காமராஜர், ஜெ.விற்கு வந்த அதே சான்ஸ்.. ஸ்டாலின் கதவை தட்டும் மிகப்பெரிய வாய்ப்பு.. அப்போ ராகுல்?

Updated: Thursday, February 19, 2026, 9:33 [IST]

Subscribe to Oneindia Tamil

சென்னை: இந்திய அரசியலின் களநிலவரம் தற்போது தெற்கு நோக்கித் திரும்பியுள்ளது. தேசிய அளவில் பா.ஜ.க. மற்றும் பிரதமர் மோடியைத் தடுத்து நிறுத்த எதிர்க்கட்சிகள் போராடி வரும் வேளையில், 'இந்தியா' (INDIA) கூட்டணியை ஒருங்கிணைக்கும் தலைமைப் பொறுப்பை ஏற்கத் தமிழக முதல்வர் மு.க. ஸ்டாலினுக்கு மிகப் பெரிய வாய்ப்பு உருவாகியுள்ளதாக அரசியல் வட்டாரங்கள் தெரிவிக்கின்றன.

கடந்த சில நாட்களாக டெல்லி முதல் சென்னை வரை இது குறித்த விவாதங்களே உரக்க ஒலிக்கின்றன. குறிப்பாக, காங்கிரஸ் கட்சியின் மூத்த தலைவர் மணி சங்கர் அய்யர் பிப்ரவரி 16 அன்று வெளியிட்ட கருத்து, இந்த விவாதத்திற்குப் பெரும் உத்வேகத்தைத் தந்துள்ளது. "இந்தியா கூட்டணியை வலுப்படுத்தவும், ஒருங்கிணைக்கவும் மிகச் சரியான நபர் மு.க. ஸ்டாலின் தான்" என்று அவர் புகழாரம் சூட்டியுள்ளார்.

tamil nadu assembly elections 2026 congress

காமராஜருடன் ஒப்பீடு

1960-களில் இந்திய அரசியலில் 'கிங் மேக்கராக' திகழ்ந்த பெருந்தலைவர் காமராஜருடன் ஸ்டாலினை மணி சங்கர் அய்யர் ஒப்பிட்டுப் பேசியுள்ளது முக்கியத்துவம் வாய்ந்தது. காமராஜர் எவ்வாறு பிரதமர் பதவியை மறுத்துவிட்டு, தகுதியானவர்களைத் தேர்ந்தெடுத்து கூட்டணியை வழிநடத்தினாரோ, அதேபோல் ஸ்டாலினும் ராகுல் காந்தி பிரதமராவதற்குத் தடையாக இருக்காமல், ஒட்டுமொத்த கூட்டணியையும் அரவணைத்துச் செல்லும் 'ஒருங்கிணைப்பாளர்' பாத்திரத்தை ஏற்க முடியும் என்று அவர் சுட்டிக்காட்டியுள்ளார்.

வலுபெறும் ஆதரவு

ஸ்டாலினின் இந்த தேசியத் தலைமைக்குத் தமிழகத்தில் மட்டுமல்லாது, தேசிய அளவிலும் ஆதரவு பெருகி வருகிறது:

திருமாவளவன் (விசிக): "மணி சங்கர் அய்யரின் கருத்தை நான் வழிமொழிகிறேன். ஸ்டாலின் தலைமையில் எதிர்க்கட்சிகள் இணைவது பொருத்தமாக இருக்கும்," என்று பிப்ரவரி 18 அன்று அவர் ஆதரவு தெரிவித்தார்.

உத்தவ் தாக்கரே (சிவசேனா - UBT): சிவசேனாவின் அதிகாரப்பூர்வ நாளேடான 'சாம்னா'வில், மம்தா பானர்ஜி அல்லது மு.க. ஸ்டாலின் போன்ற ஒரு வலிமையான ஆளுமை இந்தியா கூட்டணிக்குத் தலைமை தாங்க வேண்டும் என்று தலையங்கம் எழுதப்பட்டுள்ளது.

கார்த்தி சிதம்பரம் (காங்கிரஸ்): சிவகங்கையில் செய்தியாளர்களிடம் பேசிய அவர், "இந்தியா கூட்டணியை ஒருங்கிணைக்கும் தகுதி முதல்வர் ஸ்டாலினுக்கு முழுமையாக உள்ளது," என்று குறிப்பிட்டுள்ளார்.

ஸ்டாலின் ஏன் தகுதியானவர்?

வெறும் அரசியல் கோஷங்களை முன்வைக்காமல், 'மாநில சுயாட்சி' மற்றும் 'கூட்டாட்சி தத்துவம்' ஆகியவற்றைத் தனது ஆயுதமாக ஸ்டாலின் ஏந்தியுள்ளார். பிப்ரவரி 18 அன்று தமிழக சட்டப்பேரவையில் மத்திய-மாநில உறவுகள் குறித்த நீதியரசர் குரியன் ஜோசப் குழுவின் அறிக்கையைத் தாக்கல் செய்ததன் மூலம், தேசிய அளவில் மாநில உரிமைகளுக்காகக் குரல் கொடுக்கும் முக்கியத் தலைவராக அவர் உருவெடுத்துள்ளார்.

தமிழக அரசியலின் ஆளுமைகளான காமராஜர் மற்றும் ஜெயலலிதா ஆகிய இருவரும் தேசிய அரசியலில் மிகப்பெரிய தாக்கத்தை ஏற்படுத்தியவர்கள். காமராஜர், அகில இந்திய காங்கிரஸ் தலைவராகப் பொறுப்பேற்று, நேருவுக்குப் பிறகு லால் பகதூர் சாஸ்திரி மற்றும் இந்திரா காந்தி ஆகிய இருவரைப் பிரதமராக்கிய 'கிங் மேக்கராக'த் திகழ்ந்தார்; இன்றும் டெல்லி அரசியலில் ஒரு தமிழரின் ஆளுமைக்குச் சிறந்த உதாரணமாக அவர் போற்றப்படுகிறார்.

அதேபோல், 1990-களின் பிற்பகுதியில் தேசிய அரசியலின் திசையைத் தீர்மானிக்கும் சக்தியாக ஜெயலலிதா உருவெடுத்தார். 1998-ல் வாஜ்பாய் தலைமையிலான மத்திய அரசு அமைவதற்கும், பின்னர் ஓராண்டு கழித்து அந்த அரசு வீழ்வதற்கும் அவரே காரணமாக இருந்ததன் மூலம், ஒரு மாநிலக் கட்சியின் தலைவராக இருந்துகொண்டு இந்தியாவையே தன் பக்கம் திரும்பிப் பார்க்க வைத்தார். அதேபோல் கடைசி காலத்தில் மோடிக்கு எதிராக லேடி என்ற இமேஜ் கொண்டு தேசிய அளவில் கவனிக்கப்பட்டார்.

எதிர்கால சவால்

தமிழகத்தில் 2026 சட்டப்பேரவைத் தேர்தலில் தி.மு.க. தனித்துப் பெரும்பான்மை பெற்று ஆட்சி அமைக்க வேண்டும் என்பதில் ஸ்டாலின் உறுதியாக இருக்கிறார். அதே சமயம், தேசிய அளவில் மோடியின் செல்வாக்கிற்குச் சவால் விடக்கூடிய ஒரு 'நிதானமான மற்றும் அனுபவம் வாய்ந்த' தலைவராக ஸ்டாலினை வடமாநிலக் கட்சிகளும் ஏற்கத் தொடங்கியிருப்பது இந்திய அரசியலில் ஒரு புதிய திருப்பமாகக் கருதப்படுகிறது.