திருமா பேசும்போது ‛ஆஃப்பான மைக்’.. கோபத்தில் மின் ஊழியரை தாக்கிய விசிகவினர்.. சென்னையில் பரபரப்பு

சென்னை: ரயில்வே தொழிற்சங்க அங்கீகார தேர்தலில் போட்டியிடும் வேட்பாளரை ஆதரித்து இன்று சென்னை சென்ட்ரலில் உள்ள கோட்ட ரயில்வே மேலாளர் அலுவலகத்தில் விடுதலை சிறுத்தைகள் கட்சி தலைவர் திருமாவளவன் பிரசாரம் செய்தார். அப்போது மைக் 2 முறை ஆஃப் செய்யப்பட்டதால் மின்ஊழியரை பிடித்து விசிகவினர் தாக்கியது பெரும் பரபரப்பை ஏற்படுத்தியது.

டிசம்பர் 4, 5 ஆகிய தேதிகளில் ரயில்வே தொழிற்சங்க அங்கீகார தேர்தல் என்பது நடைபெற உள்ளது. இந்த தேர்தலில் நட்சத்திர சின்னத்தில் விசிக தொழிற்சங்க வேட்பாளராக மகேந்திரன் போட்டியிடுகிறார்.

இவரை ஆதரித்து சென்னை சென்ட்ரலில் உள்ள கோட்ட மேலாளர் அலுவலகத்தில் இன்று விடுதலை சிறுத்தைகள் கட்சியின் தலைவர் தொல் திருமாவளவன் பிரசாரம் மேற்கொண்டார்.

இதில் விடுதலை தொழிலாளர் முன்னணியை சேர்ந்த ஏராளமானவர்கள் பங்கேற்றனர். மேடையில் திருமாவளவன் பேச முயன்றார். அப்போது மைக் ‛ஆஃப்' ஆகிவிட்டது. இதனால் திருமாவளவன் பேசாமல் இருந்தார். இதையடுத்து விடுதலை சிறுத்தைகள் கட்சியினர் டென்ஷன் ஆனதோடு, மின் அலுவலகத்தில் இருந்து உதவியாளர் சரவணனிடம் புகாரளித்தனர். அதன்பிறகு மைக் ஆன் செய்யப்பட்டது.

அதன்பிறகு திருமாவளவன் பேசினார். அப்போதும் பாதியிலும் திடீரென்று ‛மைக்' வேலைசெய்யவில்லை. மைக்கிற்காக மின்இணைப்பு துண்டிக்கப்பட்டதாக கூறப்படுகிறது. அதோடு திடீர் மின்தடைக்கு எஸ்ஆர்எம்யூ அமைப்பினர் இருக்கலாம் என்று விடுதலை சிறுத்தைகள் கட்சியினர் நினைத்தனர்.

இதையடுத்து மீண்டும் அவர்கள் மின் ஊழியர் சரவணனிடம் முறையிட்டனர். அப்போது மைக் இணைப்புக்கான ஸ்விட்ச் ஆப் செய்யப்பட்டுள்ளதாக கூறப்படுகிறது. இதனால் கோபமடைந்த விசிகவினர் மின் ஊழியர் சரவணனை தாக்கினர். இதுபற்றி அறிந்தவுடன் உடனடியாக ரயில்வே போலீசார் தலையிட்டனர்.

விசிகவினரிடம் சிக்கிய மின் ஊழியரை போலீசார் மீட்டனர். அதன்பிறகு இருதரப்பிடமும் பேசி சமாதானம் செய்து வைத்தனர். அதன்பிறகு முறையாக மைக்கிற்கான மின்சாரம் சப்ளை செய்யப்பட்டது. இதனால் நிகழ்ச்சி பாதிப்பு இன்றி நடந்து முடிந்தது. முன்னதாக திருமாவளவன் பேசும்போது மைக் ஆஃப் செய்யப்பட்ட சம்பவம், மின்ஊழியரை விசிகவினர் தாக்கிய சம்பவம் உள்ளிட்டவற்றால் சென்னை சென்ட்ரல் ரயில்வே கோட்ட மேலாளர் அலுவலகத்தில் இன்று பெரும் பரபரப்பை ஏற்படுத்தியது.

English summary

Viduthalai Chiruthaigal katchi president Thirumavalavan campaigned at the Divisional Railway Manager's office in Chennai Central today in support of a candidate contesting the railway union recognition election. At that time, the microphone was turned off twice and the VKC members grabbed the electrician and attacked him, causing a huge stir.