5,000 வேலை செய்யும்.. இனி காங்கிரஸில் கூட்டணி ஆட்சி கேட்க மாட்டார்கள்.. ஆர்.எஸ் பாரதி அதிரடி

சென்னை: சட்டமன்ற தேர்தல் அறிவிப்புக்கு குறுகிய காலமே உள்ளது. ஆட்சியை தக்க வைப்பதற்கு திமுக கூட்டணியும், ஆட்சியை பிடிப்பதற்கு அதிமுக - பாஜக கூட்டணியும் தீவிரம் காட்டி வருகிறார்கள். நாம் தமிழர், தவெக கட்சிகளும் களம் காண்பதால் 4 முனை போட்டி நிலவி வருகிறது. திமுக கூட்டணியில் காங்கிரஸ் கட்சி, கூட்டணி ஆட்சி என்று திமுகவுடன் போர் கொடி எழுப்பி தனி டிராக்கில் பயணித்து வருகிறது. இதற்கு பதிலளித்துள்ள ஆர்.எஸ் பாரதி, கூட்டணி ஆட்சி வேண்டாம் என்பதை ராகுல் காந்தியே ஏற்றுக் கொள்வார் என பதில் அளித்துள்ளார்.

தமிழ்நாடு அரசியல் கட்சிகள் சட்டமன்ற தேர்தலுக்கு தயாராகி வருகிறார்கள். பிரச்சாரம், தொகுதி பங்கீடு, வாக்குறுதிகள் ஆகியவற்றால் களம் பரபரப்பாகியுள்ளது. கூட்டணிகள் கிட்டத்தட்ட இறுதியாகிவிட்டது. மிகவும் வலுவான கூட்டணியாக கருதப்பட்ட திமுக கூட்டணியில் காங்கிரஸ் கட்சியால் பரபரப்பு நிலவி வருகிறது. பிரவீன் சக்கரவர்த்தி, மாணிக்கம் தாகூர் உள்ளிட்டோர் திமுகவிற்கு எதிரான கருத்துகளை முன் வைத்து வருகிறார்கள்.

இனி காங்கிரஸ் கேட்காது

ஆட்சி அதிகாரத்தில் பங்கு, கூட்டணி ஆட்சி என்பதைத் தொடர்ந்து வலியுறுத்தி வருகிறார்கள். முதலமைச்சர் மு.க. ஸ்டாலினே, கூட்டணி ஆட்சி தமிழ்நாட்டிற்கு ஒத்துவராது என்று பதில் அளித்துள்ளார். இது காங்கிரஸ் கட்சிக்கு அதிர்ச்சியை ஏற்படுத்தியுள்ளது. அதன் பிறகும் கூட பிரவீன் சக்கரவர்த்தி, மாணிக்கம் தாகூர் ஆகியோர் தொடர்ந்து கூட்டணி ஆட்சி என்று கூறி வருகிறார்கள்.

இந்நிலையில் திமுக அமைப்பு செயலாளர் ஆர்.எஸ். பாரதி சென்னையில் செய்தியாளர்களைச் சந்தித்தார். அப்போது அவர், "நாளையில் இருந்து யாரும் கூட்டணி ஆட்சி என்பதை பற்றி பேச மாட்டார்கள். 5,000 கொடுத்த பிறகு மக்கள் மனநிலை எப்படி இருக்கும் என்பது அரசியல் கட்சிகளுக்கு நன்கு தெரியும். கார்கே, ராகுல் காந்தி, செல்வப்பெருந்கை ஆகியோர்தான் காங்கிரஸ் கட்சியின் பிரதிநிதிகள்.

ராகுல் காந்தியே ஏற்பார்

இவர்கள் 3 பேர் கேட்டால் மட்டும் தான் பதில சொல்லுவோம். கூட்டணி ஆட்சி இல்லை என்பதை ராகுல் காந்தியே ஏற்றுக் கொள்வார். எங்கள் தலைவரும் கூட்டணி ஆட்சி இல்லை என்பதை திட்டவட்டமாக கூறிவிட்டார். எனவே இனி யாரும் ஆட்சியில் பங்கு கேட்க மாட்டார்கள். இதனால் கூட்டணி பேச்சுவார்த்தையில் எந்த சிக்கலும் இருக்காது" என்றார்.

English summary

Power Sharing Replied manickam taggore: 2026 assembly election will be declared soon. DMK RS Bharathi said, Congress will not ask power sharing here after. Rahul also accept for not sharing power.