TNPSC தேர்வு குளறுபடி.. நீதி விசாரணை நடத்திட வேண்டும்! சிபிஎம் எம்பி சு.வெங்கடேசன் வலியுறுத்தல்

Updated: Monday, February 9, 2026, 14:27 [IST]

Subscribe to Oneindia Tamil

சென்னை: நேற்று நடக்க இருந்த குரூப் 2 மற்றும் 2ஏ தேர்வுகள், குளறுபடிகள் காரணமாக ஒத்தி வைக்கப்பட்டிருக்கின்றன. திடீரென கடைசி நேரத்தில் தேர்வுகள் ஒத்திவைக்கப்பட்டதால் தேர்வர்கள் போராட்டத்தில் ஈடுபட்டனர். வெறும் 9,000 பேர் எழுதும் தேர்வுக்கு உங்களால் சரியாக சென்டர் போட முடியாதா? என்று டிஎன்பிஎஸ்சி-க்கு தேர்வர்கள் கேள்வி எழுப்பியிருக்கின்றனர். இந்நிலையில், இது குறித்த நீதி விசாரணை மேற்கொள்ள வேண்டும் என்று சிபிஎம் எம்பி சு.வெங்கடேசன் வலியுறுத்தியுள்ளார்.

இது குறித்து தனது x பக்கத்தில் அவர் பதிவிட்டிருப்பதாவது, "TNPSC குரூப் 2 , 2A முதன்மைத் தேர்வுகள் குளறுபடிகளால் நிறுத்தப்பட்டதைத் தொடர்ந்து TNPSC கட்டுப்பாட்டு அலுவலர் பணியிட மாற்றம் செய்யப்பட்டுள்ளார் என செய்திகள் வெளிவந்துள்ளது.

இது போதுமான நடவடிக்கை அல்ல; ஏற்கெனவே குறைந்தபட்சம் ஆண்டுக்கு 10,000 குரூப் 4 பணியிடங்கள் , முழுமையான காலிப்பணியிடங்கள் நிரப்புதல் என போட்டித் தேர்வர்கள் தொடர்ந்து கோரிக்கை வைத்து போராடி வருகின்றனர்.

இந்நிலையில் இப்படியான TNPSC தேர்வு குளறுபடிகள் என்பது தொடர்ந்து வருகிறது. இது எந்த விதமான வெளிப்படைத்தன்மையையோ, நம்பிக்கையையோ இளைஞர்கள் மத்தியில் உருவாக்காது. TNPSC குளறுபடிகள் குறித்து நீதி விசாரணை நடத்திட வேண்டும். தேர்வர்களுக்கு தேவையான கால இடைவெளியோடு உடனடியான நிவாரணங்களை தமிழ்நாடு அரசு மேற்கொள்ள வேண்டும்" என வலியுறுத்தியுள்ளார்.

இந்த குளறுபடிகள் தொடர்பாக விசாரணை வேண்டும் என்று என்டிஏ கூட்டணி கட்சிகள் வலியுறுத்தி இருந்தன. ஆனால், தற்போது திமுக கூட்டணியிலிருந்து குளறுபடிகளுக்கு எதிராக குரல் எழுந்திருக்கிறது. இத்தனைக்கும் நேற்று முன்தினம்தான், கார்ல் மார்க்ஸ் சிலையை முதலமைச்சர் ஸ்டாலின் திறந்து வைத்து, இடதுசாரிகளுடனான கூட்டணியை மேலும் வலுப்படுத்தியிருந்தார். இப்படி இருக்கையில், சிபிஎம் தரப்பிலிருந்து குளறுபடிகளை கண்டித்து குரல் எழுந்திருப்பது கவனம் பெற்றிருக்கிறது.