சிங்கார சென்னை 2.0 திட்டத்திற்கு ரூ 500 கோடி ஒதுக்கீடு.. அரசாணை வெளியீடு

Updated: Wednesday, September 29, 2021, 16:53 [IST]

Subscribe to Oneindia Tamil

சென்னை: சிங்கார சென்னை 2. O திட்டத்திற்காக ரூ 500 கோடி நிதி ஒதுக்கீடு செய்யப்பட்டுள்ளது. இதற்கான அரசாணையை தமிழக அரசு வெளியிட்டுள்ளது.

சிங்கார சென்னை என்பது தலைநகர் சென்னையை அழகுப்படுத்தும் திட்டமாகும். 1996 இல் நடந்த உள்ளாட்சி தேர்தலில் மு.க.ஸ்டாலின் சென்னை மேயராக தேர்வு செய்யப்பட்டார்.

அப்போது அவர் டெல்லி, மும்பை ,கொல்கத்தா போன்ற பெருநகரங்களுக்கு அடுத்தபடியாக சென்னையை அழகுப்படுத்த சிங்கார சென்னை திட்டத்தை கொண்டு வந்தார். இந்த நிலையில் ஆட்சி மாற்றத்தின் காரணமாக ஸ்டாலினின் கனவு திட்டம் கிடப்பில் போடப்பட்டது.

முதல்வர் ஸ்டாலின்

இதையடுத்து தற்போது முதல்வராக ஸ்டாலின் பதவியேற்றுள்ள நிலையில் புதுபொலிவுடன் சிங்கார சென்னை திட்டத்தை செயல்படுத்த சென்னை மாநகராட்சி ஆணையர் ககன்தீப் சிங் பேடிக்கு உத்தரவிட்டார். அதன்படி இந்த திட்டம் செயல்படுத்தப்பட்டு நடத்தப்பட்டு வருகிறது. இந்த திட்டத்தின் கீழ் சென்னையில் புதிய சாலைகள் போடுவது, பாலங்கள் கட்டுவது, சுவரொட்டிகளை நீக்கி சுத்தம் செய்யும பணிகள் நடைபெற்று வருகின்றன.

கடலோர பூங்காக்கள்

அது போல் புதிய பூங்காக்கள் அமைப்பது, கடலோர பூங்காக்கள் அமைப்பது , சென்னை கடற்கரைகளை சுற்றுலாத் தலமாக மாற்றும் ப்ராஜக்ட் ப்ளூ என்ற திட்டம் உள்ளிட்ட பல்வேறு திட்டங்கள் மேற்கொள்ளப்படவுள்ளன. முதல் கட்டமாக சென்னையை தூய்மைப்படுத்தும் பணிகள் நடைபெற்று வருகின்றன.

கொசுக்கள்

நீர் நிலைகள் தூர்வாரப்பட்டு கொசுக்களை ஒழிக்க டிரோன் மூல்ம மருந்து தெளிக்கும் பணிகளும் நடைபெற்று வருகின்றன. அது போல் வடகிழக்கு பருவமழையின் போது சாலைகளில் தண்ணீர் தேங்காத வண்ணம் நீர்நிலைகள், மழை நீர் கால்வாய்கள் தூர்வாரப்படுகின்றன. இந்த நிலையில் இந்த திட்டத்திற்கு ரூ 500 கோடி நிதி ஒதுக்கப்படும் என கடந்த தமிழக பட்ஜெட் கூட்டத்தொடரில் அறிவிக்கப்பட்டது.

ரூ 500 கோடி நிதி ஒதுக்கீடு

சிங்கார சென்னை 2.0 திட்டத்திற்கு ரூ 500 கோடி நிதி ஒதுக்கீடு செய்து அதற்கான அரசாணை வெளியிடப்பட்டுள்ளது. சென்னை மாநகராட்சியில் ஒவ்வொரு மண்டலங்களிலும் செயல்படுத்தப்படும் திட்டங்கள் இணையத்தின் மூலம் பார்த்து தெரிந்து கொள்ளலாம். அது போல் சாலை பணிகள் இருந்தால் அதற்கேற்ப போக்குவரத்தை மாற்றி கொள்ளும் வகையில் இணையதளத்தில் மாநகராட்சி சார்பில் தகவல்கள் வெளியிடப்படுகின்றன.