இந்தியாவில் முதன்முறை.. கட்டிடத்திற்குள் புகுந்து செல்லும் மெட்ரோ.. சென்னையில் நடக்கும் அதிசயம்!

Updated: Wednesday, June 17, 2026, 18:27 [IST]

Subscribe to Oneindia Tamil

சென்னை: சென்னை மெட்ரோ இரண்டாம் கட்ட பணிகள் தீவிரமாக நடந்து வருகின்றன. இதில் பல மெட்ரோ ஸ்டேஷன்களில் புதிய மாற்றங்களும் செய்யப்பட்டு வருகின்றன. அதன்படி திருமங்கலம் மெட்ரோவில் முக்கியமான சில மாற்றங்கள் நடக்க உள்ளன.

ஜப்பானின் புகழ்பெற்ற கோகுரா ஸ்டேஷன் அல்லது சீனாவின் சோங்கிங் (Chongqing) நகரக் காட்சிகளைப் போல, இனி நம்ம சென்னையிலும் ஒரு பிரம்மாண்டமான உலகத்தரம் வாய்ந்த கட்டடக் கலை அதிசயம் நிகழப்போகிறது. திருமங்கலம் பகுதியில் அமையவிருக்கும் புதிய கமர்ஷியல் காம்ப்ளக்ஸ், இந்தியாவின் முதல் 'பில்டிங்கிற்குள் ரயில் ஓடும்' அதிநவீன திட்டமாக உருவெடுக்கிறது.

இந்த பிரம்மாண்ட ஒருங்கிணைந்த வணிக வளாகத்தை மிகக் குறைந்த தொகையைக் குறிப்பிட்டு (Lowest Bidder - L1), கட்டுமானத்திற்கான டெண்டரை 'கபாசிட்டி இன்ஃப்ரா' (Capacite Infra) நிறுவனம் கைப்பற்றியுள்ளது. இதற்கான டெண்டர் பணிகளை சென்னை மெட்ரோ ரயில் நிறுவனம் (CMRL) அதிகாரப்பூர்வமாகத் தொடங்கி, தற்போது இறுதி கட்டத்தை எட்டியுள்ளது.

திட்டத்தின் சிறப்பம்சங்கள் என்னென்ன?

அண்ணா நகர் மேற்கு டெப்போவிற்கு எதிரே, சுமார் 3.85 ஏக்கர் பரப்பளவில் இந்த மெகா புராஜெக்ட் அமையவுள்ளது. இதன் ஆகச்சிறந்த ஹைலைட்டே, அமையவிருக்கும் பிரம்மாண்டமான கட்டிடத்தின் 4, 5 மற்றும் 6-வது தளங்கள் வழியாக சென்னை மெட்ரோ ரயில்கள் சீறிப்பாயப் போவதுதான்!

மொத்தம் 4 டவர்கள் (Towers) கொண்டதாக இந்த வளாகம் வடிவமைக்கப்பட்டுள்ளது:

டவர் A மற்றும் C: இதில் ஒன்பது தளங்கள் (9 Floors) கொண்ட பிரம்மாண்ட கார்ப்பரேட் அலுவலகங்கள் அமையும்.

டவர் B (ரயில் நிலையம்): இந்த டவரில்தான் மெட்ரோ ரயில் நிலையம் அமையவிருக்கிறது. தரைதளம் முதல் 9 மாடிகள் கொண்ட இந்தக் கட்டிடத்தின் இடைப்பகுதியில் (4 முதல் 6-வது தளங்களில்) ரயில்கள் வந்து செல்லும்.

பார்க்கிங் வசதி: அண்ணா நகர் மற்றும் திருமங்கலம் பகுதியின் வாகன நெரிசலைத் தவிர்க்க, 3 அடுக்கு நிலத்தடி வாகன நிறுத்துமிடங்கள் (3-Level Basement Parking) மிக நேர்த்தியாகத் திட்டமிடப்பட்டுள்ளன.

ஷாப்பிங், ஆபீஸ், அப்படியே மெட்ரோ!

சுமார் 6.85 லட்சம் சதுர அடி பரப்பளவில் உருவாகும் இந்த வளாகத்தில், ரீடெய்ல் கடைகள், சர்வதேச உணவகங்கள் மற்றும் கார்ப்பரேட் ஆபிஸ்கள் என அனைத்தும் ஒரே கூரையின் கீழ் வரப்போகின்றன. ஒரு தளத்தில் ஷாப்பிங் செய்துவிட்டு அல்லது அலுவலக வேலையை முடித்துவிட்டு, லிப்ட் மூலமாக அடுத்த தளத்திற்குச் சென்று நேரடியாக ரயிலைப் பிடிக்கும் வசதி சென்னைவாசிகளுக்கு முற்றிலும் ஒரு புதுமையான, அதிநவீன சர்வதேச அனுபவமாக இருக்கும்.

"இந்தத் திட்டத்திற்கான வயடக்ட் (Viaduct) பணிகள் ஏற்கனவே விறுவிறுப்பாக நடைபெற்று வருகின்றன. கபாசிட்டி இன்ஃப்ரா நிறுவனம் கட்டுமானப் பொறுப்பை ஏற்றுக்கொண்டுள்ள நிலையில், இன்னும் ஓரிரு மாதங்களில் நான்கு டவர்களுக்கான கட்டுமானப் பணிகள் முழுவீச்சில் தொடங்கும்" என மெட்ரோ அதிகாரிகள் உற்சாகத்துடன் தெரிவிக்கின்றனர். இது சாதாரண ரயில் நிலையமாக இல்லாமல், சென்னையின் மிக முக்கிய 'மல்டி-பர்ப்பஸ்' லேண்ட்மார்க்காக மாறும் என்பதில் சந்தேகமில்லை.

சென்னை மெட்ரோவின் தற்போதைய நிலை மற்றும் விரிவாக்கம்:

1. தற்போது பயன்பாட்டில் உள்ளவை (கட்டம் 1 & விரிவாக்கம்)

சென்னையில் தற்போது 54 கி.மீ தொலைவிற்கு மெட்ரோ ரயில்கள் வெற்றிகரமாக இயக்கப்பட்டு வருகின்றன. இதில் விம்கோ நகர் முதல் சென்னை விமான நிலையம் வரையிலான நீல நிற வழித்தடமும், சென்னை சென்ட்ரல் முதல் புனித தோமையார் மலை வரையிலான பச்சை நிற வழித்தடமும் அடங்கும். கடந்த பிப்ரவரி மாதத்தில் மட்டும் சுமார் 96.40 லட்சம் பயணிகள் இதில் பயணித்துள்ளனர்.

2. கட்டுமானத்தில் உள்ளவை (கட்டம் 2 - Phase II)

இரண்டாம் கட்டத்தில் மொத்தம் 118.9 கி.மீ தொலைவிற்கு பணிகள் மூன்று முக்கிய வழித்தடங்களில் (வழித்தடம் 3: மாதவரம் - சிறுசேரி, வழித்தடம் 4: கலங்கரை விளக்கம் - பூந்தமல்லி, வழித்தடம் 5: மாதவரம் - சோழிங்கநல்லூர்) தீவிரமாக நடந்து வருகின்றன. இதில் பூந்தமல்லி - போரூர் இடையேயான 9 கி.மீ வழித்தடம் முதலில் மக்கள் பயன்பாட்டிற்கு வரவுள்ளது. சுமார் 40 கி.மீ தொலைவிற்கான உயர்மட்டப் பாதை பணிகள் 2027 மார்ச் மாதத்திற்குள்ளும், முழுமையான 118 கி.மீ வலையமைப்பும் 2028-க்குள் பயன்பாட்டிற்கு வரும் என எதிர்பார்க்கப்படுகிறது.

3. அடுத்தகட்ட விரிவாக்கத் திட்டங்கள் (DPR நிலை)

நகரின் மற்ற பகுதிகளையும் இணைக்க விரிவான திட்ட அறிக்கைகள் (DPR) தயாராக உள்ளன. விமான நிலையம் - கிளாம்பாக்கம் (15.3 கி.மீ), பூந்தமல்லி - பரந்தூர் புதிய விமான நிலையம் (43.6 கி.மீ) மற்றும் கோயம்பேடு - பட்டாபிராம் (21.7 கி.மீ) ஆகிய புதிய வழித்தடங்கள் அடுத்தடுத்த கட்டங்களாகச் சென்னை மெட்ரோவின் முகவரியை மாற்றியமைக்கவுள்ளன.