மாதம் 20 வாகனங்களை சீஸ் செய்யனும்! கனிமவளத்துறை அதிகாரிகளுக்கு டார்கெட் ஃபிக்ஸ் செய்த துரைமுருகன்!

சென்னை: சட்டவிரோதமாக கனிமங்களை வெட்டி எடுப்பது தொடர்பாக பெறப்படும் புகார்களின் மீது உடனடி நடவடிக்கை எடுக்க வேண்டும் என சுரங்கம் மற்றும் கனிமவளத்துறை அதிகாரிகளுக்கு அறிவுறுத்தியுள்ளார் அமைச்சர் துரைமுருகன்.

மேலும் அனைத்து மாவட்ட அலுவலர்களும் குறைந்தபட்சம் மாதத்திற்கு 20 வாகனங்களையாவது கைப்பற்றி, அண்டை மாநிலங்களுக்கு மணல் எடுத்துச்செல்லும் வாகனங்களை முற்றிலும் தடுக்க வேண்டுமென கறாராக தெரிவித்துள்ளார்.

சென்னை தலைமைச் செயலகத்தில் இன்று நடைபெற்ற ஆலோசனைக் கூட்டத்தில் கட் அண்ட் ரைட்டாக துறை அதிகாரிகளுக்கு உத்தரவிட்டுள்ளார்.

சுரங்கத்துறை

சுரங்கத்துறை திட்டப்பணிகள் குறித்த ஆய்வு கூட்டம் நீர்வளத்துறை அமைச்சர் துரைமுருகன் தலைமையில் தலைமைச் செயலகத்தில் இன்று நடைபெற்றது. இந்த ஆய்வுக்கூட்டத்தில் சுரங்கத்துறையினை மேம்படுத்தும் நோக்கில் அரசுக்கு கூடுதல் வருவாய் ஈட்டித்தர அனைத்து அலுவலர்களும் முழு ஒத்துழைப்புடன் செயல்படவேண்டும் எனவும், பறக்கும்படை அலுவலர்கள் முனைப்புடன் செயல்படவேண்டும் எனவும் அமைச்சர் துரைமுருகன் அறிவுரை வழங்கினார்.

சட்ட விரோதமாக

சட்டவிரோதமாக கனிமங்களை வெட்டி எடுப்பது தொடர்பாக, பெறப்படும் புகார்களின் மீது உடனடி நடவடிக்கை மேற்கொள்வதுடன் அப்பகுதிகளை கள ஆய்வு மேற்கொண்டு, தேவைப்படின், ஆளில்லா விமான தொழில்நுட்பத்தின் மூலம் அளவீடு செய்து சம்பந்தப்பட்ட நபர்கள் மீது விதிகளின்படி கடுமையான நடவடிக்கை எடுக்கவும் அமைச்சர் துரைமுருகன் அறிவுறுத்தினார்.

அரசு புறம்போக்கு நிலம்

தருமபுரி மற்றும் கிருஷ்ணகிரி மாவட்டங்களில் அரசு புறம்போக்கு நிலங்களில் உள்ள தகுதிவாய்ந்த கிரானைட் குவாரிகளை உடனடியாக பொது ஏலத்திற்குக் கொண்டு வருமாறு கூறிய அமைச்சர் துரைமுருகன், அனைத்து மாவட்டங்களிலும் தகுதி வாய்ந்த கல்குவாரிகளை உரிய ஏலத்திற்கு கொண்டு வந்து கனிம வருவாயினை ஈட்டவும் பொது மக்களுக்கு கட்டுமான பொருட்களை நியமான விலையில் கிடைக்க வழிவகை செய்யவும் அதிகாரிகளை கேட்டுக்கொண்டார்.

20 வாகனங்கள்

வாகனம் கைப்பற்றுகையை ஆய்வு செய்த அமைச்சர் துரைமுருகன், அனைத்து மாவட்ட அலுவலர்களும் குறைந்த பட்சம் மாதத்திற்கு 20 வாகனங்கள் கைப்பற்றிடவும், அண்டை மாநிலங்களுக்கு எடுத்துச்செல்லும் மணல் வாகனங்களை முற்றிலும் தடுக்க வேண்டுமெனவும் அறிவுறுத்தினார்.

English summary

Minister Duraimurugan latest news: சட்டவிரோதமாக கனிமங்களை வெட்டி எடுப்பது தொடர்பாக பெறப்படும் புகார்களின் மீது உடனடி நடவடிக்கை எடுக்க வேண்டும் என சுரங்கம் மற்றும் கனிமவளத்துறை அதிகாரிகளுக்கு அறிவுறுத்தியுள்ளார் அமைச்சர் துரைமுருகன்.