துர்கா ஸ்டாலின் காலில் விழுந்து வணங்கியது ஏன்..? திமுக எம்எல்ஏ பரந்தாமன் விளக்கம்

சென்னை: அன்னையிடம் ஆசி பெறுவது பற்றி பதவிக்காக தவழ்ந்தவர்களுக்கு எங்கே தெரியப் போகிறது என திமுக எம்.எல்.ஏ.பரந்தாமன் தனது டிவிட்டரில் பதிவு வெளியிட்டுள்ளார்.

துர்கா ஸ்டாலினிடம் பரந்தாமன் எம்.எல்.ஏ. ஆசி வாங்கியதை ஆர்.எஸ்.எஸ்.பிரமுகர் ஒருவர் ட்ரோல் செய்து டிவிட்டரில் விமர்சித்திருந்தார்.

அவருக்கு பதிலடி கொடுக்கும் வகையில் பரந்தாமன் எம்.எல்.ஏ. இந்த பதிவை வெளியிட்டுள்ளார்.

அமைச்சர் பதவியேற்பு

கடந்த 14ஆம் தேதி உதயநிதி ஸ்டாலின் அமைச்சராக பதவியேற்கும் நிகழ்வில் கலந்துகொள்ள வந்த துர்கா ஸ்டாலினிடம், சென்னை எழும்பூர் தொகுதி சட்டமன்ற உறுப்பினர் பரந்தாமன் காலில் விழுந்து ஆசிர்வாதம் பெற்றார். இவரை போலவே இன்னும் பலரும் துர்கா ஸ்டாலினிடம் ஆசி வாங்கும் பொருட்டு வணங்கினார்கள். இதனை கடுமையாக அதிமுக, பாஜக, உள்ளிட்ட கட்சியினர் விமர்சித்து வரும் நிலையில் ஆர்.எஸ்.எஸ். பிரமுகர் ஒருவர் பரந்தாமனின் சுயமரியாதை என்ற பெயரில் ட்ரோல் செய்திருந்தார்.

சமூக வலைதளம்

தொலைக்காட்சி விவாதங்களில் சுயமரியாதை பற்றி பேசுகின்ற எழும்பூர் தொகுதி எம்.எல்.ஏ. பரந்தாமன் சுயமரியாதையை தேடிய போது கிளிக்கியது என துர்கா ஸ்டாலினிடம் ஆசி பெறும் வீடியோவை ஆர்.எஸ்.எஸ். பிரமுகர் தனது டிவிட்டர் பக்கத்தில் பகிர்ந்திருந்தார். இதற்கு பதிலடி கொடுத்துள்ள பரந்தாமன் எம்.எல்.ஏ., ''எங்கள் திமுக குடும்பத்தில் அன்னையிடம் ஆசி பெற்றதை பதவிக்காக தவழ்ந்தவர்களுக்கு சுய மரியாதை பற்றி என்ன தெரியும்?'' என வினவியுள்ளார்.

காலில் விழுவது

திமுகவை பொறுத்தவரை காலில் விழும் கலாச்சாரமே கிடையாது என்பது குறிப்பிடத்தக்கது. ஸ்டாலினும் சரி அவரது மனைவி துர்கா ஸ்டாலினும் சரி இதனை துளியும் விரும்பவில்லை என்பது கவனிக்கத்தக்கது. இருப்பினும் ஒரு சில நிர்வாகிகள், பிரமுகர்கள் ஆசி பெற்று அவர்களை தர்மசங்கடத்திற்கு தள்ளும் நிகழ்வு தொடர்கிறது. இதனிடையே அதிமுகவை பொறுத்தவரை ஜெயலலிதா காலத்திலும் சரி இப்போது அக்கட்சியின் இடைக்கால பொதுச்செயலாளராக உள்ள எடப்பாடி பழனிசாமியிடமும் சரி காலில் விழுந்து வணங்கும் கலாச்சாரம் தொடர்வது குறிப்பிடத்தக்கது.

மிகுந்த கவனம்

திமுக சட்டமன்ற உறுப்பினர்களும், அமைச்சர்களும், நாடாளுமன்ற உறுப்பினர்களும் பொதுவிடங்களில் மிகுந்த கவனமுடன் நடந்துகொள்ள வேண்டும் என முதல்வர் ஸ்டாலின் பலமுறை அறிவுறுத்தியிருப்பது குறிப்பிடத்தக்கது.

English summary

DMK MLA Paranthaman has posted on his Twitter about getting blessings from Mother.