Kamal Haasan: தமிழ்நாடு அரசின் புதிய கல்விக்கொள்கை.. மகிழ்ச்சியளிக்கிறது! கமல்ஹாசன் பாராட்டு
சென்னை: மத்திய அரசின் புதிய கல்விக்கொள்கைக்கு மாற்றாக, தமிழ்நாடு அரசு மாநில கல்விக்கொள்கையை நேற்று அறிமுகப்படுத்தியிருந்தது. இந்நிலையில் இந்த கல்விக்கொள்கைக்கு மக்கள் நீதி மய்யம் கட்சியின் தலைவரும், மாநிலங்களவை எம்பியுமான கமல்ஹாசன் பாராட்டு தெரிவித்திருக்கிறார்.
தமிழ்நாடு அரசின் புதிய கல்விக்கொள்கை உருவாக்கப்பட்டிருப்பது மகிழ்ச்சியளிக்கிறது என்று தெரிவித்துள்ள கமல்ஹாசன், இருமொழிக்கொள்கை நீடிக்கும் என அறிவித்திருப்பது மகிழ்ச்சி எனவும் கூறியுள்ளார்.
இது குறித்து தனது x பக்கத்தில் கமல்ஹாசன் கூறியிருப்பதாவது, வசதி படைத்தவர்களுக்குக் கிடைப்பதை விட தரமான கல்வி எளிய பின்புலத்தைச் சேர்ந்த மாணவர்களுக்குக் கிடைக்க வேண்டுமெனும் நல்லெண்ணத்துடனும், மாறிவரும் உலகின் புதிய சவால்களை எதிர்கொள்ளத் தேவையான திறன்களுடன் நமது மாணவர்களை உருவாக்க வேண்டும் எனும் தொலைநோக்குப் பார்வையுடனும் தமிழ்நாடு அரசின் புதிய கல்விக்கொள்கை உருவாக்கப்பட்டிருப்பது மகிழ்ச்சியளிக்கிறது.
பல்வேறு சிறப்பம்சங்களுடன் உருவாகியுள்ள இந்தக் கல்விக்கொள்கை, சமத்துவத்தையும் சமூகநீதியையும் சேர்த்தே போதிக்கிறது. குறிப்பாக மாணவர்களை அச்சத்திலேயே ஆழ்த்தி வைக்கும் தேவையற்ற பொதுத்தேர்வுகள் நீக்கப்பட்டிருப்பதும், அநீதியான நுழைவுத்தேர்வுகளுக்கு எதிரான அம்சங்கள் இடம்பிடித்திருப்பதும், இருமொழிக்கொள்கையே தொடரும் என அறிவிக்கப்பட்டிருப்பதும் பாராட்டுக்குரியவை.
'அனைவருக்கும் தரமான கல்வி' எனும் இலக்கோடு செயலாற்றி வரும் மாண்புமிகு தமிழ்நாடு முதல்வர் திரு. மு.க. ஸ்டாலின் அவர்களையும், மாண்புமிகு பள்ளிக்கல்வித்துறை அமைச்சர் திரு. அன்பில் மகேஸ் பொய்யாமொழி அவர்களையும், தமிழ்நாடு மாநிலக் கல்விக் கொள்கையை வடிவமைத்த டெல்லி உயர் நீதிமன்ற முன்னாள் தலைமை நீதிபதி த.முருகேசன் அவர்கள் தலைமையிலான குழுவினரையும் மனமாரப் பாராட்டுகிறேன்” என கூறியுள்ளார்.
Click it and Unblock the Notifications
Sign in with Google