“அதிமுகவை கபளீகரம் செய்ய விஜய் பிளான்.. சந்திரமுகியாக மாறும் கங்கா”.. மூத்த பத்திரிகையாளார் பளிச்!

சென்னை: "கங்கா சந்திரமுகியாக மாறுவது போல, அதிமுகவாக மாற விஜய் முயற்சிக்கிறார். எம்ஜிஆர், ஜெயலலிதா ஆகியோர் பற்றிப் பேசுகிறார். அதிமுகவை பற்றி நேரடியாக பேசாமல், அந்தக் கட்சியின் ஃபார்முலாவை பின்பற்றி அந்தக் கட்சியின் தொண்டர்களை வளைக்கும் வேலையில் இறங்கி உள்ளார் விஜய்." என நமது ஒன் இந்தியா தமிழுக்கு அளித்துள்ள பேட்டியில் தெரிவித்துள்ளார் பத்திரிகையாளர் கோட்டீஸ்வரன்.

தமிழக வெற்றிக் கழகத் தலைவர் விஜய் சட்டசபை தேர்தலை எதிர்கொள்ளத் தயாராகி வருகிறார். தவெக சார்பில் போட்டியிட விருப்ப மனுக்கள் வழங்கப்பட்டு வருகின்றன. இந்நிலையில் தவெக தலைவர் விஜய்யின் அரசியல் செயல்பாடுகள் குறித்து மூத்த பத்திரிகையாளர் கோட்டீஸ்வரன் நமது ஒன் இந்தியா தமிழுக்கு பேட்டி அளித்துள்ளார்.

மூத்த பத்திரிகையாளர் கோட்டீஸ்வரன் நமக்கு அளித்துள்ள பேட்டியில், "தவெக 3ஆம் ஆண்டு தொடக்க விழா நிகழ்வு ஒரு கலை நிகழ்ச்சி. அதில், தமது அரசியல் எதிரி திமுக என அழுத்தமாகச் சொல்லி இருக்கிறார். விஜய்யால் திமுகவுக்கு நிச்சயமாக ஒருசில பிரச்சனைகள் வரலாம். விஜய் அதிமுக வாக்கு வங்கியையும் குறி வைக்கிறார்.

ஆனால், விஜய் நினைப்பது போல முதலமைச்சர் என்பது சாத்தியமில்லை. அதற்கு ஏற்ற உழைப்பும் இல்லை, அதற்கான அரசியல் செய்தியையும் அவர் தெளிவுபடுத்தவில்லை. இன்னும் 4 வாரங்களில் சட்டசபை தேர்தல் தேதியை தேர்தல் ஆணையம் வெளியிடப் போகிறது. தேர்தலுக்கு இன்னும் அதிக காலம் இல்லாத அதற்கேற்ற பேச்சை விஜய் பேசவில்லை.

விஜய் தமது கட்சிக்காரர்களுக்கு அரிதானவராக இருக்கக்கூடாது. சொந்தக் கட்சி நிர்வாகிகளே விஜய்யுடன் புகைப்படம் எடுத்துக் கொள்ளத்தான் விரும்புகிறார்கள். அடிக்கடி பார்த்துக்கொண்டால் அப்படி புகைப்படம் எடுத்துக்கொள்வதில் மட்டுமே ஆர்வம் காட்டமாட்டார்கள். ஒரு அரசியல் தலைவர் இந்நேரம் கட்சியினருக்கு நன்கு பழகி இருக்க வேண்டும்.

வீட்டுக்குள்ளேயே உட்கார்ந்து அரசியல் செய்கிறார் என்ற பெயரை வேறு எந்தக் கட்சி தலைவரும் வாங்கவில்லை. கட்சி தொடங்கி 2 ஆண்டுகள் நிறைவடைந்த பிறகும் அப்படித்தான் இருக்கிறார். அவரை வெளியில் வரச் சொல்வதே அவருக்கு எரிச்சலூட்டுகிறது.

விஜய் திமுகவை எதிர்த்து அரசியல் செய்கிறார். ஆனால் சொந்தமாக தனக்கென ஒரு நம்பிக்கையை உருவாக்க முடியவில்லை. தனக்கு முன்பே இருக்கும் கட்சிகளின் வாக்குகளை சுலபமாக கபளீகரம் செய்ய நினைக்கிறார். அதிமுக தான் திமுகவை வீழ்த்திய இயக்கம். அந்த சக்சஸ் ஃபார்முலாவை பிடிக்க நினைக்கிறார்.

கங்கா சந்திரமுகியாக மாறும் முயற்சி போல, அதிமுகவாக மாற விஜய் முயற்சிக்கிறார். எம்ஜிஆர், ஜெயலலிதா ஆகியோர் பற்றிப் பேசுகிறார். அதிமுகவை மையமாக வைத்தே அரசியல் செய்கிறார் விஜய். அதிமுகவை பற்றி நேரடியாக பேசாமல், அந்தக் கட்சியை மீளுருவாக்கம் செய்யும் வேலையில் இறங்கி உள்ளார் விஜய்.

English summary

“Just as Ganga transforms into Chandramugi, Vijay is trying to transform into the AIADMK. Without directly speaking about the AIADMK, Vijay has embarked on a mission to win over the party's cadres by following its formula,” journalist Koteeswaran said in an interview given to Oneindia Tamil.