14 வருட உழைப்பு ஒரே இரவில் சாம்பல்! கத்தாரில் அடித்தால் டெல்லியில் வலிக்கும்! ரியல் பிரச்சனை ஆரம்பம்

சென்னை: கடந்த சில தினங்களாக பாரசீக வளைகுடாவில் அரங்கேறி வரும் காட்சிகள் உலகையே உலுக்கியுள்ளன. கத்தாரின் 'ராஸ் லாஃபான்' (Ras Laffan) தொழில் நகர் மீது ஈரான் நடத்திய ஏவுகணைத் தாக்குதல், வெறும் ஒரு நாட்டின் மீதான தாக்குதல் அல்ல; அது ஒட்டுமொத்த உலகப் பொருளாதாரத்தின் வாழ்வாதாரத்தின் மீது நடத்தப்பட்ட தாக்குதல்.

சுமார் 14 ஆண்டுகால கடும் உழைப்பால் கட்டியெழுப்பப்பட்ட உலகின் அதிநவீன 'கேஸ்-டு-லிக்விட்' (Gas-to-Liquid) மற்றும் எல்.என்.ஜி (LNG) ஆலைகள், இன்று தீப்பிழம்புகளுக்கு நடுவே சிதைந்து கிடக்கின்றன. இந்தப் பாதிப்பு என்பது சில நாட்களில் சரி செய்யக்கூடியதல்ல; இது இந்தியாவின் எரிசக்தி பாதுகாப்பிற்கு விடப்பட்டுள்ள நீண்ட கால அச்சுறுத்தல்.

சாம்பலான 14 ஆண்டு கனவு: மீளுமா ராஸ் லாஃபான்?

கத்தாரின் ராஸ் லாஃபான் என்பது ஒரு சாதாரண தொழிற்சாலை வளாகம் அல்ல. இது 14 ஆண்டுகள் நுணுக்கமான பொறியியல் தொழில்நுட்பத்தால் செதுக்கப்பட்ட ஒரு அதிசயம். உலகின் மிகப்பெரிய இயற்கை எரிவாயு சுத்திகரிப்பு முனையமான இங்கே, ஈரானின் ஏவுகணைகள் துல்லியமாகத் தாக்கியதில் பல முக்கியப் பகுதிகள் 'எக்ஸ்டென்சிவ் டேமேஜ்' எனப்படும் பெரும் சேதத்தைச் சந்தித்துள்ளன. குறிப்பாக, இங்குள்ள 'ஏர் செப்பரேஷன் யூனிட்டுகள்' (ASU) மற்றும் பிரம்மாண்டமான 'எல்.என்.ஜி ட்ரெயின்கள்' செயலிழந்துள்ளன. தொழில்நுட்ப வல்லுநர்களின் கூற்றுப்படி, இந்த நவீன கட்டமைப்புகளை மீண்டும் பழைய நிலைக்குக் கொண்டுவர மாதங்கள் போதாது, பல ஆண்டுகள் ஆகலாம். "ஹார்முஸ் நீர்ச்சந்தி திறக்கப்பட்டாலும், ஏற்றுமதி செய்ய எரிவாயு ஆலைகள் இயங்க வேண்டாமா?" என்ற கேள்விதான் இப்போது உலக நாடுகளைத் தூக்கமில்லாமல் செய்கிறது.

இந்தியச் சமையலறைகளில் எரியப்போகும் 'விலையேற்றத்' தீ!

இந்தியாவின் திரவ இயற்கை எரிவாயு (LNG) தேவையில் சுமார் 40 சதவீதத்தை கத்தார் மட்டுமே பூர்த்தி செய்கிறது. பெட்ரோநெட் எல்.என்.ஜி (Petronet LNG) நிறுவனம் கத்தாருடன் நீண்டகால ஒப்பந்தங்களை வைத்துள்ளது. தற்போது கத்தார் தனது உற்பத்தியை நிறுத்தி 'ஃபோர்ஸ் மெஜூர்' (Force Majeure) எனப்படும் தவிர்க்க முடியாத சூழலை அறிவித்துள்ளதால், இந்தியாவுக்கு வர வேண்டிய கப்பல்கள் நிறுத்தப்பட்டுள்ளன.

எல்.பி.ஜி தட்டுப்பாடு: இந்திய வீடுகளில் பயன்படுத்தப்படும் 31 மில்லியன் டன் எல்.பி.ஜி-யில் பெரும் பகுதி இறக்குமதி மூலமே கிடைக்கிறது. கத்தார் ஆலைகளின் முடக்கம், வரும் மாதங்களில் காஸ் சிலிண்டர் விநியோகத்தில் பெரும் தட்டுப்பாட்டை உருவாக்கும்.

விலை உயர்வு: சர்வதேசச் சந்தையில் எரிவாயு விலை ஏற்கனவே இருமடங்காக உயர்ந்துள்ளது. இது சி.என்.ஜி வாகனங்கள், மின்சார உற்பத்தி மற்றும் உரத் தொழிற்சாலைகளை நேரடியாகப் பாதிக்கும். இறுதியில் இது சாமானிய மக்களின் உணவுப் பொருட்களின் விலையில்தான் வந்து முடியும்.

$300 டாலர் கச்சா எண்ணெய்: காத்திருக்கிறதா ஒரு பெரும் நெருக்கடி?

"எண்ணெய் சந்தையில் முதலீடு செய்யாதவர்கள் பெரும் ஆபத்தை எதிர்கொள்கிறார்கள்" என நிபுணர்கள் எச்சரிப்பது சும்மா அல்ல. கச்சா எண்ணெய் விலை பேரலுக்கு 111 டாலரைத் தாண்டிச் சென்று கொண்டிருக்கும் வேளையில், இந்த போர் பதற்றம் நீடித்தால் அது 300 டாலரைக்கூட எட்டக்கூடும் என அஞ்சப்படுகிறது. கத்தாரின் எரிவாயு ஆலைகள் மீண்டும் முழுத்திறனுடன் இயங்க பல ஆண்டுகள் ஆகும் என்பதால், தற்காலிகமாக ஹார்முஸ் நீர்ச்சந்தி திறக்கப்பட்டாலும் இந்தியா போன்ற நாடுகளுக்கு 'சப்ளை' கிடைப்பதில் கடும் போட்டி நிலவும். இந்தியாவின் சி.என்.ஜி விலையேற்றம் முதல் பங்குச்சந்தையின் வீழ்ச்சி வரை இதன் தாக்கம் நீண்ட காலத்திற்குத் தொடரும்.

எரிசக்தி உலகில் ஏற்பட்டுள்ள இந்தத் திடீர் வெற்றிடம், இந்தியாவைத் தனது எரிசக்தி கொள்கையை மறுபரிசீலனை செய்யத் தூண்டியுள்ளது. ரஷ்யா அல்லது வெனிசுலா போன்ற மாற்று நாடுகளை இந்தியா நாடினாலும், கத்தாரின் ராஸ் லாஃபான் தந்த அந்த 'உறுதி' இனி சில ஆண்டுகளுக்குக் கேள்விக்குறிதான்!

English summary

Iran attack on Qatar oil facilities will damage Indian LPG market heavily