போக்கு காட்டும் ஆகாஷ் பாஸ்கரன்.. சம்மன் அனுப்பியும் ஆஜராகவில்லை! ஈடியின் அடுத்த மூவ் என்ன?
சென்னை: டாஸ்மாக் வழக்கு தொடர்பாக நுங்கம்பாக்கத்தில் உள்ள அமலாக்கத்துறை அலுவலகத்தில் நேரில் ஆஜராகும்படி ஆகாஷ் பாஸ்கரனுக்கு சம்மன் அனுப்பப்பட்டது. அதன்படி, டாஸ்மாக் துறை உயர் அதிகாரிகள் இன்று விசாரணைக்கு ஆஜர் ஆன நிலையில், இந்த விவகாரத்தில் முக்கிய நபராக பார்க்கப்படும் ஆகாஷ் பாஸ்கரன் ஆஜர் ஆகவில்லை.
டாஸ்மாக் தலைமை அலுவலகம் மற்றும் மதுபான ஆலைகளில் அமலாக்கத்துறை சார்பாக கடந்த மார்ச் மாதம் அதிரடி சோதனை நடத்தியது. அமலாக்கத்துறை நடத்திய இந்த சோதனையில், டாஸ்மாக் நிறுவனத்தில் ரூ.1000 கோடி முறைகேடு நடந்திருப்பதாக அமலாக்கத்துறை குற்றம் சாட்டியது. இதனையடுத்து கடந்த சில நாட்களுக்கு முன்பாக, சென்னையில் 10-க்கும் மேற்பட்ட இடங்களில் அமலாக்கத்துறை சோதனை நடத்தியது.
மணப்பாக்கம் சி.ஆர். புரத்தில் உள்ள டாஸ்மாக் நிர்வாக இயக்குநர் விசாகன் இல்லம், சூளைமேடு பகுதியில் இருக்கும் எஸ்.என்.ஜே நிறுவனம், தேனாம்பேட்டையில் உள்ள திரைப்பட தயாரிப்பாளர் ஆகாஷ் பாஸ்கரன் வீடு மற்றும் திருவல்லிக்கேணியில் உள்ள தொழிலதிபர் தேவக்குமார் இல்லத்திலும் அமலாக்கத் துறையினர் பல்வேறு இடங்களில் சோதனை நடத்தினர்.
இட்லி கடை, பராசக்தி உள்ளிட்ட படங்களின் தயாரிப்பாளரான ஆகாஷ் பாஸ்கரனுக்கு சொந்தமான இடங்களில் அமலாக்கத்துறை சோதனை நடத்தியது அரசியல் வட்டாரத்தில் மட்டுமின்றி திரைத்துறையிலும் பரபரப்பை ஏற்படுத்தியது. இந்த சோதனையின் போது பல்வேறு முக்கிய தகவல்கள் கிடைத்ததாக சொல்லப்படுகிறது. இந்த நிலையில்தான், ஆகாஷ் பாஸ்கரனுக்கு இன்று ஆஜராகும்படி அமலாக்கத்துறை சம்மன் அனுப்பியது.
பலமுறை தொடர்பு கொண்ட பிறகும் ஆகாஷ் பாஸ்கரன் விசாரணைக்கு ஆஜராகவில்லை என்று சொல்லப்படும் நிலையில், இன்றும் தற்போது வரை ஆகாஷ் பாஸ்கரன் ஆஜர் ஆகவில்லை. நுங்கம்பாக்கத்தில் உள்ள அமலாக்கத்துறை அலுவலகத்தில் ஆஜராகும்படி சம்மன் அனுப்பப்பட்டுள்ளது. டாஸ்மாக் துறை உயர் அதிகாரிகள் இன்று விசாரணைக்கு ஆஜர் ஆன நிலையில், இந்த விவகாரத்தில் முக்கிய நபராக பார்க்கப்படும் ஆகாஷ் பாஸ்கரன் ஆஜர் ஆகவில்லை.
துரைராஜ் செல்வராஜ் என்ற தொழிலதிபருக்கும் சம்மன் அனுப்பப்பட்ட நிலையில் அவரும் ஆஜர் ஆகவில்லை எனத்தெரிகிறது. ஆகாஷ் பாஸ்கரன் ஆஜர் ஆகாத நிலையில், அவர் எங்கு உள்ளார்? என்ற விவரங்களை சேகரிக்கும் பணியில் அமலாக்கத்துறை ஈடுபட்டுள்ளதாக சொல்லப்படுகிறது.
Click it and Unblock the Notifications
Sign in with Google