ஸ்டாலினின் அடுத்த சிக்சர்.. 20,000 வேலை! ரூ.2,302 கோடி முதலீடு - தமிழ்நாட்டில் தைவான் காலணி கம்பெனி

சென்னை: காலணி உற்பத்தியில் உலகளவில் முன்னிலையில் இருந்து வரும் ஹை குளோரி ஃபுட்வேர் நிறுவனம் தமிழ்நாட்டில் 20 ஆயிரம் ஆயிரம் பேருக்கு வேலை வாய்ப்பை உருவாக்கும் வகையில் ரூ.2,302 கோடி மதிப்பில் முதலீடு செய்து உற்பத்தியை தொடங்குவதற்கான திட்டம் முதலமைச்சர் முக ஸ்டாலின் முன்னிலையில் கையெழுத்திடப்பட்டது.

தைவானை சேர்ந்த பௌ சென் என்ற குழுமத்தால் தயாரிக்கப்பட்டு வரும் ஹை க்ளோரி ஃபுட்வேர் இந்தியா பிரைவேட் லிமிடெட் என்ற காலணி நிறுவனம் உலகளவில் காலணி விற்பனை சந்தையில் முக்கிய இடத்தை பிடித்து உள்ளது. கோடிக்கணக்கான காலணிகளை உற்பத்தி செய்து வரும் இந்த நிறுவனம் ஆண்டுக்கு பல கோடி டாலர் கணக்கில் வருவாய் ஈட்டி வருகிறது.

இந்த நிலையில் தமிழ்நாட்டில் கள்ளக்குறிச்சி, உளுந்தூர்பேட்டை - சிப்காட் தொழிற்பூங்காவில் காலணிகளை உற்பத்தி செய்வதற்காக புரிந்துணர்வு ஒப்பந்தத்தை தமிழ்நாடு அரசுடன் கையெழுத்திட்டு இருக்கிறது. 12 ஆண்டுகளில் ரூ.2,302 கோடி முதலீடு செய்யும் இந்த நிறுவனத்தின் மூலமாக 20 ஆயிரம் பேர் வேலை வாய்ப்பு பெறுவார்கள் என்று எதிர்பார்க்கப்படுகிறது.

இதுகுறித்து தமிழ்நாடு முதலமைச்சரின் அதிகாரப்பூர்வ ட்விட்டர் பக்கத்தில் வெளியிடப்பட்டு இருக்கும் தகவலில், "உலக அளவில் காலணிகள் உற்பத்தியில் முன்னிலை வகிக்கும் தைவான் நாட்டின் பெள சென் (Pou Chen) குழுமத்தைச் சேர்ந்த ஹை க்ளோரி ஃபுட்வேர் இந்தியா பிரைவேட் லிமிடெட் (M/s High Glory Footwear India Private Limited) நிறுவனம், அடுத்த 12 ஆண்டுகளில் ரூ.2302 கோடி முதலீடு செய்துள்ளது.

20,000 நபர்களுக்கு வேலைவாய்ப்பு அளிக்கும் வகையில், கள்ளக்குறிச்சி மாவட்டம், சிப்காட்-உளுந்தூர்பேட்டை தொழிற்பூங்காவில், காலணிகள் உற்பத்திக்கான புதிய ஆலை நிறுவுவதற்கான புரிந்துணர்வு ஒப்பந்தம் மாண்புமிகு முதலமைச்சர் மு.க.ஸ்டாலின் அவர்கள் முன்னிலையில் மேற்கொள்ளப்பட்டது." என்று குறிப்பிடப்பட்டு இருக்கிறது.

இந்த ஒப்பந்தத்தின் மூலமாக கள்ளக்குறிச்சி மற்றும் சுற்றுவட்டாரப் பகுதிகளை சேர்ந்த ஆண்கள் மற்றும் பெண்களுக்கு அதிகளவில் வேலைவாய்ப்பு கிடைக்கும் என்று நம்பப்படுகிறது. பொதுவாகவே வட தமிழ்நாட்டில் ஆம்பூர், வாணியம்பாடி, ராணிப்பேட்டை, திருப்பத்தூர், வேலூர் சுற்றுவட்டார பகுதிகளில் லெதர் உற்பத்தி மற்றும் அது சார்ந்த தொழில்கள் பிரதானமாக உள்ளன.

இந்திய அளவில் லெதர் உற்பத்தி மற்றும் ஏற்றுமதியில் பிரதான இடம்பிடிக்கும் பகுதிகளாக ஆம்பூர், வாணியம்பாடி சுற்றுவட்டார பகுதிகள் இருந்து வருகின்றன. வட தமிழ்நாட்டை சேர்ந்த பல ஆயிரக்கணக்கான மக்களுக்கு இந்த லெதர் தொழிற்சாலைகள் வேலை வாய்ப்பை வழங்கி வரும் நிலையில், தைவான் நிறுவனத்தின் வருகையால் அவர்களுக்கான வேலை வாய்ப்பு பெருகும் என்ற நம்பிக்கை எழுந்து உள்ளது.

English summary

High Glory Footwear, a Taiwan footwear manufacturing company, signed a plan to invest Rs.2,302 crore and start production in Tamil Nadu to create employment opportunities for 20,000 people in the presence of Chief Minister MK Stalin.