ஹண்டா வைரஸ் காற்றால் பரவுமா? எப்படி உங்களை தற்காத்துக்கொள்வது! நிபுணர்கள் கூறும் ஆலோசனைகள்!
சென்னை: கடந்த சில வாரங்களாக சர்வதேச ஊடகங்களில் அதிகம் விவாதிக்கப்படும் ஒரு பெயராக 'ஹண்டா வைரஸ்' மாறியுள்ளது. குறிப்பாக, 2026 மே மாத தொடக்கத்தில் தெற்கு அட்லாண்டிக் பகுதியில் பயணித்த ஒரு உல்லாசக் கப்பலில் (MV Hondius) ஏற்பட்ட வைரஸ் பாதிப்பு, உலக நாடுகளை மீண்டும் ஒருமுறை சுகாதார எச்சரிக்கை நிலைக்குத் தள்ளியுள்ளது. இந்த வைரஸ் காற்றால் பரவுமா? மனிதர்களிடம் இருந்து மற்றவர்களுக்குப் பரவுமா? என்ற கேள்விகள் மக்களிடையே எழுந்துள்ளன
இது காற்றால் பரவும் வைரஸா?
ஆம், ஹண்டா வைரஸ் முதன்மையாக காற்று மூலமாகவே மனிதர்களுக்குப் பரவுகிறது. ஆனால், இது கொரோனா வைரஸ் போல ஒரு மனிதன் தும்மும்போதோ அல்லது இருமும்போதோ பரவுவதைக் காட்டிலும் சற்று மாறுபட்டது.
தூசி வழியாகப் பரவல்: எலிகளின் காய்ந்த சிறுநீர், எச்சில் மற்றும் மலம் கலந்த தூசியை மனிதர்கள் சுவாசிக்கும்போது இந்த வைரஸ் நுரையீரலுக்குள் நுழைகிறது. உதாரணமாக, நீண்ட நாட்களாக அடைக்கப்பட்ட பழைய அறைகள் அல்லது கிடங்குகளைச் சுத்தம் செய்யும்போது, அங்குள்ள எலிக் கழிவுகள் காற்றில் கலக்கின்றன. இந்த அசுத்தமான காற்றைச் சுவாசிப்பதாலேயே 90 சதவீதத் தொற்றுகள் ஏற்படுகின்றன.
மனிதர்களிடம் இருந்து பரவுமா? வழக்கமான ஹண்டா வைரஸ்கள் மனிதர்களிடம் இருந்து மனிதர்களுக்குப் பரவாது. இருப்பினும், தற்போதைய கப்பல் பாதிப்பில் கண்டறியப்பட்ட 'ஆண்டீஸ் வைரஸ்' (Andes virus) எனும் வகை, மிக நெருக்கமான தொடர்பில் இருப்பவர்களிடையே (உதாரணமாக ஒரே அறையில் தங்குபவர்கள்) பரவ வாய்ப்புள்ளதாக உலக சுகாதார நிறுவனம் எச்சரித்துள்ளது.
எந்தெந்த நாடுகள் கண்காணிப்பில் உள்ளன?
மே 2026 நிலவரப்படி, சுமார் 12 நாடுகள் இந்த வைரஸ் பாதிப்பு குறித்த தீவிர கண்காணிப்பில் உள்ளன. அர்ஜென்டினா மற்றும் சிலியில் இருந்து தொடங்கிய இந்தப் பாதிப்பு, தற்போது நெதர்லாந்து, ஜெர்மனி, சுவிட்சர்லாந்து, தென்னாப்பிரிக்கா மற்றும் ஸ்பெயின் உள்ளிட்ட நாடுகளுக்குப் பயணம் செய்த பயணிகள் மூலம் கண்டறியப்பட்டுள்ளது. இதுவரை 8 பேர் பாதிக்கப்பட்டுள்ள நிலையில், 3 பேர் உயிரிழந்துள்ளனர்
பொதுமக்கள் தற்காத்துக்கொள்ள வேண்டிய முறைகள்
ஹண்டா வைரஸ் பாதிப்பில் இருந்து தப்பிக்க மருத்துவர்கள் வழங்கும் முக்கிய ஆலோசனைகள் இதோ:
சுத்தம் செய்யும் போது கவனம்: பழைய அறைகள் அல்லது பரண் பகுதிகளைச் சுத்தம் செய்யும்போது முகக்கவசம் (N95 Mask) அணிவது கட்டாயம். எலிக் கழிவுகள் இருக்கும் இடத்தைச் சுத்தப்படுத்தும்போது நேரடியாகப் பெருக்கக்கூடாது. முதலில் அந்த இடத்தைக் கிருமிநாசினி (Bleach solution) தெளித்து ஈரமாக்க வேண்டும். இதனால் வைரஸ் துகள்கள் காற்றில் பறப்பதைத் தவிர்க்கலாம்.
எலிகளைக் கட்டுப்படுத்துதல்: வீட்டின் மூலைகளில் துளைகள் இருந்தால் அவற்றை உடனடியாக அடைக்க வேண்டும். எலிகள் வீட்டிற்குள் நுழையாதவாறு பார்த்துக்கொள்வதே முதல் தற்காப்பு.
ஹண்டா வைரஸ் என்பது கொரோனா போன்ற உலகளாவிய பெருந்தொற்றாக மாற வாய்ப்பு குறைவு என்று உலக சுகாதார நிறுவனம் (WHO) ஆறுதல் கூறியுள்ளது. இருப்பினும், இதன் இறப்பு விகிதம் மிக அதிகம் என்பதால், அலட்சியமாக இருக்கக்கூடாது. குறிப்பாகத் தூய்மைப் பணிகளின் போது முகக்கவசம் அணிவதும், எலிகள் இல்லாத சூழலை உருவாக்குவதுமே நம்மைப் பாதுகாக்கும் சிறந்த கேடயங்கள்.
உணவுப் பாதுகாப்பு: சமையலறை மற்றும் சேமிப்புக் கிடங்குகளில் உணவுகளை இறுக்கமான பாத்திரங்களில் அடைத்து வைக்க வேண்டும். எலிகள் தீண்டிய உணவை எக்காரணம் கொண்டும் உட்கொள்ளக்கூடாது.
சுற்றுலாப் பயணிகள் கவனிப்பிற்கு: வனப்பகுதிகளுக்கோ அல்லது தெற்கு அமெரிக்க நாடுகளுக்கோ சுற்றுலா செல்பவர்கள், அங்குள்ள விலங்குகளிடம் இருந்தும், எலிகள் நடமாட்டம் உள்ள முகாம்களில் இருந்தும் விலகி இருக்க வேண்டும்.
அறிகுறிகளைக் கவனியுங்கள்: கடுமையான காய்ச்சல், தசை வலி மற்றும் மூச்சுத் திணறல் போன்ற அறிகுறிகள் தென்பட்டால் தாமதிக்காமல் மருத்துவரை அணுக வேண்டும்.
Click it and Unblock the Notifications
Sign in with Google