அடேங்கப்பா.. சென்னையில் அடிதூள் கிளப்பிய மழை! ஆல் ஏரியாலயும் அடிச்சு கலக்கிருச்சு

சென்னை: சென்னையின் பெரும்பாலான பகுதிகளில் இரவு தொடங்கிய மழை தொடர்ந்து வெளுத்து வாங்கியதால் பொதுமக்கள் மகிழ்ச்சியடைந்து இருக்கின்றனர்.

தற்போது கேரளாவில் தென்மேற்கு பருவமழை தொடங்கி உள்ள நிலையில் அதன் தாக்கம் காரணமாக தமிழகத்தில் கடந்த சில வாரங்களாகவே பல்வேறு மாவட்டங்களில் கனமழை பெய்து வருவதால் பொதுமக்கள், விவசாயிகள் மகிழ்ச்சியடைந்துள்ளனர்.

தமிழ்நாடு, புதுவை மற்றும் காரைக்கால் பகுதிகளில் 17 மாவட்டங்களில் இடி மின்னலுடன் கூடிய லேசானது முதல் மிதமான மழைக்கு வாய்ப்பு உள்ளதாகச் சென்னை மண்டல வானிலை ஆய்வு மையம் தெரிவித்து இருந்தது.

வானிலை மையம் எச்சரிக்கை

இது தொடர்பாக வெளியிடப்பட்டுள்ள அறிக்கையில், வளிமண்டல கீழடுக்கு சுழற்சி காரணமாக தமிழ்நாடு, புதுவை மற்றும் காரைக்கால் பகுதிகளில் அநேக இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். மேற்கு மற்றும் வட மாவட்டங்களில் ஓரிரு இடங்களில் கனமழை பெய்ய வாய்ப்புள்ளதாக அறிவித்தது.

தென் மாவட்டங்கள்

இன்று மற்றும் நாளை மறுநாள் தமிழ்நாடு, புதுவை மற்றும் காரைக்கால் பகுதிகளில் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். 22, 23 ஆகிய தேதிகளில் வடதமிழகம், கன்னியாகுமரி, திருநெல்வேலி, தென்காசி, தேனி, திண்டுக்கல் மாவட்டங்கள், புதுச்சேரி மற்றும் காரைக்கால் பகுதிகளில் ஓரிரு இடங்களில் லேசானது முதல் மிதமான மழை பெய்யக் கூடும் என கணித்தது.

சென்னையில் கனமழை

சென்னையை பொறுத்தவரை அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும் என்றும், நகரின் ஒருசில பகுதிகளில் இடி மின்னலுடன் கூடிய லேசான அல்லது மிதமான மழை பெய்யக்கூடும் என்று தெரிவித்திருந்தது. இந்த நிலையில், நேற்று இரவு பலத்த காற்றுடன் மாநகரின் முக்கிய பகுதிகளில் கனமழை கொட்டித் தீர்த்தது. கடுமையான காற்று வீசியதால் சாலையில் இருந்த பேரிகாடுகள் சாய்ந்தன.

எல்லா ஏரியாக்களிலும் மழை வாசம்

சென்னை பிரதான பகுதிகளான சேத்துப்பட்டு, சூளைமேடு, நெல்சன் மாணிக்கம் சாலை, நுங்கம்பாக்கம், டிடிகே சாலை, மதுரவாயல், கோயம்பேடு, அம்பத்தூர், அமைந்தகரை, வள்ளுவர் கோட்டம், தேனாம்பேட்டை, ஆழ்வார்பேட்டை வளசரவாக்கம், கோடம்பாக்கம், தியாகராய நகர், மாம்பலம், போரூர், கிண்டி உள்ளிட்ட பகுதிகளில் இடி மின்னலுடன் நல்ல மழை பெய்தது.

English summary

Heavy rain in Chennai and outer areas with speedy air: சென்னையின் பெரும்பாலான பகுதிகளில் இரவு தொடங்கிய மழை தொடர்ந்து வெளுத்து வாங்கியதால் பொதுமக்கள் மகிழ்ச்சியடைந்து இருக்கின்றனர்.