பன்னீருக்கு கட்டம் கட்டிய பொதுக்குழு.. அதிமுக அலுவலகத்தைக் கைப்பற்றிய ஓபிஎஸ் அவசர ஆலோசனை!

சென்னை : ராயப்பேட்டையில் உள்ள அதிமுக தலைமைக் கழகத்தில் ஓ.பன்னீர்செல்வம் தனது ஆதரவாளர்களுடன் ஆலோசனையில் ஈடுபட்டு வருகிறார்.

வானகரத்தில் எடப்பாடி பழனிசாமி தரப்பினர் பொதுக்குழுவை கூட்டி நடத்தி வரும் நிலையில், அதிமுக தலைமை அலுவலகத்தைக் கைப்பற்றியுள்ளார் ஓ.பன்னீர்செல்வம்.

வைத்திலிங்கம், மனோஜ் பாண்டியன், புகழேந்தி ஆகிய அதிமுக நிர்வாகிகள் தலைமைக் கழகத்தில் ஓபிஎஸ் உடனான ஆலோசனையில் ஈடுபட்டு வருகின்றனர்.

அதிமுக பொதுக்குழு

பரபரப்பான சூழலில் அ.தி.மு.க பொதுக்குழு கூட்டம் எடப்பாடி பழனிசாமி ஆதரவாளர்கள் பங்கேற்பில் கூடியுள்ளது. இதற்கிடையே ஓ.பன்னீர்செல்வம் அவரது ஆதரவாளர்களுடன் வீட்டில் முக்கிய ஆலோசனை நடத்தினார். பின்னர் தனது ஆதரவாளர்களுடன் புறப்பட்டு ராயப்பேட்டையில் உள்ள அதிமுக தலைமை அலுவலகம் சென்றார். இதனையடுத்து அங்கு பரபரப்பு ஏற்பட்டது.

தொண்டர்கள் மோதல்

அதிமுக கட்சி தலைமை அலுவலகத்தில் பலத்த பாதுகாப்பு போடப்பட்டது. அதிமுக தலைமை அலுவலகத்தில் ஈபிஎஸ் ஆதரவாளர் ஆதிராஜாராம் தலைமையில் தொண்டர்கள் குவிக்கப்பட்டனர். அவர்கள் அலுவலகத்திற்கு பூட்டு போட்டனர். இதனையடுத்து கட்சி அலுவலகம் முன்பு இரு தரப்பினரும் மோதிக்கொண்டனர்.

பூட்டுகளை உடைத்து

இரு தரப்பினரும் கட்டைகள் மற்றும் கற்கள் கொண்டு மாற்றி மாற்றி தாக்கிக் கொண்டனர். இதனால் பெரும் பதட்டம் நிலவுகிறது. இந்த மோதலில் பலர் படுகாயமுற்றனர். அப்பகுதியில் பதட்டம் நிலவுகிறது. அதிமுக தலைமை அலுவலகத்தின் கதவுகள் பூட்டப்பட்டிருந்த நிலையில், அதிமுக தலைமை அலுலகத்தின் கதவுகளை ஓபிஎஸ் ஆதரவாளர்கள் அடித்து உடைத்து உள்ளே சென்றனர்.

ஓ.பி.எஸ் கட்டுப்பாட்டில்

ஒ.பன்னீர்செல்வத்தின் ஆதரவாளர்கள் அதிமுக தலைமைக் கழகத்தின் உள்ளே நுழைந்து, பேனர்களில் இடம்பெற்றுள்ள எடப்பாடி பழனிசாமியின் படங்களை கிழித்தெறிந்து அட்டகாசம் செய்தனர். அலுவலகத்திற்குள்ளும் புகுந்த ஓபிஎஸ் ஆதரவு அதிமுக தொண்டர்கள்அங்கிருந்த மேஜை, நாற்காலிகளை அடித்து உடைத்து சூறையாடினர். கட்சி அலுவலகம் தற்போது ஓ.பன்னீர்செல்வம் தரப்பினரின் கையில் வந்துள்ளது.

ஓபிஎஸ் ஆலோசனை

அதிமுக அலுவலகத்தில் இருந்து முக்கிய ஆவணங்களை ஓபிஎஸ் தரப்பு கைப்பற்றி உள்ளனர். மேலும், ஓ.பன்னீர்செல்வம் தனது ஆதரவாளர்களுடன் அதிமுக அலுவலகத்திற்குள் ஆலோசனையில் ஈடுபட்டு வருகிறார். வைத்திலிங்கம், மனோஜ் பாண்டியன், புகழேந்தி ஆகிய அதிமுக நிர்வாகிகள் இந்த ஆலோசனையில் பங்கேற்றுள்ளனர்.

முக்கிய ஆலோசனை

வானகரத்தில் நடைபெற்று வரும் அதிமுக பொதுக்குழுவில் எடப்பாடி பழனிசாமியை இடைக்கால பொதுச் செயலாளராக தேர்வு செய்யப்பட்டுள்ளார். 16 தீர்மானங்கள் நிறைவேற்றப்பட்டுள்ளன. இந்நிலையில், பொதுக்குழுவின் முடிவுகள் குறித்து ஓபிஎஸ் தனது தரப்பினருடன் ஆலோசனையில் ஈடுபட்டு வருவதாக கூறப்படுகிறது.

English summary

O.Panneerselvam has taken over the AIADMK head quarters in Rayapettah. O.Panneerselvam is consulting with his supporters.