முதல்வர் ஸ்டாலின் தலைமையில் ஆட்சியர்கள், காவல் அதிகாரிகள் மாநாடு! தமிழக அரசு வெளியிட்ட அறிவிப்பு

சென்னை: தமிழக முதல்வர் ஸ்டாலின் தலைமையில் மாவட்ட ஆட்சியர்கள், போலீஸ் உயர் அதிகாரிகள் மாநாடு சென்னையில் அடுத்த மாதம் 5, 6 ஆம் தேதிகளில் நடைபெறுவதாக தெரிவிக்கப்பட்டுள்ளது. மாவட்டங்களில் நிகழ்ந்த சட்டம்-ஒழுங்கு பிரச்சினை, அதில் போலீசார் மேற்கொண்ட நடவடிக்கைகள் குறித்து ஸ்டாலின் ஆலோசனை நடத்துவார் என கூறப்படுகிறது. சட்டசபை தேர்தல் நடைபெற உள்ள நிலையில் இக்கூட்டம் முக்கியத்துவம் பெற்றுள்ளது.

தமிழக முதல்வர் ஸ்டாலின் தலைமையிலான அரசு பல்வேறு அரசு நலத்திட்டங்களை கொண்டு வந்து நிறைவேற்றி வருகிறது. இந்த திட்டங்களின் செயல்பாடுகள் குறித்தும் அவ்வப்போது முதல்வர் ஸ்டாலின், உயர்மட்ட அதிகாரிகளை அழைத்து ஆய்வு கூட்டங்களை நடத்தி வருகிறார்.

இந்த கூட்டத்தின் போது, அனைத்து துறைகளும் செயல்படுத்தி வரும் திட்டங்கள் மற்றும் அதன் செயல்பாட்டு நிலையை அறிந்து அதற்கேற்ப பணிகளை முடுக்கி விடுவது வழக்கம். மேலும் ஆண்டுக்கு ஒரு முறை மாவட்ட ஆட்சியர்களையும், போலீஸ் உயர் அதிகாரிகளையும் சென்னைக்கு வரவழைத்து அந்தந்த மாவட்டத்தில் நடைபெற்று வரும் மக்கள் நல பணிகள், அப்பணிகள் உண்மையாகவே மக்களை சென்றடைந்துள்ளதா? என்பது பற்றி ஸ்டாலின் கேட்டறிந்து அறிவுரை வழங்கி வருகிறார்.

போலீஸ் உயர் அதிகாரிகளிடம் அந்தந்த மாவட்டங்களில் உள்ள சட்டம்- ஒழுங்கு பிரச்சினை, அதில் எடுக்கப்பட்டு வரும் நடவடிக்கைகள் ஆகியவற்றை ஸ்டாலின் நேரடியாக கேட்டு அறிவுரை வழங்கி வருகிறார். அந்த வகையில் தான் தற்போது, வரும் நவம்பர் 5 மற்றும் 6 ஆம் தேதிகளில் சென்னை தலைமை செயலகத்தில் மாவட்ட ஆட்சியர்கள் மற்றும் போலீஸ் உயர் அதிகாரிகளின் மாநாடு நடைபெறும் என தமிழக அரசு தெரிவித்துள்ளது.

நாமக்கல் கவிஞர் மாளிகையில் 10-வது மாடியில் உள்ள கூட்டரங்கில் இந்த மாநாடு நடைபெறும் என்றும் மாநாட்டுக்கு முதல்வர் ஸ்டாலின் தலைமை தாங்குவார் என்றும் அறிவிக்கப்பட்டுள்ளது. மாநாட்டில் அனைத்து மாவட்ட கலெக்டர்கள், போலீஸ் சூப்பிரண்டுகள், சரக டி.ஐ.ஜி, மற்றும் ஐ.ஜி.க்கள் கலந்துகொள்வார்கள்.

ஒவ்வொரு மாவட்டத்திலும் அரசு திட்டங்கள் மக்களை சென்றடைந்துள்ளதா? என்பதை ஸ்டாலின் ஆய்வு செய்து, அதுபற்றி மாவட்ட ஆட்சியர்களிடம் நேரடியாக கேட்டறிவார். அதே போல் மாவட்டங்களில் நிகழ்ந்த சட்டம்-ஒழுங்கு பிரச்சினை, அதில் போலீசார் மேற்கொண்ட நடவடிக்கைகள் குறித்தும் அவர் கேட்டறிவார். அடுத்த ஆண்டு சட்டசபை தேர்தல் நடைபெற உள்ள நிலையில் இந்த கூட்டம் முக்கியத்துவம் பெறுகிறது.

English summary

It has been reported that a conference of district collectors and top police officers will be held in Chennai on the 5th and 6th of next month under the leadership of Tamil Nadu Chief Minister Stalin. It is said that Stalin will hold discussions on the law and order situation in the districts and the steps taken by the police in this regard. This meeting assumes importance in the run-up to the assembly elections.