எவ்வளவு களேபரம் நடந்தும்! மௌனம் காக்கும் விஜய்! இதுவே திமுகவா இருந்தால் கதையே வேறு! மிஸ் பண்ணிட்டாரே
சென்னை: தமிழக அரசியல் களம் கிண்டி ஆளுநர் மாளிகையைச் சுற்றி அனல் பறந்து கொண்டிருக்கிறது. தவெக தலைவர் விஜய், ஆட்சி அமைக்க உரிமை கோரி இரண்டு முறை ஆளுநரைச் சந்தித்த பின்னரும், இதுவரை எந்த முன்னேற்றமும் ஏற்படவில்லை. ஆளுநர் ஆர்.வி. ஆர்லேகர் 'சட்ட ஆலோசனை' என்ற பெயரில் காலதாமதம் செய்து வருவதாக விமர்சனங்கள் எழுந்தாலும், அதைவிடப் பெரிய விமர்சனம் விஜய்யின் மௌனத்தின் மீது விழுந்திருக்கிறது.
ஆளுநரின் 'டிலே' டாக்ஸிக்ஸ்: காலத்தை கடத்தும் கிண்டி!
தனிப்பெரும் கட்சியின் தலைவராக விஜய் இருக்கும்போது, அவரை அழைத்து "சட்டசபையில் பெரும்பான்மையை நிரூபியுங்கள்" என்று சொல்வதே ஆளுநரின் கடமை. ஆனால், ஆளுநர் ஆர்லேகர் விஜய்யின் ஆதரவுக் கடிதத்தில் இருக்கும் எண்ணிக்கையைக் காரணம் காட்டி, ஆலோசனைகளை இழுத்தடித்து வருகிறார்.
ஆளுநர் மாளிகை தரப்பு, 118 என்ற மேஜிக் எண்ணைத் தொடும் வரை அழைப்பு விடுக்கப்போவதில்லை என்பதில் உறுதியாக இருப்பதாகத் தெரிகிறது. இது ஒரு வகையில் தவெக-வின் எம்.எல்.ஏ-க்களைக் குறிவைக்கும் 'குதிரைப் பேரத்திற்கு' களம் அமைத்துக் கொடுக்கிறதோ என்ற அச்சமும் எழுந்துள்ளது. ஆளுநரின் இந்த இழுபறி அரசியல் சாசன நெறிமுறைகளுக்கு எதிரானது எனச் சட்ட வல்லுநர்கள் கூறினாலும், ஆளுநர் தனது அதிகாரத்தை (Discretionary Power) பயன்படுத்தி நேரத்தைக் கடத்தி வருகிறார்.
பகுதிநேர அரசியலா? - திமுக, அதிமுக-வுடன் ஒரு ஒப்பீடு!
இந்த இக்கட்டான சூழலில், விஜய் தனது வீட்டில் அமர்ந்து கொண்டு 'அமைதி' காப்பது அவரது தொண்டர்களுக்கே அதிருப்தியை ஏற்படுத்தியுள்ளது. ஒருவேளை இதே சூழலில் திமுகவோ அல்லது அதிமுகவோ இருந்திருந்தால், இந்நேரம் கிண்டி ஆளுநர் மாளிகை முற்றுகையிடப்பட்டிருக்கும். தமிழகம் முழுவதும் கண்டன குரல்கள் வெடித்திருக்கும். இல்லை அறிக்கைகள், கண்டனங்கள் வெளிவந்திருக்கும். ஆளுநரின் நடவடிக்கைக்கு எதிராகக் கடுமையான அறிக்கைகளும், செய்தியாளர் சந்திப்புகளும் தினசரி நடந்திருக்கும்.
ஆனால் விஜய்யோ, இதுவரை ஒரு அதிகாரப்பூர்வ அறிக்கையைக் கூட வெளியிடவில்லை. செய்தியாளர்களைச் சந்தித்து ஆளுநரின் தாமதத்தைக் கண்டிக்கவில்லை. "நாங்கள் மிகப்பெரிய சக்தியாக உருவெடுத்தும் ஆளுநர் எங்களைத் தடுக்கிறார்" என்ற அரசியல் முழக்கத்தை மக்களிடம் கொண்டு சேர்க்க அவர் தவறிவிட்டார். இது விஜய்யை ஒரு 'சீரியஸ் பாலிட்டிஷியன்' (Serious Politician) ஆகப் பார்க்கவிடாமல், ஒரு 'பார்ட் டைம்' அரசியல்வாதியாகவே பிம்பப்படுத்துகிறது.
விஜய் ஏன் பேச மறுக்கிறார்?
விஜய்யின் இந்த மௌனம் அரசியல் வட்டாரத்தில் பல கேள்விகளை எழுப்பியுள்ளது:
ஆளுநருக்கு எதிராகப் பேசினால் 'மத்திய அரசு' கோபித்துக் கொள்ளும் என்று அஞ்சுகிறாரா?
அல்லது வி.சி.க, இடதுசாரிகளிடம் திரைமறைவு பேச்சுவார்த்தை நடத்துவதிலேயே முழு நேரத்தையும் செலவிடுகிறாரா?
எது எப்படியோ, அரசியல் என்பது வெறும் எண்களைக் கூட்டுவது மட்டுமல்ல; நெருக்கடியான நேரங்களில் களத்தில் நின்று போராடுவதும்தான். திரையில் காட்டும் ஆக்சனை விட, இப்போது கிண்டி மாளிகைக்கு வெளியே அவர் காட்ட வேண்டிய அரசியல் ஆக்சன்தான் அவரது அரசியல் எதிர்காலத்தைத் தீர்மானிக்கும்.
அந்த 6 எம்.எல்.ஏ-க்களின் ஆதரவைப் பெற்று ஆட்சி அமைப்பாரா அல்லது மௌனமே மகாபலம் என இருந்துவிட்டு வாய்ப்பைத் தவறவிடுவாரா? விஜய் தனது 'பார்ட் டைம்' இமேஜை உடைக்க வேண்டிய கட்டாயத்தில் இருக்கிறார்.
Click it and Unblock the Notifications
Sign in with Google