சென்னை கலரே மாறுது! செம்மஞ்சேரியில் விளையாட்டு நகரம் அமைக்க.. நிதி ஒதுக்கி தமிழக அரசு அரசாணை!

Updated: Monday, November 17, 2025, 19:05 [IST]

Subscribe to Oneindia Tamil

சென்னை: சென்னைக்கு அருகில் செம்மஞ்சேரியில் 112 ஏக்கர் பரப்பளவில் ரூபாய் 301 கோடியில் விளையாட்டு நகரம் அமைக்க அனுமதி அளித்து தமிழ்நாடு அரசு அரசாணை வெளியிட்டுள்ளது. இந்த விளையாட்டு நகரத்தில், நீர் விளையாட்டுகள், துப்பாக்கி சுடுதல், ஸ்கேட்டிங், வில்வித்தை, கால்பந்து மைதானம் உள்ளிட்ட பல்நோக்கு விளையாட்டு அரங்கம் அமைய உள்ளது.

சென்னைக்கு அருகே உலகத் தரத்திலான 'சர்வதேச விளையாட்டு நகரம்' அமைக்கப்படும் என்று கடந்த 2023 ஆம் ஆண்டு சட்டப்பேரவையில் அறிவிக்கப்பட்டது. இதனை செயல்படுத்தும் வகையில் சென்னை செம்மஞ்சேரியில் 112 ஏக்கர் பரப்பளவு நிலம் அடையாளம் காணப்பட்டு இளைஞர் நலன் மற்றும் விளையாட்டு மேம்பாட்டுத் துறைக்கு மாற்றப்பட்டது.

இதனைத் தொடர்ந்து, அங்கு 112 ஏக்கர் பரப்பளவில் ரூபாய் 301 கோடியில் விளையாட்டு நகரம் அமைக்க தமிழ்நாடு அரசு அரசாணை வெளியிட்டுள்ளது. மேலும் முதல் கட்டமாக 30 கோடி ஒதுக்கீடு செய்யப்பட்டுள்ளது.

இந்த விளையாட்டு நகரத்தில், நீர் விளையாட்டுகள், துப்பாக்கி சுடுதல், ஸ்கேட்டிங், வில்வித்தை, கால்பந்து மைதானம், நவீன செய்றகை இழை ஓடுதளம், பல்வேறு உள்அரங்க விளையாட்டுகளை நடத்தும் வகையில் பல்நோக்கு விளையாட்டு அரங்கம் உள்ளிட்டவைகள் அமைய உள்ளது.

முதல் கட்டமாக நீர் விளையாட்டுகள், துப்பாக்கி சுடுதல், ஸ்கேட்டிங், வில்வித்தை மற்றும் பல்நோக்கு விளையாட்டு அரங்கல் அமைக்கப்பட உள்ளது. இரண்டாவது கட்டமாக உள் விளையாட்டு அரங்கம் மற்றும் வெளி விளையாட்டு அரங்கம் அமைக்கப்பட உள்ளது.

கால்பந்து மைதானம், வில்வித்தை மைதானம், துப்பாக்கி சுடுதல் மையம், ரோலர் ஸ்கேட்டிங், தடகளம், நீச்சல் மற்றும் BMX போன்ற சர்வதேச விளையாட்டு வசதிகள் அமைக்கப்படுகின்றன. மேலும், வீரர்கள் தங்கும் விடுதிகள், உள் விளையாட்டு அரங்கம், புல்வெளிகள், சாலைகள், மழைநீர் வடிகால் ஆகியவை அனைத்தும் உலகத் தரத்தில் இருக்கும்.

13 மீட்டர் அகலமும் 1 கிலோமீட்டர் நீளமும் கொண்ட படகு சவாரி வசதி (Boating Track) இதில் இடம்பெறுகிறது. இது இந்தியாவில் ஒரு விளையாட்டு வளாகத்தில் முதன்முறையாக உருவாகும் நீர்விளையாட்டு அமைப்பு என்பதால் சிறப்பு வாய்ந்ததாகும். தமிழ்நாடு விளையாட்டு மேம்பாட்டு ஆணையம் (SDAT) மற்றும் நீர்வளத்துறை (WRD) இணைந்து இந்த திட்டத்தை செயல்படுத்துகின்றன.

இது பழைய மகாபலிபுரம் சாலை (OMR) அருகே அமைவதால், சென்னை மக்களுக்கு எளிதில் அணுகக்கூடிய இடமாக இருக்கும். ன்னை மெட்ரோ ரயில் லிமிடெட் (CMRL) உடன் இணைந்து இந்த விளையாட்டு நகரத்திற்கு புதிய மெட்ரோ இணைப்பு வழங்கப்படும். விளையாட்டு நகரம் அமைக்கும் திட்டம் மூன்று மாதங்களில் தொடங்கும் என அதிகாரிகள் தெரிவித்துள்ளனர்.