அய்யா தான் குலதெய்வம்.. அன்புமணி எதிர் காலம்! பாமக இளைஞரணி தலைவர் பதவியில் இருந்து முகுந்தன் விலகல்!

Updated: Thursday, May 29, 2025, 13:40 [IST]

Subscribe to Oneindia Tamil

சென்னை: பாமகவில் உட்கட்சி மோதல்களுக்கிடையே செய்தியாளர்களை சந்தித்த ராமதாஸ், மகனும் பாமகவின் தலைவருமான அன்புமணி ராமதாஸ் மீது பல்வேறு குற்றச்சாட்டுகளை முன் வைத்தார். இதற்கிடையில் பாமக இளைஞர் சங்க தலைவர் பொறுப்பிலிருந்து விலகுவதாக முகுந்தன் பரசுராமன் கடிதம் அனுப்பி இருக்கிறார். ராமதாஸ் குலதெய்வம் எனவும், அன்புமணி கட்சியின் எதிர்காலம் எனவும் கருதி பணியாற்றுவேன் என அதில் நெகிழ்ச்சியுடன் குறிப்பிட்டிருக்கிறார்.

தமிழக சட்டமன்றத் தேர்தலுக்கு இன்னும் ஒரு ஆண்டு இருக்கும் நிலையில் திமுக, அதிமுக கூட்டணியை வலுப்படுத்தும் முயற்சியில் ஈடுபட்டு வருகிறது. ஆனால் பாமக கட்சியிலோ உட்கட்சி பூசல் நிலவி வருகிறது. இளைஞர் அணி தலைவர் பதவி விவகாரம் தொடர்பாகத் தான் ராமதாஸ், அன்புமணி ராமதாஸ் இடையே மோதல் வலுத்திருப்பதாக சொல்லப்படுகிறது.

இதற்கிடையே இன்று செய்தியாளர்களை சந்தித்த பாமக நிறுவனர் ராமதாஸ், அன்புமணி மீது பல்வேறு குற்றச்சாட்டுகளை முன்வைத்தார். தலைமை பண்பு இல்லை, தாயை அடிக்க வந்தார் என பல்வேறு பரபரப்பான குற்றச்சாட்டுகளை ராமதாஸ் சுமத்தி இருக்கும் நிலையில் கட்சியினர் இடையே ஒருவித குழப்பம் ஏற்பட்டிருக்கிறது.

சட்டமன்றத் தேர்தலுக்கு தயாராகலாம் என்று பார்த்தால் தந்தை மகன் பிரச்சினையே பெரிதாக இருக்கும் போலயே என புலம்புகின்றனர் பாமகவினர் அதே நேரத்தில் 108 மாவட்ட செயலாளர்களில் எட்டு பேர் மட்டுமே தன்னை சந்திக்க வந்தார்கள் என ராமதாஸ் கூறியிருப்பது கட்சியில் அன்புமணியின் செல்வாக்கு அதிகரித்திருப்பதை காட்டுகிறது என்கின்றனர் அன்புமணி ராமதாஸின் ஆதரவாளர்கள். இந்த நிலையில் பாமகவில் பிரச்சனைக்கு காரணமானவர்களில் ஒருவர் என கூறப்படும் முகுந்தன் பரசுராமன் இளைஞர் சங்க தலைவர் பதவியில் இருந்து விலகிக் கொள்வதாக அன்புமணிக்கு கடிதம் எழுதி இருக்கிறார்.

இது தொடர்பாக பாமக தலைவர் அன்புமணி ராமதாஸ் எனக் குறிப்பிட்டு எழுதியுள்ள கடிதத்தில்,"பாட்டாளி மக்கள் கட்சியின் இளைஞர் அணி பாட்டாளி இளைஞர் சங்கத்தின் தலைவராக கடந்த 28.12.2024ஆம் நாளில் நான் நியமிக்கப்பட்டேன். சொந்த காரணங்களுக்காக அந்த பொறுப்பில் இருந்து விலகிக் கொள்கிறேன். மருத்துவர் அய்யா அவர்கள் தான் என்றென்றும் எனது குலதெய்வம். மருத்துவர் அன்புமணி ராமதாஸ் ஆகிய தாங்கள் தான் எங்கள் எதிர்காலம் என்ற உணர்வுடன் தொடர்ந்து கட்சி பணியாற்றுவேன்" என உறுதியளிக்கிறேன் என அந்த கடிதத்தில் கூறியுள்ளார்.