சூப்பர் செய்தி..!இன்று 2652 பேருக்கு மட்டுமே வைரஸ் தொற்று..20 மாவட்டங்களில் கொரோனா உயிரிழப்பு இல்லை

Published: Monday, July 12, 2021, 21:40 [IST]

Subscribe to Oneindia Tamil

சென்னை: தமிழ்நாட்டில் இன்று 2,652 பேருக்கு மட்டுமே வைரஸ் பாதிப்பு உறுதி செய்யப்பட்டுள்ளது. தலைநகர் சென்னையில் நேற்று ஒருவர்கூட கொரோனாவால் உயிரிழக்காத நிலையில், இன்று 6 பேர் பலியாகியுள்ளனர்.

தமிழ்நாட்டில் கொரோனா பாதிப்பு அதிகரிக்கத் தொடங்கியதால், கடந்த மே மாதம் ஊரடங்கு அமல்படுத்தப்பட்டது. அப்போது முதலே வைரஸ் பாதிப்பு மாநிலத்தில் மெல்லக் குறைந்து வருகிறது.

அதன்படி இன்றும் தொடர்ந்து 52ஆவது நாளாகத் தமிழ்நாட்டில் கொரோனா பாதிப்பு குறைந்துள்ளது,

தினசரி கொரோனா பாதிப்பு

தமிழ்நாட்டில் இன்று மொத்தம் 1.40 லட்சம் பேருக்கு கொரோனா பரிசோதனை செய்யப்பட்டது. அதில் வெளி மாநிலங்களில் இருந்து திரும்பிய ஒருவர் உட்பட 2652 பேருக்கு வைரஸ் பாதிப்பு உறுதி செய்யப்பட்டுள்ளது. அதேபோல இன்று கொரோனா உறுதி செய்யப்பட்டவர்களில் 131 பேர் 12 வயதுக்கு உட்பட்ட சிறார்கள் ஆகும்

கொரோனா உயிரிழப்புகள்

இன்று மாநிலம் முழுவதும் 36 பேர் கொரோனாவால் உயிரிழந்துள்ளனர். இன்று உயிரிழந்தவர்களில் 7 பேர் எவ்வித இணை நோய் இல்லாதவர்கள், 9 பேர் 50 வயதுக்குக் குறைவானவர்கள் ஆகும். மேலும், இன்று உயிரிழந்தவர்களில் 24 பேர் அரசு மருத்துவமனைகளிலும் 12 பேர் தனியார் மருத்துவமனைகளிலும் சிகிச்சை பெற்று வந்தவர்கள். தமிழ்நாட்டில் ஒட்டுமொத்தமாக 33454 பேர் கொரோனாவால் பலியாகியுள்ளனர்.

ஆக்டிவ் கேஸ்கள்

தனிமையில் உள்ளவர்கள் உட்பட மொத்தம் 31,819 கொரோனா நோயாளிகள் தற்போது மாநிலத்தில் சிகிச்சை பெற்று வருகின்றனர். இன்று மட்டும் 3,104 பேர் கொரோனாவில் இருந்து குணமடைந்து டிஸ்சார்ஜ் செய்யப்பட்டுள்ளனர். தமிழ்நாட்டில் ஒட்டுமொத்தமாக இதுவரை 24,56,165 பேர் கொரோனாவில் இருந்து மீண்டுள்ளனர்.

மாவட்ட ரீதியாக வைரஸ் பாதிப்பு

இன்று அதிகபட்சமாகக் கோவை மாவட்டத்தில் இன்று 290 பேருக்கு வைரஸ் பாதிப்பு உறுதி செய்யப்பட்டுள்ளது. அதைத் தொடர்ந்து ஈரோட்டில் 193 பேருக்கும் தஞ்சையில் 191 பேருக்கும் வைரஸ் கண்டறியப்பட்டுள்ளது. அதேபோல செங்கல்பட்டு (139), சேலம் (170), திருப்பூர் (157), திருச்சி (103) ஆகிய மாவட்டங்களில் வைரஸ் பாதிப்பு 100க்கு மேல் உள்ளது.

தலைநகர் சென்னை

தலைநகர் சென்னையில் 165 பேருக்கு வைரஸ் பாதிப்பு உறுதி செய்யப்பட்டுள்ளது. நேற்று தலைநகர் சென்னையில் சுமார் 130 நாட்களுக்குப் பிறகு கொரோனா உயிரிழப்பு ஏற்படாமல் இருந்தது. ஆனால், இன்று ஆறு பேர் தலைநகரில் கொரோனாவால் உயிரிழந்துள்ளனர். அதேநேரம் கோவை, மதுரை உள்ளிட்ட 20 மாவட்டங்களில் கொரோனா உயிரிழப்பு இல்லை.

Published On July 12, 2021