அமெரிக்காவின் 50% வரி உயர்வு.. இந்தியாவுக்கு எதிரான புதிய பேரரசு அரசியல்! அழுத்திச் சொன்ன கமல்ஹாசன்!

Updated: Wednesday, August 27, 2025, 20:03 [IST]

Subscribe to Oneindia Tamil

சென்னை: அமெரிக்க அதிபர் டொனால்ட் ட்ரம்ப் இந்தியாவுக்கு எதிராக விரித்துள்ள 50 சதவீத வரி உயர்வு இன்று முதல் அமலுக்கு வந்துள்ளது. இந்த நிலையில் அமெரிக்காவின் வரி விதிப்பு இந்தியாவுக்கு ஒரு பாடமாக இருக்கட்டும் எனவும், துணிந்து தெளிவான பார்வையுடன் முன்னேறினால் எந்த பேரரசு விளையாட்டுகளையும் தாண்டி நம்மால் செல்ல முடியும் என நடிகரும் எம்பி-மான கமலஹாசன் கூறியுள்ளார்.

ரஷ்யாவிடம் இருந்து எண்ணெய் கொள்முதல் செய்வதை இந்தியா தவிர்க்க வேண்டும் என அமெரிக்கா அதிபர் டொனால்ட் டிரம்ப் வலியுறுத்தி வருகிறார், உக்ரைன்ன் போரை காரணம் காட்டி இந்த கருத்தை டொனால்ட் டிரம்ப் கூறி இருக்கிறார்.

அதே நேரத்தில் மற்ற நாடுகளை விட குறைந்த விலையில் ரஷ்யா கச்சா எண்ணெய்யை தருவதால் இந்தியா தொடர்ந்து கொள்முதல் செய்து வருகிறது. இதனால் ஆத்திரமடைந்த ட்ரம்ப் இந்தியாவுக்கு எதிராக 50 சதவீத வரியை விரித்து இருக்கிறார். இதற்கு நாடு முழுவதும் கடும் கண்டனம் எழுந்துள்ளது.

டிரம்ப் வரி

இந்த நிலையில் வரி என்ற பெயரில் பேரரசு விளையாட்டை அமெரிக்கா கையில் எடுத்திருப்பதாகவும் இந்தியர்கள் ஒன்றுபட வேண்டிய தருணம் இது என நடிகரும் மாநிலங்களவை உறுப்பினருமான கமலஹாசன் கூறியுள்ளார். இது தொடர்பாக அவர் எழுதிய கடிதத்தில்," அமெரிக்கா இந்தியாவுக்கு எதிராக விதித்துள்ள 50 சதவீத வரி உயர்வு இன்று உலக அரசியல் வட்டாரத்தில் பெரிய அதிர்வலை ஏற்படுத்தியுள்ளது. மேற்கு நாடுகளின் நிஜ அரசியலில், தண்டனைக்கு அழகு பெயராக "கொள்கை" என காட்டப்படுவது புதிதல்ல.

கமல்ஹாசன்

நூற்றாண்டுகளாகக் காலனித்துவ ஆட்சியின் சுரண்டல்களை தாங்கிய இந்தியா, இன்று புதிய வடிவில் அதே சுரண்டலுக்கு முகங்கொடுக்கிறது. இந்த முறை ஆயுதமாக வரி உயர்வு. அமெரிக்க அதிபர் டொனால்ட் டிரம்ப் அறிவித்துள்ள 50% சுங்கவரி உயர்வு, நேரடியாக வர்த்தகத்தையே குறிவைக்கவில்லை. இந்தியா தனது ஆற்றல் பாதுகாப்பை உறுதிப்படுத்தியதற்காக தண்டிக்கப்படுவதாகவே பலர் பார்கின்றனர். "உக்ரைன் பிரச்சனை" என்கிற பெயரில் விதிக்கப்படும் இத்தகைய நடவடிக்கைகள், உண்மையில் இந்தியாவின் சுயமரியாதை நிலைப்பாட்டை தாக்க முயல்கின்றன.

ஆத்மநிர்பர் இந்தியா

சீனாவை அமெரிக்கா இதே தீவிரத்தோடு அணுகுகிறதா? இல்லை. ஏனெனில் சீனா தற்போது அரிதான கனிமங்கள், சோலார் பேனல்கள், லித்தியம் பேட்டரிகள், அரிய உலோகங்கள் போன்ற முக்கிய சப்ளை செயின்களை கட்டுப்பாட்டில் வைத்திருக்கிறது. அமெரிக்காவே அந்நாட்டை தான் சார்ந்துள்ளது. அதனால் சீனாவிடம் வரி உயர்வு "மெல்லிய குரலில்" மட்டுமே பேசப்படுகிறது. ஆனால் இந்தியா மீது "சுத்தியலாய்" தாக்கப்படுகிறது. இதுவே இன்றைய புலனான பாடம் - ஆத்மநிர்பர் பாரத் என்பது வெறும் சுலோகமல்ல; அது ஒரு தேசிய காப்பீடு.

இந்தியா வர்த்தகம்

இந்தியா இன்று உலகின் மிகப்பெரிய ஜனநாயக நாடு மட்டுமல்ல, தொழில்முனைவோர் மற்றும் புதுமையாளர்களின் நாகரிகமும் ஆகும். திருப்பூர், சூரத், நொய்டா போன்ற நகரங்களில் உழைக்கும் துணிநூல் தொழிலாளர்களும், ஆந்திர மாநில இறால் விவசாயிகளும், குஜராத், மகாராஷ்டிரா ஆபரண தொழிலாளர்களும், எங்கள் எஃகு தொழிலாளர்களும் - இவர்களது உழைப்புதான் நம் பொருளாதாரத்தின் முதுகெலும்பு. இவர்களின் வாழ்வாதாரம் அரசியல் விளையாட்டுகளால் பாதிக்கப்படக் கூடாது.

பொருளாதார பாதிப்பு

இதனால் மத்திய, மாநில அரசுகள் உடனடி நடவடிக்கை எடுக்க வேண்டியது அவசியம் என வல்லுநர்கள் வலியுறுத்துகின்றனர். அவர்கள் முன்வைக்கும் பரிந்துரைகள்: சிறு, குறு, நடுத்தர தொழில்கள் (MSME) - 2 ஆண்டுகளுக்கு கடன் தவணை தள்ளுபடி, அவசர நிதி உதவி. ஏற்றுமதியாளர்கள் - குறைந்த வட்டி கடன்கள், ஏற்றுமதி கடன் உத்தரவாதம் விரிவாக்கம். பொருளாதார சீரான வசதி - நிலுவையில் உள்ள GST, RODTEP, RoSCTL ரீபண்டுகளை உடனடியாக வழங்குதல். செலவுக் குறைப்பு - மின் கட்டணத்தில் தற்காலிக சலுகை, புதிய சந்தைகளை அடைய சரக்கு கட்டண உதவி. சந்தை விரிவாக்கம் - இந்திய பொருட்களுக்கு புதிய உலக சந்தைகள் திறக்க அரசின் நேரடி முன்னெடுப்பு.

சப்ளை செயின்

ஆனால் இது வெறும் நெருக்கடி மேலாண்மை மட்டுமல்ல. அடுத்த பத்து ஆண்டுகளில் இந்தியா தனது இடத்தை சப்ளை செயின்களை உறுதியாகப் பிடிக்க வேண்டும். அரிதான கனிமங்கள், செமிக்கண்டக்டர்கள், பேட்டரிகள், பவர் மின்னணுக்கள், மேம்பட்ட துணிநூல் போன்ற துறைகளில் நம்மை மட்டுமே நம்பும் நிலைக்கு கொண்டு செல்ல வேண்டும். அப்போதுதான், கடல் கடந்த நாடுகளின் சுங்கவரி அச்சுறுத்தல்களில் இருந்து நாம் விடுபட முடியும். இந்தியா தன் நண்பர்களை வார்த்தைகளால் அல்ல, செயலால் மதிக்கும் நாடு. இன்று அமெரிக்கா விதிக்கும் வரி, நமக்கு ஒரு பாடமாக இருக்கட்டும். நாம் ஒன்றுபட்டு, துணிந்து, பார்வையுடன் முன்னேறினால், எந்த பேரரசு விளையாட்டுகளையும் தாண்டிச் செல்ல முடியும்." என கூறியுள்ளார்.