முடிச்சூர் ஆம்னி பேருந்து நிலையம் எப்போது திறக்கப்படும்? என்னென்ன வசதிகள் இருக்கு? வெளியான அப்டேட்
சென்னை: ரூ.42 கோடி செலவில் ஒரே நேரத்தில் 120 பேருந்துகள் நின்று செல்லும் வகையில், முடிச்சூரில் ஆம்னி பேருந்து நிலையம் அமைக்கப்பட்டு வருகிறது. இந்த நிலையில் இம்மாத இறுதியில் முடிச்சூர் ஆம்னி பேருந்து நிலையம் மக்கள் பயன்பாட்டுக்கு திறக்கப்படும் என்று அமைச்சர் சேகர்பாபு தெரிவித்துள்ளார். மேலும் அதில் என்னென்ன வசதிகள் உள்ளன என்றும் அவர் தெரிவித்தார்.
சென்னையில் இருந்து பிற மாவட்டங்களுக்கு கோயம்பேடு பேருந்து நிலையத்தில் இருந்து பஸ்கள் இயக்கப்பட்டு வந்தன. ஆம்னி பஸ்களும் சென்னை கோயம்பேடு பேருந்து நிலையத்தில் இருந்து இயக்கப்பட்டு வந்தது. இந்த நிலையில் கடந்த ஆண்டில் கிளாம்பாக்கத்தில் கலைஞர் நூற்றாண்டு பேருந்துநிலையம் திறக்கப்பட்டது.
இதையடுத்து சென்னையில் இருந்து பிறமாவட்டங்களுக்கு இயக்கப்படும் பேருந்துகள் அனைத்தும் கோயம்பேடுக்கு பதிலாக கிளாம்பாக்கத்தில் இருந்து இயக்கப்பட்டன. ஜிஎஸ்டி ரோட்டில் ஏற்படும் போக்குவரத்து நெரிசலை கருத்தில் கொண்டு இங்கு அமைக்கப்பட்டது. ஆனால் ஆம்னி பேருந்துகளுக்கு என்று தனியாக அமைக்கப்படவில்லை. இதற்காக முடிச்சூரில் ஆம்னி பேருந்து நிலையம் அமைக்கப்பட்டு வந்தது.
ரூ.42 கோடியில் முடிச்சூரில் ஆம்னி பேருந்து நிலையம் அமைக்கும் பணியானது நடந்து வந்தது. தற்போது பணிகள் அனைத்தும் முடிந்துவிட்டன. தீபாவளிக்கு முன்பு திறக்கப்படும் என எதிர்பார்க்கப்பட்டது. இந்த நிலையில் முடிச்சூர் ஆம்னி பேருந்து நிலையம் எப்போது மக்கள் பயன்பாட்டுக்கு திறக்கப்படும் என்பது குறித்து அமைச்சர் சேகர்பாபு இன்று செய்தியாளர்களுக்கு பேட்டி அளிக்கையில் கூறினார்.
அமைச்சர் சேகர்பாபு கூறியதாவது:- இந்த மாத இறுதிக்குள் முடிச்சூர் ஆம்னி பேருந்து நிலையம் திறக்கப்படும். நிச்சயமாக இந்த மாத இறுதியில் முடிச்சூர் ஆம்னி பேருந்து நிலையம் மக்களுடைய பயன்பாட்டுக்கு திறக்கப்படும். முதல்வர் ஸ்டாலின் திறந்து வைப்பார். 42 கோடி ரூபாய் செலவில் அமைக்கப்பட்ட இந்த பேருந்து நிலையத்தில் 120 பேருந்துகள் ஒரே நேரத்தில் நின்று செல்வதற்கான வசதி செய்யப்பட்டுள்ளது.
இதேபோன்று ஓட்டுனர்கள், நடத்துனர்கள் தங்குவதற்காக இரண்டு கார்பெண்டரிகள், இரண்டு உணவகங்கள், கழிப்பிட வசதிகளோடு, நல்ல முறையில் பாதுகாக்கப்பட்ட குடிநீர் வசிதியோடு இந்த ஆம்னி பேருந்து நிலையம் அமைக்கப்பட்டுள்ளது. ஆம்னி பேருந்து ஓட்டுனர்களுக்கும், ஆம்னி பேருந்து உரிமையாளர்களுக்கும் பெரிய வரப்பிரசாதமாக இருக்கும்.
முடிச்சூர் ஆம்னி பேருந்து நிலையம் திறக்கப்பட்டதும் கிளாம்பாக்கம் பேருந்து நிலையத்தில் கூட்ட நெரிசல் குறையும். அதி நவீன முறையில், தற்போதைய காலக்கட்டத்திற்கு ஏற்ற வகையில் முடிச்சூர் பேருந்து நிலையமானது அமைக்கப்பட்டுள்ளது. இந்த மாத இறுதிக்குள் நிச்சயமாக மக்கள் பயன்பாட்டுக்கு வரும். இவ்வாறு அமைச்சர் சேகர்பாபு கூறினார்.
Click it and Unblock the Notifications
Sign in with Google