Sasikanth Senthil: போன் போட்ட ஸ்டாலின், ராகுல்! உண்ணாவிரதத்தை கைவிட்ட சசிகாந்த் செந்தில் எம்பி!

Updated: Tuesday, September 2, 2025, 7:06 [IST]

Subscribe to Oneindia Tamil

சென்னை: தமிழகத்திற்கு வழங்க வேண்டிய ரூ 2,152 கோடி கல்வி நிதியை வழங்காத மத்திய அரசை கண்டித்து திருவள்ளூர் எம்பி சசிகாந்த் செந்தில் கடந்த 4 நாட்களாக உண்ணாவிரதம் இருந்து வந்த நிலையில் முதல்வர் ஸ்டாலின், ராகுல்காந்தி உள்ளிட்டோரின் கோரிக்கையை ஏற்று உண்ணாவிரதத்தை கைவிடுவதாக அறிவித்தார்.

உண்ணாவிரதத்தால் அவருடைய உடல்நிலை பாதிக்கப்பட்டதை அடுத்து தலைவர்கள் தொலைபேசி மூலம் அவரை சமாதானப்படுத்தி போராட்டத்தை முடிவுக் கொண்டு வந்தனர்.

திருவள்ளூர் நாடாளுமன்ற உறுப்பினர் சசிகாந்த் செந்தில், தமிழகத்திற்கு மத்திய அரசு வழங்க வேண்டிய கல்வி நிதியை விடுவிக்கக் கோரி உண்ணாவிரதப் போராட்டத்தில் ஈடுபட்டார்.

போராட்டத்திற்கான காரணம்

கல்வி நிதி நிறுத்தம்: மத்திய அரசின் சர்வ ஷிக்ஷா அபியான் (SSA) திட்டத்தின் கீழ் தமிழகத்திற்கு வழங்க வேண்டிய ரூ.2,152 கோடி கல்வி நிதியை மத்திய அரசு நிறுத்தி வைத்துள்ளது.

புதிய கல்விக் கொள்கை: புதிய கல்விக் கொள்கையை (NEP 2020) ஏற்காத மாநிலங்களுக்கு நிதி வழங்குவதை மத்திய அரசு புறக்கணிப்பதாகக் கூறப்படுகிறது. இந்த நிதி ஆசிரியர்களின் சம்பளம், உள்கட்டமைப்பு மேம்பாடு மற்றும் RTE சட்டத்தின் கீழ் ஏழை மாணவர்களுக்கான சேர்க்கை ஆகியவற்றுக்கு பயன்படுத்தப்பட வேண்டியது.

போராட்டத்தின் நிலை

ஆகஸ்ட் 29 அன்று திருவள்ளூரில் தொடங்கிய இந்த காலவரையற்ற உண்ணாவிரதம், நான்காவது நாளாகத் தொடர்ந்தது.

சசிகாந்த் செந்திலின் உடல்நிலை பாதிக்கப்பட்டதை அடுத்து, அவர் முதலில் திருவள்ளூர் அரசு மருத்துவமனையிலும், பின்னர் மேல் சிகிச்சைக்காக சென்னை ராஜீவ் காந்தி அரசு மருத்துவமனையிலும் அனுமதிக்கப்பட்டார்.

மருத்துவமனையிலும் அவர் தனது உண்ணாவிரதத்தைத் தொடர்வதாக அறிவித்தார். அவரை காங்கிரஸ் கமிட்டித் தலைவர் செல்வப்பெருந்தகை, முன்னாள் தலைவர் திருநாவுக்கரசர் உள்ளிட்டோர் சந்தித்து ஆறுதல் கூறினர்.

தலைவர்களின் வேண்டுகோள்கள்

தமிழக முதலமைச்சர் மு.க.ஸ்டாலின், காங்கிரஸ் தலைவர் ராகுல் காந்தி, காங்கிரஸ் தலைவர் மல்லிகார்ஜுன கார்கே உள்ளிட்ட பல அரசியல் தலைவர்கள் சசிகாந்த் செந்திலுடன் தொலைபேசியில் தொடர்பு கொண்டு, அவரது உடல்நலனைக் கருத்தில் கொண்டு போராட்டத்தை கைவிடுமாறு வலியுறுத்தினர்.

தி.மு.க. எம்.பி. கனிமொழி, அமைச்சர்கள் மற்றும் பிற கட்சிகளின் தலைவர்கள் அவரை நேரில் சந்தித்து ஆதரவு தெரிவித்தனர்.

போராட்டம் தற்காலிகமாக வாபஸ்

தலைவர்களின் வேண்டுகோள்களை ஏற்று, சசிகாந்த் செந்தில் தனது உண்ணாவிரதப் போராட்டத்தை தற்காலிகமாக வாபஸ் பெறுவதாக அறிவித்தார்.

மாணவர்களின் கல்வி உரிமைகளுக்கான நீண்ட போராட்டத்தை மேலும் வலுவாக முன்னெடுத்துச் செல்வதற்காகவே இந்த முடிவை எடுத்ததாக அவர் தனது சமூக வலைத்தளப் பதிவில் தெரிவித்துள்ளார்.