறார். அவர் ஏற்கனவே உணவக ஜிஎஸ்டியாக சுமார் ₹88 செலுத்தியிருப்பார். கூடுதலாக, ₹15 பிளாட்ஃபார்ம் கட்டணம், ஜிஎஸ்டி உட்பட, மற்றும் பேக்கிங் கட்டணங்களும் இருக்கும்.
இந்த நிலையில், டெலிவரி சேவைகளுக்கு விதிக்கப்படும் 18% ஜிஎஸ்டி சுமையை நிறுவனங்கள் வாடிக்கையாளர்களிடம் மாற்றினால், ஆன்லைனில் ஆர்டர் செய்பவர்கள் தங்களது வீட்டு வாசலில் பொருட்களைப் பெறுவதற்கு வரிகளின் மூலம் மேலும் அதிக கட்டணம் செலுத்த வேண்டியிருக்கும். ஜிஎஸ்டி கவுன்சிலின் 56வது கூட்டத்தில், 'மின்னணு வணிக ஆபரேட்டர் (ECO) மூலம் உள்ளூர் டெலிவரி சேவைகள்' இப்போது CGST சட்டத்தின் பிரிவு 9(5) இன் கீழ் சேர்க்கப்படும் என்று பரிந்துரைக்கப்பட்டது. முன்னர் இந்தச் சேவைகளுக்கு வரி விலக்கு இருந்தது.
ஸொமேட்டோ, ஸ்விக்கி, பிளிங்கிட், ஜெப்டோ
கவுன்சில் இந்தச் சேவைகளுக்கு 18% ஜிஎஸ்டி விகிதத்தை விதித்தது. இந்த வரியை நிறுவனம் செலுத்த வேண்டும். இது, அதிகரித்த ஜிஎஸ்டி சுமையை நிறுவனம் வாடிக்கையாளர்களுக்குக் கடத்துமா இல்லையா என்பது குறித்த விவாதத்தைத் தூண்டியுள்ளது. சமீபத்திய ஜிஎஸ்டி விதிமுறைகளின்படி, ஸொமேட்டோ, ஸ்விக்கி, பிளிங்கிட், ஜெப்டோ போன்ற நிறுவனங்கள், தங்கள் மின் வணிக தளங்களில் வாடிக்கையாளர்களிடமிருந்து வசூலிக்கும் டெலிவரி கட்டணத்தில் 18% ஜிஎஸ்டி செலுத்த வேண்டும்.
Click it and Unblock the Notifications
Sign in with Google