விஜய்க்கு ஆதரவாக இருந்த 25 அதிமுக MLAக்கள் தகுதி நீக்கம்? இடைத்தேர்தல் வருகிறது? சட்டம் சொல்வது என்ன
சென்னை: தமிழக சட்டசபையில் நேற்று நடைபெற்ற தமிழக வெற்றிக் கழக அரசின் நம்பிக்கை வாக்கெடுப்பு, தற்போது பெரும் அரசியல் மற்றும் சட்ட விவாதங்களைக் கிளப்பியுள்ளது. சபாநாயகரின் முடிவு மற்றும் அதிமுக அதிருப்தி எம்.எல்.ஏ-க்களின் வாக்குகள் முறையாக ஆளுநரிடமோ அல்லது நீதிமன்றத்திலோ சவாலுக்கு உட்படுத்தப்பட்டால், 26 எம்.எல்.ஏ-க்களின் வாக்குகள் சட்டவிரோதமானது என அறிவிக்கப்பட்டு, அவர்கள் தகுதி நீக்கம் செய்யப்பட வாய்ப்புள்ளதாக சட்ட வல்லுநர்கள் கருதுகின்றனர்.
வாக்கெடுப்பில் நிகழ்ந்த குளறுபடிகள்
நம்பிக்கை வாக்கெடுப்பின் போது தவெக அரசு 144 வாக்குகளைப் பெற்றதாக அறிவிக்கப்பட்டது. இருப்பினும், அதிமுகவின் 25 அதிருப்தி எம்.எல்.ஏ-க்கள் மற்றும் அமமுகவின் ஒரு அதிருப்தி எம்.எல்.ஏ ஆகியோரின் வாக்குகளைக் கழித்தால், அரசுக்கு ஆதரவான உண்மையான வாக்கு எண்ணிக்கை 118 (144-26) மட்டுமே.
சட்டப்பேரவை நிகழ்வுகளின் போது, அதிமுக பொதுச்செயலாளர் எடப்பாடி பழனிசாமி, ஆளுங்கட்சியான தவெக 'குதிரை பேரம்' (Horse Trading) நடத்தியதாகக் கடுமையான குற்றச்சாட்டுகளை முன்வைத்தார். தனது கட்சி எம்.எல்.ஏ-க்களுக்கு அமைச்சர் பதவிகள் மற்றும் வாரியத் தலைவர் பதவிகள் தருவதாக வாக்குறுதி அளிக்கப்பட்டதாக அவர் குற்றம் சாட்டினார். மேலும், கட்சியின் கொறடா உத்தரவை மீறி செயல்பட வேண்டாம் என்றும், நம்பிக்கை தீர்மானத்திற்கு எதிராக வாக்களிக்குமாறும் அவர் பகிரங்கமாக உத்தரவிட்டார்.
பத்தாவது அட்டவணை மற்றும் கொறடா உத்தரவு
எடப்பாடி பழனிசாமியின் இந்த உரை, அரசியலமைப்புச் சட்டத்தின் 10-வது அட்டவணையின் பிரிவு 2(பி)-ன் கீழ் வழங்கப்பட்ட தெளிவான கட்டளையாகக் கருதப்படுகிறது. இதன் அடிப்படையில் இது ஒரு வலுவான ஆதாரமாகவும் பார்க்கப்படுகிறது. ஆனால், இந்த எச்சரிக்கையையும் மீறி, எஸ்பி வேலுமணி - சிவி சண்முகம் தலைமையிலான அதிருப்தி குழுவினர் பேச சபாநாயகர் அனுமதி வழங்கியதோடு, அவர்களை தவெக அரசுக்கு ஆதரவாக வாக்களிக்கவும் அனுமதித்தார். இது தமிழ்நாடு சட்டப்பேரவை விதிகளுக்கு முரணானது என எதிர்க்கட்சிகள் வாதிடுகின்றன.
அதிமுக மட்டுமல்லாது, அமமுக பொதுச்செயலாளர் டிடிவி தினகரனும் தனது கட்சியின் ஒரே ஒரு எம்.எல்.ஏ குதிரை பேரத்தில் ஈர்க்கப்பட்டதாகக் குற்றம் சாட்டினார். எதிர்க்கட்சித் தலைவர் உதயநிதி ஸ்டாலின் மற்றும் தேமுதிக பொதுச்செயலாளர் பிரேமலதா விஜயகாந்த் உள்ளிட்ட எதிர்க்கட்சித் தலைவர்கள் அனைவரும் ஒருங்கிணைந்து, இந்த குதிரை பேரத்திற்கு எதிராக அவையில் கடும் போராட்டங்களை நடத்தினர்.
சபாநாயகரின் கடமை மற்றும் உச்ச நீதிமன்றத் தீர்ப்பு
எதிர்க்கட்சிகள் முன்வைத்த இவ்வளவு கடுமையான குற்றச்சாட்டுகளை சபாநாயகர் மேலோட்டமாக அணுகியிருக்கக் கூடாது என்பதே அரசியல் நோக்கர்களின் கருத்தாக உள்ளது. அவசர அவசரமாக வாக்கெடுப்பை நடத்துவதற்குப் பதிலாக, குற்றச்சாட்டுகளை நிரூபிக்க எதிர்க்கட்சிகளுக்கு வாய்ப்பளித்திருக்க வேண்டும். குதிரை பேரப் புகாருக்கு உள்ளான எம்.எல்.ஏ-க்களை வாக்கெடுப்பில் பங்கேற்க அனுமதித்திருக்கக் கூடாது.
குறிப்பாக, 'ராஜாராம் பால்' (Rajaram Pal) வழக்கில் உச்ச நீதிமன்றம் வழங்கிய தீர்ப்பின்படி, இத்தகைய புகார்களை விசாரிக்க ஒரு விசாரணைக் குழுவை சபாநாயகர் நியமித்திருக்க வேண்டும். அக்குழுவின் விசாரணை முடிவில் 'வாக்களிக்கப் பணம்' பெற்றது நிரூபிக்கப்பட்டால், சம்பந்தப்பட்ட உறுப்பினர்களைப் பதவியிலிருந்து நீக்க வழிவகை உண்டு. ஆனால், முதலமைச்சர் விஜய் இந்த குற்றச்சாட்டுகளுக்கு அவையில் முறையான மறுப்பு தெரிவிக்காதது சந்தேகங்களை வலுப்படுத்துகிறது.
அரசுக்கு இருக்கும் வாய்ப்பு
கட்சி பொதுச்செயலர் உத்தரவை மீறி.. கொறடா உத்தரவை மீறி வாக்களித்த 26 வாக்குகளும் செல்லாதவை என அறிவிக்கப்பட்டால் இவர்கள் தகுதி நீக்கம் செய்யப்பட்டு பதவி பறிக்கப்படலாம். அதோடு அந்த தொகுதிகளுக்கு இடைத்தேர்தல் வரலாம்.
ஆனாலும் தவெக அரசுக்கு ஒரு சாதகமான அம்சம் உள்ளது. திமுக உள்ளிட்ட கூட்டணிக் கட்சிகளின் ஆதரவுடன் அரசுக்கு இருக்கும் மீதமுள்ள 118 வாக்குகள் இன்னும் கேள்விக்குறியாக்கப்படவில்லை. தமிழக சட்டப்பேரவையின் தற்போதைய பெரும்பான்மை பலத்தின் அடிப்படையில் பார்த்தால், இந்த 118 வாக்குகளே தவெக அரசு நீடிப்பதற்கு போதுமானதாக உள்ளது.
இருப்பினும், சபாநாயகரின் செயல்பாடுகள் மற்றும் கட்சித் தாவல் தடைச் சட்டத்தின் கீழ் அதிருப்தி எம்.எல்.ஏ-க்களின் தகுதி குறித்து நீதிமன்றம் தலையிட்டால், அது தமிழக அரசியலில் ஒரு புதிய திருப்பத்தை ஏற்படுத்தும் என்பதில் ஐயமில்லை. ஜனநாயகப் பண்புகளைக் காக்க, குதிரை பேரப் புகார்கள் முறையாக விசாரிக்கப்பட வேண்டும் என்பதே பொதுமக்களின் எதிர்பார்ப்பாக உள்ளது.
Click it and Unblock the Notifications
Sign in with Google