‛மே 10’.. 10ம் வகுப்பு ரிசல்ட் தேதி அறிவிப்பு.. எப்படி பார்க்கலாம் தெரியுமா? அதிகாரப்பூர்வ அறிவிப்பு

சென்னை: தமிழகத்தில் 10ம் வகுப்பு பொதுதேர்வு முடிவுகள் நாளை மறுநாள் (மே 10ம் தேதி) காலை 9.30 மணிக்கு வெளியாகிறது என்று அரசு தேர்வுகள் இயக்கம் அறிவித்துள்ளது.

தமிழகத்தில் 12ம் வகுப்பு பொதுத்தேர்வு முடிவுகள் நேற்று முன்தினம் வெளியிடப்பட்டன. இதையடுத்து 10ம் வகுப்பு மாணவ-மாணவிகளுக்கான பொதுத்தேர்வு முடிவுகளை வெளியிடுவதற்கான ஏற்பாடுகள் தீவிரமாக மேற்கொள்ளப்பட்டு வந்தன.

தமிழகத்தை பொறுத்தவரை 10ம் வகுப்பு பொதுத்தேர்வு என்பது கடந்த மார்ச் மாதம் 26ம் தேதி தொடங்கி ஏப்ரல் மாதம் 8ம் தேதி வரை நடந்தது. அதன்பிறகு விடுமுறை வழங்கப்பட்டது.

தமிழகத்தை பொறுத்தவரை மொத்தம் 9.10 லட்சம் மாணவ-மாணவிகள் தேர்வு எழுதினர். இதில் 4.57 லட்சம் பேர் மாணவர்கள். 4.52 லட்சம் பேர் பெண்கள். ஒரு 3ம் பாலினத்தவர் ஆவார்கள். இதையடுத்து 10ம் வகுப்பு மாணவ-மாணவிகளின் தேர்வு விடைத்தாள் திருத்தும் பணி தீவிரமாக நடந்து வந்தது. இந்த பணிகள் முடிவடைந்த நிலையில் ரிசல்ட் வெளியிடுவதற்கான ஏற்பாடுகள் தொடங்கப்பட்டன.

இந்நிலையில் தான் 10ம் வகுப்பு தேர்வு முடிவு வெளியாகும் தேதி அதிகாரப்பூர்வமாக அறிவிக்கப்பட்டுள்ளது. அதாவது 10ம் வகுப்பு தேர்வு முடிவுகள் மே மாதம் 10ம் தேதி (நாளை மறுநாள்) வெளியிடப்படும் என தேர்வுத்துறை இயக்குனர் சேதுராம வர்மா அதிகாரப்பூர்வமாக அறிவித்துள்ளார். இதுதொடர்பாக அவர் வெளியிட்டுள்ள அறிக்கையில் கூறப்பட்டுள்ளதாவது:

தமிழகத்தில் 10ம் வகுப்பு பொதுத்தேர்வு முடிவுகள் மே 10ம் தேதி காலை 9.30 மணிக்கு சென்னையில் உள்ள தேர்வுத்துறை இயக்குனர் அலுவலகத்தில் வெளியிடப்படும். அன்றைய தினம் மாணவ மாணவிகள் www.tnresults.nic.in, www.dge.tn.gov.in, https://results.digilocker.gov.in/ ஆகிய இணையதளங்களில் தேர்வு முடிவுகளை அறிந்து கொள்ளலாம்.

மேலும் தேர்வு எழுதிய மாணவர்களின் பதிவு செய்யப்பட்ட செல்போன் எண்களுக்கும் குறுஞ்செய்தி வாயிலாக தேர்வு முடிவுகள் அனுப்பி வைக்கப்பட உள்ளது. அதேபோல் நூலகங்களில், மாவட்ட ஆட்சியர் அலுவலகங்களில் உள்ள தேசிய தகவலியல் மையங்களிலும் தேர்வு முடிவுகள் வெளியிடப்படும்'' என தெரிவிக்கப்பட்டுள்ளது.

English summary

SSLC Exam Results 2024: Tamil Nadu 10th class exam results will be released on May 10th at 9.30 am.