2 மணி நேரத்தில் சென்னை - பெங்களூர் செல்லலாம்.. அதிவிரைவுச் சாலை ஜனவரி முதல்.. நிதின் கட்கரி தகவல்!

Updated: Thursday, September 7, 2023, 23:13 [IST]

Subscribe to Oneindia Tamil

சென்னை: வரும் ஜனவரி மாதம் முதல் சென்னை - பெங்களூர் அதிவிரைவுச் சாலை செயல்பாட்டுக்கு வரும் என மத்திய சாலைப் போக்குவரத்து மற்றும் நெடுஞ்சாலைத் துறை அமைச்சர் நிதின் கட்கரி அறிவித்துள்ளார்.

மத்திய சாலைப் போக்குவரத்து மற்றும் நெடுஞ்சாலைத் துறை அமைச்சர் நிதின் கட்கரி சென்னை நந்தனத்தில் நடைபெற்ற நிகழ்ச்சி ஒன்றில் இன்று பங்கேற்றார். இந்த நிகழ்ச்சியில் பேசிய நிதின் கட்கரி, சென்னை - பெங்களூர் இடையே அதிவிரைவுச் சாலை வரும் ஜனவரி மாதம் முதல் செயல்பாட்டுக்கு வரும் என்றும், இந்தச் சாலை பயன்பாட்டிற்கு வந்தால் 2 மணி நேரத்திலே சென்னையில் இருந்து பெங்களூருக்கு பயணம் செய்யலாம் என்றும் தெரிவித்துள்ளார்.

Nitin Gadkari announced that Chennai Bangaluru Expressway operational from january

ரூ.16,730 கோடி மதிப்பீட்டில் சென்னை - பெங்களூர் அதிவிரைவுச் சாலை அமைக்கும் பணிகள் நடைபெற்று வருகின்றன. கர்நாடகா, ஆந்திரா மற்றும் தமிழ்நாடு ஆகிய மூன்று மாநிலங்கள் வழியாக கர்நாடகா மற்றும் தமிழ்நாட்டின் தலைநகரங்களை இணைப்பதை இந்த திட்டம் நோக்கமாகக் கொண்டுள்ளது. ஹோஸ்கோட், மாலூர், பங்கார்பேட்டை, கோலார், வெங்கடகிரி, பலமநீர், பங்காருபாலம், சித்தூர், ராணிப்பேட்டை மற்றும் ஸ்ரீபெரும்புதூர் போன்ற முக்கிய நகரங்கள் இந்த வழித்தடத்தில் அடங்கும்.

பாரத்மாலா பரியோஜனா திட்டத்தின் கீழ் இந்திய தேசிய நெடுஞ்சாலை ஆணையத்தால் 16,730 கோடி ரூபாய் பட்ஜெட்டில் இந்த அதிவிரைவுச் சாலை அமைக்கும் பணிகள் நடைபெற்று வருகிறது. 2021 மற்றும் 2022 ஆம் ஆண்டுகளில் வெவ்வேறு நேரங்களில் கட்டுமானப் பணிகள் தொடங்கப்பட்டு, பத்து தொகுப்புகளாகப் பிரிக்கப்பட்டுள்ளது.

இந்த அதிவிரைவுச்சாலையானது ஹோஸ்கோட் (பெங்களூருவுக்கு அருகில்) மற்றும் ஸ்ரீபெரும்புதூர் (சென்னைக்கு அருகில்) இடையே 262 கி.மீ தூரத்தையும், ஸ்ரீபெரும்புதூரில் இருந்து மதுரவாயல் வரையிலான 22.6 கிமீ உயரடுக்கு சாலையையும் கொண்டுள்ளது. மணிக்கு 120 கி.மீ வேகத்தில் பயணிக்கும் வகையில் இந்த அதிவிரைவுச் சாலை வடிவமைக்கப்பட்டுள்ளது.

இந்த அதிவிரைவுச் சாலை பெங்களூர் மற்றும் சென்னை இடையேயான பயண நேரத்தை 6 மணி நேரத்தில் இருந்து வெறும் 2 மணி நேரமாகக் குறைக்கும். இதேபோல, நாடு முழுவதும் 36 பசுமை வழி அதிவிரைவுச் சாலைகள் அமைக்கப்படுவதாக மத்திய அமைச்சர் நிதின் கட்கரி தெரிவித்துள்ளார்.