ஆக்ரோஷமோ அமைதியோ.. எப்படி வந்தாலும் இந்தி திணிப்பை தமிழ்நாடு ஏற்காது: அமித் ஷாவுக்கு உதயநிதி ரிப்ளை!

சென்னை: ஆக்ரோஷமாக வந்தாலும் அமைதியாக வந்தாலும், இந்தி திணிப்பை தமிழ்நாடு ஒருபோதும் ஏற்காது, மொழியை திணிப்பதை பா.ஜ.கவும், மத்திய அரசும் நிறுத்திக் கொள்ள வேண்டும் என அமைச்சர் உதயநிதி ஸ்டாலின் தெரிவித்துள்ளார்.

டெல்லியில் நேற்று அலுவல் மொழிக்கான 38 வது நாடாளுமன்ற குழுக்கூட்டம் டெல்லியில் நடந்தது. இந்த கூட்டத்துக்கு மத்திய உள்துறை அமைச்சர் அமித் ஷா தலைமை தாங்கினார். இந்த கூட்டத்தில் அமித் ஷா பங்கேற்று இந்தி மொழி குறித்து பேசினார். அப்போது "இந்தி மொழி என்பது உள்ளூர் மொழிகளுக்கு போட்டி இல்லை. இந்தி மொழியை அனைவரும் எதிர்ப்பு இன்றி ஏற்க வேண்டும்" என அமித்ஷா கூறினார்.

அமித்ஷாவின் இந்தப் பேச்சுக்கு பல்வேறு தலைவர்களும் எதிர்ப்பு தெரிவித்து வருகின்றனர். மத்திய பாஜக அரசு மீண்டும் இந்தியை திணிக்க முயற்சிப்பதாக அரசியல் தலைவர்கள் குற்றம்சாட்டி உள்ளனர். தமிழ்நாடு இளைஞர் நலன் மற்றும் விளையாட்டுத் துறை அமைச்சர் உதயநிதி ஸ்டாலினும், அமித் ஷா பேச்சுக்கு கண்டனம் தெரிவித்துள்ளார்.

இந்தியை அனைவரும் ஏற்றுக்கொள்ள வேண்டும் என்ற ஒன்றிய உள்துறை அமைச்சர் @AmitShah- வின் பேச்சை ஒரு போதும் ஏற்க முடியாது.

தமிழ்நாட்டிற்கோ, தமிழர்கள் அதிகம் வாழுகின்ற நாடுகளுக்கோ சென்றால் தமிழைப் போற்றுவது, வடக்கே சென்றால் இந்தியை தூக்கிப்பிடித்து, மற்ற பிராந்திய மொழிகளை “Local…

— Udhay (@Udhaystalin) August 5, 2023

உதயநிதி ஸ்டாலின் தனது ட்விட்டர் பக்கத்தில், "இந்தியை அனைவரும் ஏற்றுக்கொள்ள வேண்டும் என்ற மத்திய உள்துறை அமைச்சர் அமித்ஷாவின் பேச்சை ஒரு போதும் ஏற்க முடியாது. தமிழ்நாட்டிற்கோ, தமிழர்கள் அதிகம் வாழுகின்ற நாடுகளுக்கோ சென்றால் தமிழைப் போற்றுவது, வடக்கே சென்றால் இந்தியை தூக்கிப்பிடித்து, மற்ற பிராந்திய மொழிகளை "Local Language" என்று சுருக்குவது எனும் பா.ஜ.கவின் இந்த இரட்டை நிலைப்பாட்டை வன்மையாக கண்டிக்கிறோம்.

ஆக்ரோஷமாக வந்தாலும் - அமைதியாக வந்தாலும், இந்தி திணிப்பை என்றைக்கும் தமிழ்நாடு ஏற்காது. பல மொழிகள் , இனங்கள், மதங்கள் என பன்முகத்தன்மை கொண்ட இந்தியாவில், ஒரே மதம், ஒரே நாடு, ஒரே மொழி கொள்கையை திணிப்பதை பா.ஜ.க.வும், மத்திய அரசும் நிறுத்திக் கொள்ள வேண்டும்" எனத் தெரிவித்துள்ளார்.

English summary

Minister Udhayanidhi Stalin has said that Tamil Nadu will never accept the imposition of Hindi, whether it comes aggressively or peacefully.