உங்க வீட்ல கியூட்டான குட்டி பேபி இருக்கா.. குழந்தைக்கு ஆதார் கார்டு விண்ணப்பிப்பது எப்படி? ரொம்ப ஈசி
சென்னை: இந்தியாவில் தவிர்க்க முடியாத ஆவணமாக மாறி இருக்கும் ஆதார் அட்டையை குழந்தைகளுக்காக விண்ணப்பிக்க முடியுமா என்பது பலரது சந்தேகமாக உள்ளது. எப்படி விண்ணப்பிப்பது என்று பார்ப்போம்.
குழந்தைகளை பள்ளியில் சேர்க்கவும் மற்றும் குடும்ப அட்டையில் குழந்தை பெயரை சேர்க்கவும் ஆதார் அட்டை அவசியமான ஒன்றாக இருக்கிறது. இதை எப்படி விண்ணப்பது என்று தெரியாமல் பலர் ஏஜெண்டுகளில் கொடுத்து சில நூறு, ஆயிரங்களை செலவு செய்கிறார்கள். ஆனால், இது ஒன்றும் அவ்வளவு கடினமான காரியம் இல்லை. எப்படி குழந்தைகளுக்கான ஆதாரை விண்ணப்பிப்பது என்று இனி பார்ப்போம்.
உங்கள் குழந்தையின் பிறப்பு சான்றிதழ் நகலை எடுத்துக்கொண்டு உங்கள் வீட்டுக்கு அருகிலுள்ள ஆதார் பதிவு மையம் அல்லது தாலுகா அலுவலகத்திற்குச் செல்லுங்கள். அங்கு வழங்கப்படும் ஆதார் பதிவு படிவத்தைப் பூர்த்தி செய்திடுங்கள். 5 வயதிற்கு உட்பட்ட குழந்தையாக இருந்தால், நீங்கள் தாய் அல்லது தந்தையின் ஆதார் விபரங்களையும் அந்த படிவத்தில் கண்டிப்பாக நிரப்ப வேண்டும். பின்னர், ஆதார் பதிவு மையத்தில் உங்களது குழந்தையின் புகைப்படத்தை எடுப்பார்கள்.
இதனை அடுத்து குழந்தையின் பிறப்புச் சான்றிதழின் நகல் அல்லது மருத்துவமனையில் கொடுக்கப்பட்டு உள்ள விடுவிப்பு (டிஸ்சார்ஜ்) சான்றிதழை ஸ்கேன் செய்வார்கள். இந்த ஆதார் பதிவின்போது பெரியவர்களுக்கு எடுப்பது போன்று குழந்தைகளின் கைரேகைகள் மற்றும் விழித்திரையை ஸ்கேன் செய்ய மாட்டார்கள். அதற்கு மாற்றாகவே பெற்றோர்களில் தாய் அல்லது தந்தையின் வாக்காளர் அடையாள அட்டை, ஓட்டுநர் உரிமம் அல்லது பாஸ்போர்ட் போன்ற சரியான அடையாள ஆவணத்தைக் காட்டி கைரேகை எடுத்துக்கொள்வார்கள்.
அதன் பின்னர் ஆதார் நிர்வாகி பதிவு எண் கொண்ட ஒப்புகை சீட்டு ஒன்றை உங்களிடம் வழங்குவார்கள். இப்படி புதிய ஆதார் விண்ணப்பிக்கும் பணி எளிதாக நிறைவு பெறும். இதனை தொடர்ந்து நீங்கள் ஆதாரின் அதிகாரப்பூர்வ UIDAI இணைய தளத்தில் இருந்து உங்களது குழந்தையின் ஆதார் அட்டையின் டிஜிட்டல் நகலை சில நாட்கள் கழித்து பதிவிறக்கம் செய்து பயன்படுத்தலாம். அதேபோல் உங்கள் வீட்டு முகவரிக்கே புதிய ஆதார் அட்டையும் அஞ்சல் மூலமாக வந்துவிடும்.
Click it and Unblock the Notifications
Sign in with Google