பள்ளிகளில் முத்துராமலிங்கத் தேவர் ஜெயந்தி விழா! அரசுக்கு பெற்றோர் ஆசிரியர் கழகம் வேண்டுகோள்!

சென்னை: பள்ளிகளில் முத்துராமலிங்கத் தேவர் ஜெயந்தி விழாவை கொண்டாட வேண்டும் என அரசுக்கு தமிழக தனியார் பள்ளி பெற்றோர் ஆசிரியர் கழகத் தலைவர் ஏ.என்.எஸ்.பிரசாத் வேண்டுகோள் விடுத்துள்ளார்.

அரசுக்கு வேண்டுகோள்: தேவர் ஜெயந்தியை தமிழக மாணவர் ஒழுக்கம், ஒற்றுமை, ஒருமைப்பாட்டு தினம் என அறிவித்து புகை, போதை ஒழிப்பு விழிப்புணர்வு நிகழ்ச்சிகள் நடத்த வேண்டும் எனக் கேட்டுக்கொண்டுள்ளார். இது தொடர்பாக அவர் அரசுக்கு விடுத்த வேண்டுகோள் வருமாறு;

தேசியம் -தெய்வீகம்: ''தேசியம் என் உடல், தெய்வீகம் என் உயிர் என்ற உயர்ந்த சிந்தனையுடன் தேச ஒற்றுமைக்கும், ஒருமைப்பாட்டிற்கும், தனி மனித ஒழுக்கத்திற்கும் இலக்கணமாக வாழ்ந்து மறைந்த பசும்பொன் முத்துராமலிங்கத் தேவரை மாணவர்களிடம் கொண்டு செல்லும் வகையில், பள்ளிகளில் அவருடைய தேவர் ஜெயந்தி விழாவை கொண்டாட வேண்டும். அந்த வகையில் தேவர் ஜெயந்தியை தமிழக மாணவர் ஒழுக்கம், ஒற்றுமை, ஒருமைப்பாட்டு தினம் என அறிவித்து புகை, போதை ஒழிப்பு விழிப்புணர்வு நிகழ்ச்சிகள் நடத்த தமிழக அரசு ஏற்பாடு செய்ய வேண்டும்.''

தனிமனித ஒழுக்கம்: ''பசும்பொன் முத்துராமலிங்கத் தேவரின் முழக்கம் லட்சக்கணக்கான இளைஞர்களின் உணர்வுகளை தட்டி எழுப்பியது. தனிமனித ஒழுக்கத்திலும்,மனிதநேயத்திலும் வாழ்வியல் முறைகளிலும் இலக்கணமாக வாழ்ந்த சிறந்த சிந்தனையாளர். வளரும் தலைமுறையை வழிநடத்த அரசு துணை நிற்க வேண்டும்.'' இவ்வாறு தெரிவித்துள்ளார். முத்துராமலிங்கத் தேவர் குருபூஜை விழாவானது இன்று தொடங்கி அடுத்த 3 நாட்களுக்கு ராமநாதபுரம் மாவட்டம் பசும்பொன்னில் உள்ள அவரது நினைவிடத்தில் நடைபெறவுள்ளது.

ஜாதி வட்டத்துக்குள்: இந்தச் சூழலில் இத்தகைய கோரிக்கையை தமிழக தனியார் பள்ளி பெற்றோர் ஆசிரியர் கழகம் முன் வைத்துள்ளது. முத்துராமலிங்கத் தேவரை குறுகிய ஜாதி வட்டத்துக்குள் அடைக்க சிலர் முயற்சிக்கக் கூடாது என்று தேவர் தேசியத் தலைவர் எனவும் குரல்கள் ஒலிக்கத் தொடங்கியுள்ளது கவனிக்கத்தக்கது. இதனிடையே நாளை மறுநாள் மத்திய அமைச்சர் நிதின் கட்கரி, முதல்வர் ஸ்டாலின், எடப்பாடி பழனிசாமி உட்பட தமிழக அரசியல் கட்சித் தலைவர்கள் அனைவரும் பசும்பொன் செல்லவுள்ளனர்.

English summary

Tamil Nadu Private School Parents Teachers Association, has appealed to the government to celebrate Muthuramalinga Devar Jayanthi in schools.