சென்னை, காஞ்சீபுரம், செங்கல்பட்டு, திருவள்ளூர் ரேஷன் கடைகளில் நடக்கும் மேஜர் மாற்றம்.. அரசு உத்தரவு

சென்னை: சென்னை, காஞ்சீபுரம், செங்கல்பட்டு, திருவள்ளூர் மண்டலங்களில் இயங்கி வரும் 340 ரேஷன் கடைகள் சம்பந்தப்பட்ட வருவாய் மாவட்ட எல்லைக்கு ஏற்ப மாற்றம் செய்து கூட்டுறவு சங்கங்களின் பதிவாளர் ஆணை பிறப்பித்துள்ளார்.

இது குறித்து கூட்டுறவு சங்கங்களின் பதிவாளர் என்.சுப்பையன் வெளியிட்டுள்ள செயல்முறை ஆணையில் கூறியுள்ளதாவது: "கூட்டுறவுத்துறையின் கீழ் சென்னை இணைப்பதிவாளர் (பொது வினியோக திட்டம்-1), சென்னை இணைப்பதிவாளர் (பொது வினியோக திட்டம்-2) ஆகியவற்றின் கீழ் செயல்படும் 225 ரேஷன் கடைகள் (221 முழுநேரம், 4 பகுதி நேரம்) செங்கல்பட்டு வருவாய் மாவட்டத்திலும், 107 ரேஷன் கடைகள் (101 முழுநேரம், 6 பகுதிநேரம்) திருவள்ளூர் மாவட்டத்திலும் செயல்பட்டு வருகின்றன.

மேலும், காஞ்சீபுரம் மண்டலத்தின் கீழ் செயல்படும் நியாயவிலைக் கடைகளில் 8 முழுநேர ரேஷன் கடைகள் பெருநகர சென்னை மாநகராட்சி வரையறைக்குள் செயல்பட்டு வருகின்றன. கண்காணிப்பு பணிகளில் ஏற்படும் சிக்கல்களை களையும் வகையில் இந்த கடைகள் சம்பந்தப்பட்ட மண்டலங்களுக்கு மாற்றம் செய்யப்படுகின்றன.

அதன்படி, சென்னை இணைப்பதிவாளர் (பொது வினியோக திட்டம்-2) மண்டலத்தில் இயங்கி வரும் காஞ்சீபுரம் மாவட்ட நுகர்வோர் கூட்டுறவு மொத்த விற்பனை பண்டகசாலை நடத்தும் 186 ரேஷன் கடைகள், மேடவாக்கம் நகர கூட்டுறவு கடன் சங்கம் நடத்தும் 38 ரேஷன் கடைகள், ஐ.ஏ.எப். பணியாளர் கூட்டுறவு கடன் சங்கம் நடத்தும் ஒரு ரேஷன் கடை என 225 ரேஷன் கடைகள் செங்கல்பட்டு மண்டலத்திற்கு மாற்றம் செய்யப்பட உள்ளன.

சென்னை இணைப்பதிவாளர் (பொது வினியோக திட்டம்-1) மண்டலத்தில் இயங்கி வரும் பூங்கா நகர் நுகர்வோர் கூட்டுறவு மொத்த விற்பனை பண்டகசாலை நடத்தும் 56 ரேஷன் கடைகள், சைதாப்பேட்டை தாலுகா வேளாண் உற்பத்தியாளர்கள் கூட்டுறவு விற்பனை சங்கம் நடத்தும் 42 ரேஷன் கடைகள், காஞ்சீபுரம் மாவட்ட நுகர்வோர் கூட்டுறவு மொத்த விற்பனை பண்டகசாலை நடத்தும் 9 ரேஷன் கடைகள் என 107 ரேஷன் கடைகள் திருவள்ளூர் மண்டலத்திற்கு மாற்றம் செய்யப்பட உள்ளன.

இதே போன்று, காஞ்சீபுரம் மண்டலத்தில் இயங்கி வரும் கொளப்பாக்கம் நகர கூட்டுறவு கடன் சங்கம் நடத்தி வரும் 8 ரேஷன் கடைகள் சென்னை இணைப்பதிவாளர் (பொது வினியோக திட்டம்-2) மண்டலத்திற்கு மாற்றம் செய்யப்பட உள்ளன. மொத்தத்தில் 340 ரேஷன் கடைகள் மாற்றம் செய்யப்பட உள்ளன" இவ்வாறு அதில் கூறப்பட்டு உள்ளது.

English summary

The Registrar of Co-operative Societies has issued an order to change the revenue district boundaries of 340 ration shops operating in Chennai, Kancheepuram, Chengalpattu and Thiruvallur mandals.