அதிமுக பிளவு.. பாமக-வின் மௌனம் ஏன் .. சௌமியா அன்புமணி பேச்சை கவனித்தீர்களா?
சென்னை: தமிழக அரசியலில் அதிமுக-வுக்குள் உருவாகியுள்ள அதிகாரப் போட்டி நாளுக்கு நாள் தீவிரமடைந்து வரும் நிலையில், அதன் கூட்டணிக் கட்சியான பாமக கடைப்பிடித்து வரும் அமைதி அரசியல் வட்டாரங்களில் புதிய கேள்விகளை எழுப்பியுள்ளது. சௌமியா அன்புமணி என்று சட்டசபையில் பேசிய விதமும், திடீரென நடுநிலை வகிப்பதாக அறிவித்து மௌனம் கடைபிடிப்பது ஆச்சரியமாக பார்க்கப்படுகிறது.
எடப்பாடி பழனிசாமி தலைமையிலான அணியும், எஸ்.பி.வேலுமணி தலைமையிலான அணியும் நேரடியாக மோதிக் கொண்டிருக்கும் சூழலில், இதுவரை எந்தத் தரப்பையும் வெளிப்படையாக ஆதரிக்காமல் பாமக ஒதுங்கி நிற்பது, சாதாரண அரசியல் மரியாதையா அல்லது திட்டமிட்ட யுக்தியா என்ற விவாதம் வலுத்து வருகிறது.
2026 சட்டமன்றத் தேர்தலில் மாநிலம் முழுவதும் அதிமுக கடுமையான பின்னடைவைச் சந்தித்தாலும், வடதமிழகத்தில் மட்டும் கட்சி எதிர்பார்த்ததை விட கணிசமான இடங்களைப் பெற்றது. அதற்கான முக்கியக் காரணமாக வன்னியர் சமூக வாக்குகள் பார்க்கப்படுகின்றன. குறிப்பாக, 10.5 சதவீத உள் இடஒதுக்கீடு உள்பட பல்வேறு விவகாரங்கள் தேர்தல் பிரசாரத்தின் மையமாக அதிமுக எடுத்துச் சென்றது வடமாவட்டங்களில் தாக்கத்தை ஏற்படுத்தியது.
இந்த அரசியல் கணக்கில் பாமக-வின் பங்கு மிக முக்கியமானது. வன்னியர் சமூகத்தின் பாரம்பரிய அரசியல் பிரதிநிதித்துவத்தை தக்க வைத்திருக்கும் கட்சியாக பாமக பார்க்கப்படுவதால், அந்தக் கட்சியின் அமைதியே தற்போது கவனத்தை ஈர்க்கிறது.
பாமக ஏன் வெளிப்படையாக யாரையும் ஆதரிக்கவில்லை?
அதிமுக-வுக்குள் ஏற்பட்டுள்ள தற்போதைய பிளவில், எடப்பாடி பழனிசாமி ஒருபுறம் நிற்க, வேலுமணி அணியில் சி.வி.சண்முகம் போன்ற வன்னியர் சமூகத்தைச் சேர்ந்த முக்கிய தலைவர்கள் இடம்பெற்றுள்ளனர். இதனால், பாமக எந்தத் தரப்பையும் வெளிப்படையாக ஆதரிப்பது அரசியல் ரீதியாக ஆபத்தான முடிவாக மாறியுள்ளது.
எடப்பாடியை ஆதரித்தால் என்ன சிக்கல்?
பாமக வெளிப்படையாக எடப்பாடி அணியை ஆதரித்தால், வேலுமணி அணியில் இருக்கும் வன்னியர் சமூக எம்.எல்.ஏ-க்கள் மற்றும் இரண்டாம் கட்டத் தலைவர்களின் அதிருப்தியைச் சந்திக்க நேரிடலாம். அதேநேரம், வேலுமணி அணியை ஆதரித்தால், நீண்டகால கூட்டணித் தொடர்பை பாதித்துவிடும் அபாயமும் உள்ளது. இந்த இரட்டை அழுத்தமே பாமக-வின் தற்போதைய மௌனத்திற்குக் காரணமாகக் கருதப்படுகிறது.
தவெக நம்பிக்கை வாக்கெடுப்பில் 'நடுநிலை' - ஒரு அரசியல் சிக்னலா?
தவெக அரசுக்கு எதிரான நம்பிக்கை வாக்கெடுப்பில் பாமக நடுநிலை வகித்தது அரசியல் வட்டாரங்களில் பெரும் கவனத்தை ஈர்த்துள்ளது. சட்டசபையில் சௌமியா அன்புமணி பேசும் போது,"சட்டமன்ற தேர்தலில் வெற்றி பெற்றுள்ள முதல்வர் விஜய்க்கு வாழ்த்துகள். பெண்கள் பாதுகாப்புக்காக சிங்கப்பெண் படை, மதுக்கடைகளை மூடுவது உள்ளிட்ட நடவடிக்கைகளை பாமக வரவேற்கிறது. மது விலக்குக்காக பாமக தொடர்ந்து குரல் கொடுத்து, சட்டப் போராட்டம் நடத்தி வருகிறது. போதை, மது இல்லாத சமுதாயத்தை நம் குழந்தைகளுக்கு உருவாக்கிக் கொடுக்க வேண்டிய கடமை நமக்கு இருக்கிறது. அதற்காக அனைவரும் ஒன்றிணைந்து பயணிக்க வேண்டும். தவெக அரசு நம்பிக்கை தீர்மானம் கோரியுள்ள வாக்கெடுப்பில் இருந்து பாமக விலகிக் கொள்கிறது" என்று கூறியுள்ளார்.
இதன் மூலம் வெறும் தற்காலிகத் தவிர்ப்பா அல்லது எதிர்கால கூட்டணிக்கான மென்மையான அரசியல் சைகையா என்ற கேள்வி எழுகிறது. கடந்த சில மாதங்களாக வடதமிழகத்தில், குறிப்பாக வன்னியர் சமூக இளைஞர்களிடையே விஜயின் அரசியல் வருகை ஒரு ஈர்ப்பை ஏற்படுத்தியிருப்பதாக அரசியல் ஆய்வாளர்கள் கூறுகின்றனர். சினிமா புகழ், சமூக ஊடக ஆதிக்கம் மற்றும் 'புதிய தலைமுறை அரசியல்' என்ற தோற்றம் காரணமாக, தவெக இளைஞர்களிடம் வேகமாக பேசப்படும் கட்சியாக மாறியுள்ளது.
இதனை பாமக தலைமையும் கவனித்து வருவதாக கூறப்படுகிறது. விஜய்க்கு எதிராக கடுமையான நிலைப்பாடு எடுத்தால், தங்கள் சொந்த இளைஞர் ஆதரவாளர்களிடையே எதிரொலி ஏற்படலாம் என்ற அச்சமும் பாமக-வுக்குள் இருப்பதாக அரசியல் வட்டாரங்கள் தெரிவிக்கின்றன.
அதிமுகவின் நிலை பாமகவுக்கு சாதகம்
வடதமிழக அரசியலில் அதிமுக வலுவாக இருக்கும் வரை, பாமக தனித்து ஒரு முதன்மை சக்தியாக வளர்வது சாத்தியமில்லை என்பது அந்தக் கட்சியின் நீண்டகால அரசியல் கணக்காகக் கருதப்படுகிறது. இதனால், அதிமுக-வின் தற்போதைய சிதைவு பாமக-வுக்கு மறைமுக அரசியல் வாய்ப்பாகவும் பார்க்கப்படுகிறது. ஆனால், அந்த வீழ்ச்சிக்குக் காரணம் தாங்கள்தான் என்ற குற்றச்சாட்டு வராதபடி, வெளிப்படையான விமர்சனங்களைத் தவிர்த்து 'பாதுகாப்பான மௌனம்' கடைப்பிடிக்கிறது என்ற கருத்தும் அரசியல் வட்டாரங்களில் நிலவுகிறது.
கிங் மேக்கர் பாமக
ஒருகாலத்தில் தமிழக கூட்டணி அரசியலில் முக்கிய 'கிங் மேக்கர்' கட்சியாக பாமக திகழ்ந்தது. ஆனால் கடந்த சில தேர்தல்களில் அந்த செல்வாக்கு குறைந்துவிட்டது. இப்போது அதிமுக பலவீனமடைந்து வரும் சூழலில், 2029 நாடாளுமன்றத் தேர்தலை நோக்கி புதிய அரசியல் சமன்பாட்டை உருவாக்க பாமக முயற்சிக்கலாம் எனக் கூறப்படுகிறது. அதற்காக, எதிர்காலத்தில் தவெக அல்லது பாஜக ஆகிய கட்சிகளுடன் கூட்டணி அமைக்கும் வாய்ப்புகளையும் பாமக திறந்தவையாக வைத்திருக்கிறது என்ற அரசியல் பார்வை நிலவுகிறது.
அரசியல் முகவரியே மாறும்
அதிமுக-வின் உள்கட்சிப் பிளவு என்பது அந்தக் கட்சியின் எதிர்காலத்தை மட்டும் பாதிக்கும் பிரச்சினையல்ல; அது வடதமிழக அரசியலின் சமூக வாக்கு அமைப்பையே மறுசீரமைக்கும் அளவுக்கு பெரிய தாக்கத்தை ஏற்படுத்தக்கூடியது. இந்த சூழலில், பாமக-வின் மௌனம் பலவீனத்தின் அறிகுறி அல்ல; மாறாக, எதிர்கால அரசியல் வாய்ப்புகளை கணக்கிட்டு எடுக்கப்படும் எச்சரிக்கையான தந்திரமான நகர்வாகவே பார்க்கப்படுகிறது. வரும் மாதங்களில் அதிமுக-வின் அதிகாரப் போட்டி எந்த திசையில் செல்கிறது என்பதையே, வன்னியர் வாக்கு வங்கியின் அடுத்த அரசியல் முகவரியும் தீர்மானிக்கப் போகிறது.
Click it and Unblock the Notifications
Sign in with Google