கூண்டோடு காலியாகிறது.. விசிக டாப் தலைகள் மொத்தமாக திமுகவில் ஐக்கியம்? சில்லு சில்லாக சிதறுது!

Updated: Monday, May 25, 2026, 17:38 [IST]

Subscribe to Oneindia Tamil

சென்னை: தமிழகச் சட்டமன்றத் தேர்தல் முடிவுகள் வெளியாகிப் புதிய அரசு பதவியேற்றுள்ள நிலையிலும், மாநில அரசியல் களம் இன்னும் அமைதியடையவில்லை. அடுத்தடுத்து அரங்கேறும் அதிரடி அரசியல் நகர்வுகளால் தமிழக அரசியல் சூழல் தொடர்ந்து உச்சக்கட்ட பரபரப்பிலேயே நீடித்து வருகிறது.

ஒருபுறம் திமுக மற்றும் கூட்டணிக் கட்சிகளுக்கு இடையேயான உட்கட்சிப் பூசல்களும், மறுபுறம் அதிமுகவின் பிளவுகளும் தேர்தல் கடந்த பின்னரும் தமிழக அரசியலைத் தகித்துக்கொண்டிருக்கச் செய்துள்ளன.

திமுகவில் இணையும் முன்னாள் விசிக எம்.எல்.ஏ.க்கள்?

அரசியல் வட்டாரத்தில் தற்போது கசிந்துள்ள மிக முக்கியத் தகவல், விடுதலைச் சிறுத்தைகள் கட்சியின் (விசிக) முன்னணித் தலைவர்களாக வலம் வந்த முன்னாள் சட்டமன்ற உறுப்பினர்கள் 4 பேர் திமுகவில் இணையத் தயாராகி வருகிறார்கள் என்பதுதான்.

விசிகவின் முக்கிய முகங்களாக அறியப்பட்ட பனையூர் பாபு, ஆலூர் ஷாநவாஸ், சிந்தனைச் செல்வன் மற்றும் எஸ்.எஸ். பாலாஜி ஆகிய 4 முன்னாள் எம்.எல்.ஏ.க்களும் விரைவில் தங்களை திமுகவில் இணைத்துக் கொள்ளப் போவதாகத் தகவல்கள் வெளியாகி வருகின்றன. கடந்த தேர்தல் சமயத்தில் தொகுதிப் பங்கீடு மற்றும் கட்சிப் பொறுப்புகள் ரீதியாக ஏற்பட்ட சில அதிருப்திகளே இவர்களின் இந்த திடீர் முடிவுக்குக் காரணம் என்று கூறப்படுகிறது. விசிகவின் முக்கியத் தூண்களாகக் கருதப்பட்ட இந்த 4 பேர் திமுகவிற்கு மாறினால், அது விசிக தலைமைக்கு மிகப் பெரிய பின்னடைவாக அமையும் என்பதில் சந்தேகமில்லை.

அதிமுகவில் எடப்பாடி - வேலுமணி இடையே சமாதானப் பேச்சுவார்த்தை

மறுபுறம், அதிமுகவில் நிலவி வரும் உட்கட்சிப் மோதல்கள் தற்போது உச்சக்கட்டத்தை எட்டியுள்ளன. அதிமுக பொதுச்செயலாளர் எடப்பாடி பழனிசாமிக்கும், கட்சியின் முக்கியப் புள்ளியான எஸ்.பி. வேலுமணி தலைமையிலான அதிருப்தி (ரெபல்) முகாமிற்கும் இடையே தீவிரப் பனிப்போர் நடந்து வந்தது.

இந்தச் சூழலில், இரு தரப்பிற்கும் இடையேயான சமாதானப் பேச்சுவார்த்தை விரைவில் சென்னையில் நடைபெற உள்ளதாகத் தெரிகிறது. கட்சியின் மூத்த தலைவர்கள் சிலர் இரு தரப்பையும் அமர வைத்துப் பேசத் திட்டமிட்டுள்ளனர்.

பின்னணி என்ன?

சட்டமன்றத் தேர்தல் முடிவுகளுக்குப் பின், தமிழக வெற்றிக் கழகத் தலைவர் விஜய் தலைமையில் புதிய அரசு அமைந்ததைத் தொடர்ந்து, எஸ்.பி. வேலுமணி மற்றும் சி.வி. சண்முகம் தலைமையிலான அணியினர் தவெக அரசுக்கு ஆதரவளிக்கத் தயாராகினர். விஜய்யோடு நெருக்கம் காட்டி, புதிய ஆட்சியில் முக்கியப் பங்கைப் பெறலாம் என வேலுமணி தரப்பு கணக்கு போட்டது.

கைவிட்ட தவெக : பலமிழந்த வேலுமணி முகாம்!

இருப்பினும், வேலுமணி முகாமின் கணக்குகள் தவிடுபாடியாயின. ஆட்சியில் தங்களுக்குப் பங்கு கிடைக்கும் என்று எதிர்பார்த்த வேலுமணி தரப்பினருக்கு, தவெக அரசில் எந்த ஒரு அமைச்சர் பதவியோ அல்லது முக்கியப் பொறுப்போ வழங்கப்படவில்லை. நடிகர் விஜய் இவர்களைக் கண்டுகொள்ளாமல் ஒதுக்கியதால், வேலுமணி முகாம் தங்களது அரசியல் பிடியை இழந்து பலவீனமடைந்தது.

தவெக அரசிடம் இருந்து எதிர்பார்த்த ஆதரவு கிடைக்காததால், வேறு வழியின்றி மீண்டும் எடப்பாடி பழனிசாமியுடன் சமரசம் செய்துகொள்ளும் நிலைக்கு வேலுமணி தரப்பு தள்ளப்பட்டுள்ளது. இந்த பலவீனத்தைப் பயன்படுத்திக் கொண்டு, கட்சியில் தனது ஒற்றைத் தலைமைப் பிடியை மேலும் வலுவாக்க எடப்பாடி பழனிசாமி திட்டமிட்டு வருகிறார்.

தேர்தல் முடிந்து புதிய ஆட்சி அமைந்தாலும், கட்சித் தாவல்களும், சமாதானப் பேச்சுவார்த்தைகளும், ரகசியக் கூட்டங்களுமாகத் தமிழக அரசியல் களம் இன்னும் சில காலத்திற்கு ஓயாது என்றே தோன்றுகிறது.