பட்டாசே! நாளை அதிகாலை முதல் மெட்ரோ ரயிலில் ஃப்ரீயா போகலாம்! மாரத்தான் பங்கேற்பாளர்களுக்கு சர்ப்ரைஸ்!

சென்னை: சென்னையில் மாரத்தான் பங்கேற்பாளர்கள் வசதிக்காக நாளை அதிகாலை 3.40 மணி முதல் சிறப்பு மெட்ரோ ரயில் இயக்கப்பட உள்ளது. மாரத்தானில் பங்கேற்போர், QR குறியீடு போடப்பட்ட அட்டையை பயன்படுத்தி கட்டணம் இன்றி இலவசமாக பயணிக்கலாம் என மெட்ரோ நிர்வாகம் அறிவித்துள்ளது.

4வது சர்வதேச கருணாநிதி நினைவு மாரத்தான் போட்டி ஞாயிற்றுக்கிழமையான நாளை (ஆகஸ்ட் 6) அதிகாலை 4 மணி முதல் காலை 11 மணி வரை நடைபெறுகிறது. இந்த போட்டி 5 கி.மீ, 10 கி.மீ, 21.1 கி.மீ, மற்றும் 42.2 கி.மீ என 4 பிரிவுகளில் நடைபெற உள்ளது. அனைத்துப் பிரிவு மாரத்தான் போட்டிகளும் மெரினா கடற்கரையில் உள்ள அண்ணா நினைவிடத்தில் தொடங்கி, தீவுத்திடல் மைதானத்தில் முடிவடைகிறது.

கருணாநிதி நினைவு சர்வதேச மாரத்தான் நாளை நடைபெறுவதையொட்டி, மாரத்தான் பங்கேற்பாளர்களின் வசதிக்காகவும், அவர்களுக்கு இடையூறு அற்ற எளிமையான பயண அனுபவத்தை வழங்கும் வகையில், சென்னை மெட்ரோ ரயில் நிறுவனம் மற்றும் கலைஞர் நினைவு சர்வதேச மாரத்தான் இடையே புரிந்துணர்வு ஒப்பந்தம் கையெழுத்தாகியுள்ளது.

அதன்படி, மாரத்தான் பங்கேற்பாளர்கள், மெட்ரோ ரயில் நிறுவனத்தின் QR குறியீடு போடப்பட்ட அட்டையை பயன்படுத்தி, நாளை அதிகாலை 3.40 மணி முதல் மதியம் 12.00 மணி வரை இருமுறை மட்டும் Round Trip, மெட்ரோ இரயிலில் எவ்வித கட்டணமும் இன்றி பயணம் செய்து கொள்ளலாம் எனத் தெரிவிக்கப்பட்டுள்ளது.

இதற்கான சிறப்பு மெட்ரோ ரயில் சேவைகள் மாரத்தானில் பங்கேற்பவர்களுக்கு மட்டும் பின்வரும் அட்டவணையின் படி இயக்கப்படுகிறது என மெட்ரோ நிர்வாகம் அறிவித்துள்ளது. அதன்படி, சைதாப்பேட்டையில் இருந்து அதிகாலை 3.40 மணிக்கு சென்னை அரசினர் தோட்டத்திற்கு முதல் மெட்ரோ ரயில் புறப்படும்.

சின்னமலை ஸ்டேஷனில், 3.50 மணிக்கும், கிண்டியில் இருந்து 3.55 மணிக்கும், விமான நிலையத்தில் இருந்து 4 மணிக்கும், விம்கோ நகர் ரயில் நிலையத்தில் இருந்து 4 மணிக்கும், விமான நிலையத்தில் இருந்து 4.10 மணிக்கும் மெட்ரோ ரயில் இயக்கப்படுகிறது.

வழக்கமான மெட்ரோ ரயில் சேவைகள் காலை 5 மணி முதல் இயக்கப்படும். மாரத்தான் பங்கேற்பாளர்கள் வசதிக்காக அதிகாலை 3.40 மணி முதல் நாளை இயக்கப்படுகிறது. எனவே மாரத்தான் பங்கேற்பாளர்கள் இந்த வசதியை முழுமையாக பயன்படுத்திக் கொள்ளுமாறு கேட்டுக்க்கொள்ளப்பட்டுள்ளனர்.

English summary

A special metro train service will be operated from 3.40 am tomorrow for the convenience of marathon participants in Chennai. The metro administration has announced that the participants of Kalaiganr Karunanidhi memorial marathon can travel free of charge using the QR code card.