ராமதாஸ் தரப்புக்கு பெரிய அடி.. மாம்பழம் சின்னத்தை முடக்கக்கோரிய மனுவை தள்ளுபடி செய்தது ஐகோர்ட்!

சென்னை: மாம்பழம் சின்னத்தை முடக்கக்கோரி ராமதாஸ் தாக்கல் செய்த மனுவை தள்ளுபடி செய்து சென்னை உயர்நீதிமன்றம் உத்தரவு பிறப்பித்துள்ளது. இறுதி வேட்பாளர் பட்டியல் வெளியிடப்பட்டு சின்னங்கள் ஒதுக்கப்பட்ட நிலையில் இந்த வழக்கு ஏற்புடையது அல்ல என உயர்நீதிமன்றத்தில் தேர்தல் ஆணையம் வாதம் வைத்தது.

பாமகவில் ராமதாஸ் மற்றும் அவரது மகன் அன்புமணி இடையே மோதல் தொடர்ந்து வருகிறது. தொடர்ந்து உட்கட்சி பிரச்சனை தொடர்பாக நிலுவையில் உள்ள உரிமையியல் வழக்கு முடியும் வரை மாம்பழம் சின்னத்தை முடக்கி வைக்க வேண்டும் என ராமதாஸ் தரப்பில் தாக்கல் செய்யப்பட்ட மனுவை, சென்னை உரிமையியல் நீதிமன்றம் கடந்த மார்ச் 26 ஆம் தேதி தள்ளுபடி செய்தது.

இதை எதிர்த்து ராமதாஸ் உச்ச நீதிமன்றத்தை நாடினார். இது தொடர்பாக சென்னை ஐகோர்ட்டை நாடும்படி ராமதாசுக்கு உச்சநீதிமன்றம் உத்தரவிட்டது. சென்னை ஐகோர்ட்டிலும் ராமதாஸ் வழக்கு தொடர்ந்தார். இந்த வழக்கை விசாரணைக்கு எடுக்கும்படி ராமதாஸ் தரப்பில் முறையிட்டனர். மனுவாக தாக்கல் செய்தால் விசாரிக்கப்படும் என நீதிபதிகள் தெரிவித்தனர். பிறகு அவசர வழக்காக விசாரிக்கும்படி விடுத்த கோரிக்கையையும் ஏற்க சென்னை ஐகோர்ட் மறுத்துவிட்டது.

இந்நிலையில் இந்த வழக்கு சென்னை ஐகோர்ட்டில் இன்று விசாரணைக்கு வந்தது. அப்போது தேர்தல் கமிஷன் சார்பில் ஆஜரான வழக்கறிஞர், வரும் சட்டசபை தேர்தலுக்கு வேட்பாளர்கள் இறுதி செய்யப்பட்டு சின்னங்கள் ஒதுக்கீடு செய்யப்பட்டுவிட்டதால், மனு செல்லதக்கது அல்ல என வாதிடப்பட்டது.

அன்புமணி தரப்பில் ஆஜரான வழக்கறிஞர், "ராமதாஸ் தரப்பு வேட்பாளர்களுக்கு சிலிண்டர் சின்னம் ஒதுக்கப்பட்டு அவர்களும் ஏற்றுக் கொண்டு விட்டனர். தந்தைக்கு எதிராக செயல்படவில்ல" என விளக்கம் அளித்தார். பாமக பொதுச் செயலாளர் வடிவேல் ராவணன் தரப்பில் அளித்த விளக்கத்தில், "ராமதாஸ் பொதுக்குழுவை கூட்டாமல் தனக்கு தானே தலைவராக அறிவித்துக் கொண்டார்" என தெரிவிக்கப்பட்டது.

ராமதாஸ் தரப்பில், "ஏற்கனவே நிர்வாக குழு கூடி ராமதாஸ் தலைவராக தேர்வு செய்யப்பட்டார். தேர்தல் ஆணையத்திடம் அளித்த மனு பரிசீலனை செய்யப்படாததால் தான் வழக்கு தொடரப்பட்டது." எனக் கூறப்பட்டது.
அதன் பிறகு, மாம்பழம் சின்னத்தை முடக்கக்கோரிய ராமதாஸ் மனுவை சென்னை ஐகோர்ட் தள்ளுபடி செய்து உத்தரவிட்டுள்ளது.

English summary

Madras High Court has issued an order dismissing the petition filed by Ramadoss seeking to freeze the Mango symbol. The Election Commission argued before the High Court that the case was not maintainable, given that the final list of candidates had already been published and symbols had been allotted.