எந்தவொரு நுழைவுத் தேர்வும் கூடாது.. தமிழக அரசின் மாநில கல்விக் கொள்கை.. நாளை வெளியிடும் ஸ்டாலின்?

Updated: Thursday, August 7, 2025, 15:49 [IST]

Subscribe to Oneindia Tamil

சென்னை: மாநில கல்விக் கொள்கையை முதல்வர் மு.க.ஸ்டாலின் நாளை வெளியிட உள்ளதாகத் தகவல் வெளியாகி இருக்கிறது. 650 பக்கங்கள் கொண்டு கல்விக் கொள்கை அறிக்கையைக் கடந்த ஆண்டு ஜூலை மாதம் சமர்ப்பிக்கப்பட்ட நிலையில், இதன் முழு அறிக்கை வெளியிடப்படாமல் இருந்தது.

மத்திய அரசு நாடு தழுவிய அளவில் புதிய கல்விக் கொள்கையை 2020ஆம் ஆண்டு வெளியிட்டது. மத்திய அரசின் இந்த கல்விக் கொள்கைக்கு, தமிழ்நாட்டில் கடுமையான எதிர்ப்புகள் கிளம்பின. இந்த நிலையில் 2021ஆம் ஆண்டு சட்டசபைத் தேர்தலில் வென்று ஆட்சியமைத்த திமுக, மாநில கல்விக் கொள்கையை உருவாக்க உள்ளதாக முதல் பட்ஜெட்டிலேயே அறிவித்தது.

இதற்காக முன்னாள் நீதிபதி முருகேசன் தலைமையில் ஒரு குழு அமைக்கப்பட்டது. இந்த குழு தமிழ்நாடு முழுவதும் பயணம் செய்து ஆசிரியர்கள், மாணவர்கள், பெற்றோர், கல்வியாளர்கள், சமூக ஆர்வலர்கள் என்று பல்வேறு தரப்பினரிடம் கருத்துக்களை பெற ஆலோசனை கூட்டம் நடத்தியது. அதில் பெற்ற கருத்துக்களின் அடிப்படையில் மாநில கல்விக் கொள்கை அறிக்கை தயாரிக்கப்பட்டது.

இதன்பின் முன்னாள் நீதிபதி முருகேசன் தலைமையிலான குழுவால் தயாரிக்கப்பட்ட மாநில கல்விக் கொள்கை வரைவு அறிக்கை கடந்த ஆண்டு ஜூலை மாதம் முதல்வர் ஸ்டாலினிடம் சமர்ப்பிக்கப்பட்டது. இதனைப் பெற்றுக் கொண்ட தமிழக அரசு, உடனடியாக அந்த அறிக்கையை வெளியிடவில்லை. இதனால் பல்வேறு கட்சிகளும் கேள்வி எழுப்பி வந்தனர்.

இந்த நிலையில் தமிழில் 650 பக்கங்களிலும், ஆங்கிலத்தில் 500 பக்கங்களிலும் கொண்ட மாநில கல்விக் கொள்கையை நாளை முதல்வர் ஸ்டாலின் வெளியிட உள்ளதாகத் தகவல் வெளியாகி இருக்கிறது. அந்த அறிக்கையில், 3, 5, மற்றும் 8 ஆகிய வகுப்புகளுக்குப் பொதுத்தேர்வு கூடாது என்றும், தமிழ் மற்றும் ஆங்கிலம் ஆகிய இருமொழிக் கொள்கையை கடைப்பிடிக்க வேண்டும் என்று பரிந்துரை செய்யப்பட்டுள்ளதாகத் தெரிய வந்துள்ளது.

அதேபோல் பள்ளிகளில் சேர்வதற்கு எந்தவிதமான நுழைவுத் தேர்வையும் நடத்த கூடாது என்றும், இலவச சைக்கிள் வழங்கும் திட்டத்தை 11ஆம் வகுப்பில் செயல்படுத்துவதற்குப் பதிலாக 9ஆம் வகுப்பில் செயல்படுத்தலாம் என்று பரிந்துரைக்கப்பட்டுள்ளது. கல்லூரிச் சேர்க்கையைப் பொறுத்தவரை 11 மற்றும் 12 ஆகிய வகுப்பில் பெற்ற மதிப்பெண்களை வைத்தே உயர்கல்வி நிலையங்களில் மாணவர்களைச் சேர்க்க வேண்டும் என்று பரிந்துரை செய்யப்பட்டிருக்கிறது.