விஜய் கொஞ்சம் அட்ரஸை மாற்றி அனுப்பி இருந்தால்.. பிரச்சனை சரி ஆகி இருக்கும்! மேகதாது கேசில் சொதப்பல்
சென்னை: 2026 சட்டமன்றத் தேர்தலில் தமிழ்நாட்டின் அரசியல் களத்தை மாற்றியமைத்த சில வாரங்களுக்குள், புதிய முதலமைச்சர் சி. ஜோசப் விஜய், மாநிலங்களுக்கு இடையிலான நீர் பிரச்சனை மற்றும் தன் கூட்டணியின் பலவீனமான கணக்குகளுக்கு இடையில் சிக்கிக்கொண்டுள்ளார்.
பல ஆண்டுகளாக நீடித்து வரும் காவிரி பிரச்சனை மீண்டும் தீவிரமடைந்துள்ளது. கர்நாடக துணை முதலமைச்சர் டி.கே. சிவக்குமார், ரூ.9,000 கோடி மதிப்பிலான மேகதாது சமநிலை நீர்த்தேக்கத் திட்டத்துக்கான புதிய விரிவான திட்ட அறிக்கையை (DPR) விரைவாகத் தயாரிக்கப் போவதாக அறிவித்தார். இதற்கு எதிர்ப்பு தெரிவித்து முதலமைச்சர் விஜய், மே 26-ம் தேதி பிரதமர் நரேந்திர மோடிக்கு ஒரு முக்கியக் கடிதம் எழுதினார். அதில், மத்திய அரசு கர்நாடகாவின் சுற்றுச்சூழல் மற்றும் தொழில்நுட்ப அனுமதிகளை நிராகரிக்க வேண்டும் என்று வலியுறுத்தினார்.
ஆனால் சென்னையில் உள்ள அரசியல் சூழல் இதைவிட கடுமையான கேள்விகளை எழுப்புகிறது. எதிர்க்கட்சிகளும் விவசாய சங்கங்களும் ஒரு கேள்வியை நேரடியாகக் கேட்கத் தொடங்கியுள்ளனர்: தன் சொந்த கூட்டணி கட்சியான காங்கிரஸின் உதவியை ஏன் நாடவில்லை? ராகுல் காந்தியை நேரடியாக அணுகி கர்நாடக காங்கிரஸ் அரசை கட்டுப்படுத்தலாமே என்கின்றனர். அதாவது மோடிக்கு எழுதிய லெட்டரை அவர் ராகுலுக்கு எழுதி இருக்கலாமே என்கிறார்கள்.
சிவக்குமாரின் அறிவிப்பு மற்றும் விஜயின் நடவடிக்கை
காவிரி ஆற்றின் குறுக்கே 67.16 டி.எம்.சி. கொள்ளளவு கொண்ட மேகதாது அணையைக் கட்டுவதுதான் டிகே சிவக்குமார் திட்டம். இது கர்நாடகாவின் தலையாய கடமை என்று டி.கே. சிவக்குமார் உறுதியாகக் கூறினார். இதற்கான திட்ட அலுவலகம் ஏற்கனவே செயல்படத் தொடங்கியுள்ளதாகவும், இதனால் மூழ்கும் பகுதிகளுக்கு மாற்று நிலங்கள் ஒதுக்கப்படுவதாகவும் அவர் தெரிவித்தார். மத்திய அரசு அனுமதி கொடுத்த உடன் அடிக்கல் நாட்டும் நிகழ்ச்சி நடைபெறும் என்றும் அறிவித்தார்.
இந்த அறிவிப்பு தமிழ்நாட்டின் டெல்டா மாவட்டங்களில் பெரும் அதிர்ச்சியை ஏற்படுத்தியது. முதலமைச்சர் விஜய் உடனடியாக செயலரகத்தில் அவசர ஆலோசனை கூட்டம் நடத்தினார். சட்ட நிபுணர்கள் மற்றும் காவிரி நீர் வல்லுநர்களுடன் விவாதித்த பிறகு, பிரதமருக்கு கடிதம் எழுதினார்.
காவிரி நீர் தீர்ப்பாயத்தின் 2007 இறுதித் தீர்ப்பு மற்றும் உச்ச நீதிமன்றத்தின் 2018 தீர்ப்பை கர்நாடகா மீறுவதாக அந்தக் கடிதத்தில் சுட்டிக்காட்டினார். காவிரி படுகை நீர் பற்றாக்குறை உள்ள பகுதி என்பதால், மேல்நிலை அணை கட்டினால் தமிழ்நாட்டுக்கு வரும் நீர் பாதிக்கப்படும் என்று எச்சரித்தார்.
ராகுல் காந்தியை ஏன் தவிர்த்தார்?
நிர்வாக ரீதியாக விரைவாக நடவடிக்கை எடுக்கப்பட்டாலும், அரசியல் அளவில் இது பெரும் விமர்சனத்துக்கு உள்ளாகியுள்ளது. கர்நாடகாவில் காங்கிரஸ் ஆட்சி நடத்துகிறது. அதே காங்கிரஸ் தான் தமிழ்நாட்டில் விஜயின் தவெக அரசுக்கு முக்கிய ஆதரவு கொடுக்கிறது.
இந்தக் கூட்டணியில் உண்மையான புரிதல் இருந்தால், ராகுல் காந்தி ஒரு வார்த்தை சொன்னால் போதும். மல்லிகார்ஜுன் கார்கே மற்றும் சித்தராமையா-சிவக்குமார் தலைமையை கட்டுப்படுத்தி திட்டத்தை நிறுத்தலாம். ஆனால் விஜய் அப்படி செய்யாமல் பிரதமருக்கு கடிதம் எழுதியது ஏன் என எதிர்க்கட்சிகள் கேள்வி எழுப்புகின்றன.
"இது இரட்டை நிலைப்பாடு," என்கிறார் சென்னையைச் சேர்ந்த மூத்த அரசியல் பார்வையாளர் ஒருவர். விவசாயிகளின் உணர்வுகளை பாதிக்கும் முதல் பிரச்சினையிலேயே கூட்டணி கட்சியிடம் பேச மறுக்கிறார் என்று விமர்சனம் வைக்கிறார்.
எதிர்க்கட்சிகளின் தாக்குதல்
எதிர்க்கட்சிகள் இந்த வாய்ப்பை பயன்படுத்தி தாக்குதலைத் தொடங்கியுள்ளன. தேமுதிக பொதுச் செயலாளர் பிரேமலதா விஜயகாந்த் வெளியிட்ட அறிக்கையில், "மேகதாது அணை கட்டப்பட்டால் தமிழ்நாட்டின் விவசாய மையம் பாலைவனமாக மாறிவிடும். பிரதமருக்கு கடிதம் எழுதி மறைவது போதாது. கூட்டணி கட்சியுடன் நேரடியாக பேசி திட்டத்தை நிறுத்த வேண்டும்," என்றார்.
புதிய அரசு பலவீனமான கூட்டணி என்பதாலேயே கர்நாடகா துணிச்சலாக நடந்துகொள்வதாக எதிர்க்கட்சிகள் குற்றம் சாட்டுகின்றன.
Click it and Unblock the Notifications
Sign in with Google