4 தொகுதி இடைத்தேர்தல்: இறுதி வேட்பாளர் பட்டியல் வெளியீடு

சென்னை: இடைத்தேர்தல் நடைபெறவுள்ள 4 சட்டமன்ற தொகுதிகளில் இறுதி வேட்பாளர் பட்டியல் வெளியிடப்பட்டுள்ளது.

தமிழகத்தில் 38 நாடாளுமன்ற தொகுதிக்கும், 18 சட்டமன்ற தொகுதிக்கான இடைத்தேர்தல் கடந்த மாதம் 18ம் தேதி நடைபெற்றது. வேலூர் நாடாளுமன்ற தொகுதியில் மட்டும் தேர்தல் ரத்து செய்யப்பட்டது.

இந்நிலையில், தமிழகத்தில் மேலும் காலியாக இருந்த சூலூர், அரவக்குறிச்சி, திருப்பரங்குன்றம், ஓட்டப்பிடாரம் ஆகிய 4 சட்டமன்ற தொகுதிக்கான இடைத்தேர்தல் மே 19ம் தேதி நடைபெறும் என்று இந்திய தேர்தல் ஆணையம் அறிவித்தது.

256 பேர்

இந்த 4 தொகுதியில் போட்டியிட திமுக, அதிமுக, அமமுக, மக்கள் நீதி மய்யம், நாம் தமிழர் கட்சி மற்றும் சுயேட்சை வேட்பாளர்கள் வேட்புமனு தாக்கல் செய்தனர். வேட்புமனு தாக்கல் நிறைவடைந்துள்ள நிலையில் 4 சட்டமன்ற தொகுதியிலும் மொத்தம் 256 பேர் வேட்புமனு தாக்கல் செய்திருந்தனர்.

மனுக்கள் தள்ளுபடி

இதைத்தொடர்ந்து நேற்று முன்தினம் வேட்பு மனுக்கள் மீது பரிசீலனை நடைபெற்றது. வேட்புமனு பரிசீலனையின் முடிவில் முறையான ஆவணங்கள் இல்லாததால் 104 பேரின் மனுக்கள் தள்ளுபடி செய்யப்பட்டது.

137 வேட்பாளர்கள்

152 பேரது மனுக்கள் ஏற்றுக்கொள்ளப்பட்டது. இந்நிலையில் வேட்புமனுவை திரும்பப்பெற இன்று கடைசி நாள் என்பதால் 15 பேர் தங்களது வேட்புமனுக்களை திரும்ப பெற்றுக்கொண்டனர். இதன்மூலம் 4 தொகுதி இடைத்தேர்தலில் மொத்தம் 137 வேட்பாளர்கள் களத்தில் உள்ளனர்.

63 வேட்பாளர்கள்

அரவக்குறிச்சி சட்டமன்ற தொகுதியில் 63 வேட்பாளர்கள் களத்தில் உள்ளனர். அரவக்குறிச்சியில் வேட்புமனு தாக்கல் செய்த 68 பேரில் 5 சுயேட்சைகள் மனுவை திரும்ப பெற்றுக்கொண்டனர்.

3 வேட்புமனுக்கள் வாபஸ்

ஒட்டப்பிடாரம் சட்டமன்ற தொகுதியில் 15 வேட்பாளர்கள் களத்தில் உள்ளனர். மொத்தம் 41 வேட்புமனுக்களில் 23 வேட்புமனுக்கள் நிராகரிக்கப்பட்டது. 3 வேட்புமனுக்கள் திரும்ப பெறப்பட்டன.

37 பேர் போட்டி

திருப்பரங்குன்றம் சட்டமன்ற தொகுதியில் 37 வேட்பாளர்கள் களத்தில் உள்ளனர். திருப்பரங்குன்றத்தில் வேட்புமனு தாக்கல் செய்த 44 பேரில் 7 பேர் வேட்புமனுவை திரும்ப பெற்றுக்கொண்டனர்.

22 வேட்பாளர்கள் போட்டி

சூலூர் சட்டமன்ற தொகுதியில் 22 வேட்பாளர்கள் போட்டியிடுகின்றனர். இத்தொகுதியில் வேட்பாளர்கள் யாரும் வேட்புமனுவை திரும்பப் பெறவில்லை என்பது குறிப்பிடத்தக்கது.

English summary

The final candidate list has been issued in the four assembly constituencies to be held in the by-elections.