சொன்னதை செஞ்சிட்டாரு.. மோடிக்கு வாழ்த்துகள்! பாரத் பெயர் மாற்றம் குறித்த உதயநிதி கிண்டல்

சென்னை: ஜி20 மாநாட்டில் பிரதமர் நரேந்திர மோடியை குறிக்க இந்தியா என்பதற்கு பதில் பாரதம் என்று குறிப்பிடப்பட்டிருந்தது பெரும் விவாதங்களை ஏற்படுத்தியுள்ளது. பாரத் பெயர் விவகாரத்தில் பிரதமர் மோடியை அமைச்சர் உதயநிதி ஸ்டாலினும் விமர்சித்துள்ளார்.

எதிர் வரும் நாடாளுமன்ற தேர்தலில் பாஜகவை எதிர்க்க எதிர்க்கட்சிகள் 'இந்தியா' கூட்டணியை உருவாக்கியுள்ளன. இந்தியா கூட்டணி என்கிற பெயரில்தான் அனைத்து கூட்டங்களையும் எதிர்க்கட்சிகள் நடத்தி வருகின்றன. எதிர்க்கட்சிகள் இந்த 'இந்தியா' எனும் பெயரை பயன்படுத்த தடை விதிக்க வேண்டும் என்று பாஜக தொடர்ந்து கூறி வருகிறது. இந்நிலையில் நாட்டின் பெயரை இந்தியா என்பதிலிருந்து பாரதம் என்று மாற்ற மத்திய அரசு முயன்று வருவதாக தகவல்கள் வெளியாகியுள்ளன.

இதற்கேற்றாற்போல பாஜக தலைவர்கள் பலர், "இந்தியா என்பது ஆங்கிலேயர்கள் வைத்த பெயர். பாரதம்தான் நமது உண்மையான பெயர்" என்று கூறி வருகின்றனர். இந்த சலசலப்புகள் ஒருபுறம் இருக்கையில் மறுபுறம் மற்றொரு பஞ்சாயத்து வெடித்து கிளம்பியிருக்கிறது. அதாவது ஜி20 மாநாட்டின் பிரதிநிதிகளுக்கு ஏற்பாடு செய்யப்பட்டிருந்த சிறப்பு விருந்துக்கான அழைப்பிதழில் இந்திய குடியரசுத் தலைவர் என்பதற்கு பதில், 'பாரத' குடியரசுத் தலைவர் என்று குறிப்பிடப்பட்டிருந்தது.

வழக்கமாக 'இந்திய' குடியரசுத் தலைவர் என்று குறிப்பிடப்பட்டிருக்கும். ஆனால் இம்முறை பாரதம் என்று குறிப்பிடப்பட்டிருப்பது, ஏற்கெனவே இந்தியாவின் பெயரை மாற்ற வேண்டும் என்று பாஜக தலைவர்கள் வலியுறுத்தி வரும் கருத்தியலுக்கு வலு சேர்ப்பதை போல இந்த நடவடிக்கை இருப்பதாக காங்கிரஸ் உள்ளிட்ட எதிர்க்கட்சிகள் விமர்சித்துள்ளன. இதனைத் தொடர்ந்து ஜி20 மாநாட்டில் பிரதமர் நரேந்திர மோடியின் இருக்கையை குறிக்கும் பெயர் பலகையில் 'இந்தியா' என்பதற்கு பதில் 'பாரத்' என்று குறிப்பிடப்பட்டுள்ளது.

இது குறித்து செய்தியாளர்கள் அமைச்சர் உதயநிதி ஸ்டாலினிடம் கேள்விகளை எழுப்பினர். அதற்கு பதிலளித்த அவர், "இந்தியாவையே மாத்திக் காட்டுகிறேன்னு 9 வருசத்துக்கு முன் மோடி சொன்னாரு. இதோ மாத்திட்டாரு. சொன்னதை செஞ்சிட்டாரு. மோடிக்கு வாழ்த்துகள்" என்று கூறியுள்ளார்.

முன்னதாக பாரத் என்கிற பெயர் பயன்படுத்தப்பட்டதற்கு, "நாட்டின் அரசியலமைப்பு சட்டத்தின் 1ன் படி, 'இந்தியாவாக இருந்த பாரதம் மாநிலங்களின் ஒன்றியமாக இருக்கும்' என்று கூறப்பட்டிருக்கிறது. ஆனால் தற்போது இந்த மாநிலங்களின் ஒன்றியம் கூட தாக்குதலுக்கு உள்ளாக்கப்பட்டிருக்கிறது" என்று காங்கிரஸ் பொதுச் செயலாளர் ஜெய்ராம் ரமேஷ் கூறுகையில் விமர்சித்திருந்தார் என்பது குறிப்பிடத்தக்கது.

English summary

At the G20 summit, Prime Minister Narendra Modi was referred to as India instead of Bharat which has caused huge debates. Minister Udayanidhi Stalin has also criticized Prime Minister Modi on the Bharat name issue.